Pottþétt hálkuvörn

  Margir detta á hausinn þessa dagana.  Það er fljúgandi hált á blautu svellinu.  Það er vont að detta.  Ennþá verra er að beinbrotna.  Það þarf samt ekki að fara svo.  Það er í raun afskaplega einfalt að verjast falli á hálu svelli.  Besta aðferðin er að fara ekki úr húsi.  En sumir þurfa þess samt vegna vinnu eða skóla eða annars. 

  Þá er röðin komin að næst bestu aðferðinni.  Hún er sú að fara í hnausþykkustu sokkana sína utan yfir skóna.  Sokkarnir eru svo stamir að það er auðvelt að ganga á svellinu hnarreistur og öruggur á eðlilegum hraða.

Allt að 11 stiga hiti um helgina

Afstýrðu á einfaldan hátt illvígum sjúkdómum af völdum tannbursta

  Eins og allir vita þá má rekja fjölda meltingarfærasjúkdóma,  öndunarfærasjúkdóma,  hjartasjúkdóma,  nýrnasjúkdóma,  æðasjúkdóma og blóðeitrana til tannbursta.  Tannburstar eru einhverjar mestu og verstu gróðrarstíur fyrir óþverra bakteríur sem um getur.  Tannburstarnir eru iðulega alveg löðrandi í bakteríum af ýmsu tagi.  Það geta verið allt upp í 700 tegundir af bakteríum á einum tannbursta.  Látið ekki sakleysislegt útlit tannbursta blekkja ykkur.  Þetta eru stórhættuleg kvikindi.

  Það sem gerist er að við notkun berast þessar bakteríur í hár burstans.  Þær geta lifað þar og orðið illvígari í allt upp í heila viku.  Verst er ástandið þegar margir geyma sína bursta í sama glasi.  Þá verður krossmengun.  Þetta er viðbjóður.  Svo ekki sé minnst á tungusköfuna.  Hún er bakteríusprengja.

  Góðu fréttirnar eru að það er vandalaust að forðast veikindi af völdum tannbursta og tungusköfu.  Það eina sem þarf að gera er að kaupa 16 eða 24 tannbursta (fer eftir því hvað fólk burstar tennur oft á dag) og annað eins af tungusköfum.  Hvert stykki skal geyma á þurrum stað og hafa góða fjarlægð á milli þeirra allra.  Það getur verið ágætt að dreifa þeim á milli 2ja - 3ja herberga.  Málið er að nota hvern bursta og hverja sköfu með í það minnsta 8 daga millibili. 

  Til öryggis er full ástæða til að stinga tólunum í vodka og láta þau liggja þar í nokkrar mínútur fyrir notkun.  Fá sér síðan nokkur skot sjálf/ur.  Ef löngun kviknar í meiri vodka að loknum munnþrifum er hægt að sötra vökvann í gegnum gosrör (það er, jú, búið að bursta tennurnar).  Eða sprauta honum í æð.      

Ótrúlegt reikningsdæmi! Sannreyndu dæmið!

  Tölustafir og reikningsformúlur eru heillandi.  Það er hægt að setja alla hluti upp í stærðfræðidæmi.  Og margt er hægt að setja upp í bráðskemmtileg reikningsdæmi eða reikningsleiki.  Einn slíkur er eftirfarandi og gildir fyrir alla allsstaðar:  Þú tekur fæðingarár þitt og leggur það saman við aldur þinn á þessu ári.  Hókus, pókus og bingó!  Útkoman verður ártalið í dag.

  Þetta er ótrúlegt og klikkar ekki.  Þú getur leikið þér að því að láta vini þína spreyta sig á þessu dæmi.  Þeir verða orðlausir af undrun.  Útkoman er alltaf sú sama.  Það má heimfæra þetta upp á fæðingarár heimilisdýra eins og hunda og katta.  Jafnvel gullfiska.   

Nauðsynlegt að vita

  Meðal allra skemmtilegustu hesta eru flóðhestar.  Þetta eru vinarlegar skepnur;  sterklegar og stæðilegar.  Oftast eru þær rólegar og lausar við æsing og fíflagang.  Stundum geispa flóðhestar.  Mörgum hættir til að tengja það við syfju og hugsa:  "Blessuð skepnan.  Núna langar hana að fara að lúlla."

  Þetta er alröng ályktun.  Þegar flóðhestur geispar þá þýðir það að farið sé að fjúka í hann.  Hann sé orðinn reiður og árásargjarn.  Þá er betra að forða sér.  Annars getur illa farið. 

Hvar er best að geyma fæðubótaefni, vítamín og lyf?

  Samkvæmt rannsóknum í Bandaríkjum Norður-Ameríku geyma flestir sin lyf,  vítamín og önnur fæðubótaefni (ginseng,  Omega 3 og þess háttar) annars vegar í ískápnum eða hins vegar í skáp inni á baðherberginu.  Ætla má að þetta eigi einnig við um Íslendinga.  Gallinn er sá að þetta eru ekki bestir staðir fyrir þessi fyrirbæri.  Ísskápurinn hefur þann ókost að stöðugt er verið að opna hann og raska jafnvægi í kælingu.  Baðherbergið hefur þann ókost að þar myndast raki þegar fólk fer í sturtu eða bað og hitastigið hleypur til og frá.

  Flest lyf og fæðubótaefni tapa virkni sinni undir þessum kringumstæðum.  Best er að geyma þetta dót inni í fataskáp og rökkri svefnherbergisins.  Þar er rakastig og hitastig jafnara en á hinum geymslustöðunum.  Virkni efnanna heldur sér mun betur.   

Það er auðvelt að komast hjá skaðlegum afleiðingum sígarettureykinga

  Í tímaritinu "Cancer" er upplýst að langtíma rannsókn leiði í ljós að fyrsta sígarettan á morgnana sé sú hættulegasta og óhollusta.  Rannsóknin náði til yfir 7000 einstaklinga.  Fyrsta sígarettan tvöfaldar líkur á krabbameini.  Það er ekkert smá.  Sígarettur eru ekki heilsusamlegar.  Ráðið gegn þessu er að sleppa fyrstu sígarettunni.  Leyfa henni að reykja sig sjálfa í öskubakkanum og reykja bara næstu sígarettu. 

Meðmæli meindýraeyða?

  Það var viðtal við meindýraeyði á Bylgjunni.  Hann tiltók að viðskiptavinir sínir væru svo ánægðir með árangurinn af þjónustunni að þeir panti hann aftur og aftur.  Við þessi ummæli eða meðmæli vakna spurningar um árangurinn.  Þetta hljómar í fljótu bragði ekki sem góð meðmæli.  Eða hvað?

  Rifjast þá upp fyrir mér þegar þekktur pönkari vann nokkur sumur við að "úða skordýraeitri í garða".  Þetta set ég innan gæsalappa vegna þess að hann úðaði aðeins vatni á garðana.  En hafði fínar tekjur af.  Var með marga ánægða fasta viðskiptavini.

  Ástæða er til að hvetja fólk til að ganga eftir því að meindýraeyðar sýni tilskilin leyfi og vottorð.

Hvað er svona merkilegt við það...?

 

 

 

 

 

 

 

 

  

  Nýverið var borinn í öll hús á höfuðborgarsvæðinu auglýsingabæklingur frá veitingastað sem gerir út á skyndibita kenndan við þýsku hafnarborgina Hamborg.  Ja,  kannski var bæklingurinn ekki borinn í alveg öll hús.  En mörg.  Bæklingurinn var og er að mörgu leyti góður fyrir sinn hatt og fróðlegur jafnvel.  Ég fór ekki að glugga í hann fyrr en áðan.  Þá rak ég augun í að ítrekað er hampað að brauðið sé útlent.  Innflutt.  

  Hver er auglýsingapunkturinn í því?  Hvað er merkilegra og lystugra við útlend brauð en íslensk?  Er það rotvarnarefnið?    

  Til gamans:  Fyrir nokkrum árum voru einu hamborgarar sem fengust í nágrannalandi kjötbolla í brauði.  Ekki þetta flata hamborgarkjöt sem við eigum að venjast hérlendis og víðast erlendis í dag.  Ég undraðist þetta með kjötbolluna.  Þá var ég upplýstur um að þannig væri alvöru hamborgari.  Eða réttara sagt "orginalinn".  Iðnaðarmenn í Hamborg í Þýskalandi hafi "fundið upp" þessa aðferð til að borða kjötbollur án þess að leggja niður vinnu á meðan.  Í stað þess að snæða kjötbollur með hníf og gafli,  sósu og kartöflum,  hafi þeir rammað kjötbolluna inn í samlokubrauðsneiðar.  Þannig gátu þeir haldið á máltíðinni með annarri hendi á meðan þeir unnu með hinni.  

  Kannski er þetta lýgi.  Ég veit það ekki.  Ég er ekkert fyrir hamborgara.  Enda smakkaði ég ekki það fyrirbæri fyrr en kominn á efri ár.

Hvað þýða þessar innihaldslýsingar?

  Í arma mér barst lítil og sæt rammíslensk ferna merkt sem jarðaberjasafi.  Á framhlið hennar er slegið upp á áberandi hátt að innihaldið sé án rotvarnarefna og án viðbættra gervibragðefna.  Þegar innihaldslýsing á fernunni er skoðuð kemur í ljós að jarðaberjasafinn inniheldur þráavarnarefni og ótilgreint bragðefni. 

  Hver er munur á rotvarnarefni og þráavarnarefnis?  Er rotvarnarefni eitthvað sem hægt er að bera á sig og hindrar að maður verði rotaður í fólskulegum líkamsárásum?  En þráavarnarefni dragi úr líkum á að drykkurinn þráni?

  Hver er munur á bragðefni og gervibragðefni?

Leyndarmál borðstofustólsins

  Vestræn börn hafa þyngst undanfarin ár.  Ástæðan er ekki aðeins áköf og aukin sókn í ruslfæði (pizzur,  hamborgara,  djúpsteikta kjúklingabita,  franskar kartöflur og þess háttar viðbjóð) og gosdrykki.  Önnur ástæða vegur einnig þungt í bókstaflegri merkingu.  Það skiptir nefnilega máli á hverju blessuð börnin sitja þegar þau slafra í sig gumsinu.  Mjúkar sessur eru óvinur í þessu tilfelli.  Verst er þegar matast er í stofusófanum. 

.

  Börn og fullorðnir eiga að matast á grjóthörðum eldhússtólum.  Það er galdurinn.  Þar situr fólk stíft og beint í baki.  Þetta hefur með meltinguna að gera.

.

  Fólk er almennt ekki meðvitað um þetta mikilvæga atriði.  Samt hefur fólk - ómeðvitað - alla tíð sótt í harða borðstofustóla.  Heimsendingar á pizzum og öðrum óþverra hafa hinsvegar fært allt of marga matmálstíma inn í stofusófann.  Manneskjan er ekki bara það sem hún borðar.  Manneskjan er einnig það sem hún situr á er hún matast.

  Nýverið bloggaði ég um nýendurinnréttað húsnæði breska þungarokkarans Ozzy Osbournes.  Þar er allt kalt og hart og eiginlega óvistlegt.  En eldhússtólarnir eru til fyrirmyndar.  Sjá:

.