Mikilvægt varðandi sigurlagið í söngvakeppninni

  Eins og allir vita þá er  Eilíf ást  með Herberti Guðmundssyni sigurlagið í Söngvakeppni evrópskra sjónvarpsstöðva (júrivisjón) í ár.  Þegar þetta ber á góma verður mörgum að orði eitthvað í þessa veru:  "Það kjósa auðvitað allir lagið hans Hebba.  Það er neyðarlegt fyrir aðra söngvahöfunda í keppninni.  Af því að lagið hans Hebba er svo öruggt í sigursæti ætla ég að greiða einhverjum öðrum höfundi mitt atkvæði af vorkunnsemi."

  Þessi afstaða er varasöm og allt að því refsiverð.  Ef allir hugsa á þennan veg fer allt í rugl.  Það eina rétta í stöðunni er að greiða atkvæði með því að hringja í 900-9901.  Aðeins þannig fer allt vel.

Hebbi rúllar upp júrivisjón

  Ég hef aldrei verið áhugasamur um júrivisjón,  Söngvakeppni evrópskra sjónvarpsstöðva.  Oftast hefur þessi söngvakeppni farið að mestu framhjá mér.  Samt hef ég alveg orðið var við ágæt lög í íslensku forkeppninni.  Til að mynda með Dr. Spock,  Dr. Gunna,  Botnleðju,  Heiðu (kenndri við Unun og Helvar),  Ingva Þór Kormákssyni og eflaust fleirum.

  Nú er byrjað að kynna lögin í íslensku forkeppninni 2012.  Ég hef ekki sett mig inn í það dæmi.  Hinsvegar hef ég eftir traustum og áreiðanlegum heimildum að lag Herberts Guðmundssonar sé öruggur sigurvegari.  Það sé með svo sterkri og grípandi laglínu,  krækju,  að það syngi stöðugt fyrir eyrum þeirra sem heyrt hafi.  Önnur lög eigi ekki möguleika.  Úrslitin séu ráðin.

  Við þessu mátti búast fyrst að Hebbi tekur þátt í keppninni í ár.  Hann hefur marg sannað sig sem einstaklega lunkinn við að semja grípandi lög.  Lagið hans er ekki komið í umferð.  Þangað til er upplagt að rifja upp önnur sívinsæl (klassísk) lög hans.  Í laginu hér fyrir ofan,  Can´t Walk Away,  spilar Charlie Watts (The Rolling Stones) á trommur.

 

Síðan kom örstutt hlé og allir fengu sér te

Óvenjulegt markaðsátak 365

  365 miðlar eru stærsta fjölmiðlasamsteypa landsins.  Þeir reka meðal annars Stöð 2,  Stöð 2 Sport,  Stöð 2 Extra,  Stöð 2 Bíó,  Nova TV,  Bylgjuna,  FM957 og nokkrar fleiri útvarpsstöðvar,  netmiðilinn Vísi og gefa út Fréttablaðið.  Skráður eigandi er Ingibjörg Pálmadóttir,  eiginkona Jóns Ásgeirs Jóhannessonar,  lengst af kenndan við Baug. 

  Víkur þá sögu að markaðsráðgjafa 365 miðla,  Kristjáni Óla Sigurðssyni.  Samkvæmt opinberri starfsmannastefnu 365 miðla er leitast við að ráða starfsmenn sem eru frumlegir og útsjónarsamir,  traustir og áreiðanlegir.

  Kristján Óli stendur bærilega undir því að vera frumlegur og útsjónarsamur.  Um það vitnar nýjasta markaðsátak hans.  Það felst í því að hann kemur fram undir nafni 365 og leggst af fullum þunga á DV með kröfu um að blaðið birti nafn 18 ára stelpukrakka sem kærði mann á fertugsaldri og konu fyrir nauðgun. 

  Frumleikinn í gjörningnum er margþættur.  Fram til þessa hefur fólk ekki haft hugmyndaflug til að velta fyrir sér hvort undir einhverjum kringumstæðum eigi fjölmiðlar að birta nafn stelpukrakka sem kærir hópnauðgun.  Það þarf frumleika og kaldrifjaðar hvatir til að láta sér detta þetta í hug.  Hvað þá að krefjast þessa af dagblaði.

  Í annan stað er frumlegt af markaðsráðgjafa stærstu fjölmiðlasamsteypu landsins að krefjast þess af litlu dagblaði úti í bæ að framkvæma lágkúruna. 

  Útsjónarsemin liggur í einhverju sem ég átta mig ekki á.  En næsta víst er að þetta markaðsátak hlýtur að skila fjölmiðlum 365 fjölmennum hópi nýrra áskrifenda og ennþá fjölmennari hópi auglýsenda.   

Besta hljómsveit ársins, besta plata ársins, besta myndband ársins...

 

  Nú eru áramótauppgjör gagnrýnenda og lesenda hinna ýmsu tónlistartímarita farin að skila sér í hús.  Það er margt spennandi í þeim dæmum.  Meðal annars að Björk kemur víða við sögu í þessum áramótauppgjörum.  Ekki aðeins vegna einnar af bestu plötum ársins 2011 og eins af bestu plötuumslögum ársins heldur einnig fyrir eitt af bestu myndböndum ársins.

  Útbreiddasta tónlistarblað Danmerkur heitir Gaffa.  Það er vandað fríblað með litmyndum.  Í gær (8. des) stóð Gaffa fyrir veglegri verðlaunaafhendingu í Bremen leikhúsinu í Kaupmannahöfn.  Næstum 10 þúsund lesendur blaðsins greiddu atkvæði í áramótauppgjöri blaðsins.  Úrslitin eru þessi:

Besta myndband ársins

- Björk: "Crystalline" (Michel Gondry)

Besta plata ársins

- Adele: "21"

Besta hljómsveit ársins

- Coldplay

Besta danska rokkplata ársins
- Hatesphere: "The Great Bludgeoning"

Besta danska hljómsveit ársins
- Malk de Koijn

Besta danska poppplata ársins
- Malk de Koijn: "Toback To The Fromtime"

Verður "Smells Like Teen Spirit" jólalagið í ár?

  Einhverra hluta vegna andar köldu til sjónvarpsþáttarins X-factor frá sumum í Bretlandi.  Fyrir tveimur árum leit út fyrir að lag í flutningi þáverandi sigurvegara í X-factor yrði jólalag ársins.  Í Bretlandi er það risadæmi hvaða lag er söluhæst síðustu vikuna fyrir jól.  Það lag fær titilinn "jólalag ársins" og gífurlega mikla athygli:  Þunga spilun í útvarpi og sjónvarpi og jafnvel forsíðuumfjöllun í blöðum.  Jólalag ársins er jafnframt iðulega söluhæsta lag ársins.  Þess vegna er ætið kapphlaup um það hver á jólalag ársins.

  Oftast er jólalag ársins með einhverja tengingu við jólin.  Do They Know It´s Christmas?  er stundum kallað dæmigert jólalag.  Það hefur þrívegis verið jólalag ársins.  Fyrst 1984 í flutningi Band Aid,  síðan 1989 með Band Aid II og loks 2004 með Band Aid 20.  Mary´s Boychild  er annað dæmigert jólalag.  Það var jólalagið 1957 í flutningi Harrys Belafontes.  Boney M.  endurtóku leikinn með þetta lag 1978.

  Fjölda Breta hugnaðist ekki að jólalagið 2009 félli í skaut X-factor sigurvegara.  Mjög óvænt myndaðist stemmning fyrir því að láta þá 17 ára gamalt eyðileggja áform aðstandanda X-factor.  17 ára gamla lagið,  Killing In The Name  með Rage Against The Machin,   hafði allt með sér til að höfða til andstæðinga X-factor:  Þetta er hávært pönk-fönkað rapp-þungarokkslag með sterku viðlagi.  Textinn bar skýr skilaboð til markaðsdeildar X-factors:  "Fuck you,  I Won´t do what you tell me!"  (Farðu til andskotans,  ég ætla ekki að hlýða fyrirmælum þínum).   

  Það voru ekki margir sem höfðu trú á átakinu.  Til að ná takmarkinu þurftu að seljast yfir 500.000 eintök.  Umræðan og hvatningar fóru fyrst og fremst fram á netinu.  Það var stofnuð sérstök stuðningssíða til að halda utan um umræðuna.  Áður en yfir lauk voru 750.000 búnir að skrá sig sem stuðningsmenn.  Killing In The Name  skákaði X-factor laginu með glæsibrag og varð jólalag ársins 2009.  Í dag muna fáir eftir X-factor laginu.

  Nú eru komnar af stað þreifingar um að endurtaka leikinn en að þessu sinni með Nirvana-laginu  Smells Like Teen Spirit.  Umræðan hófst fyrr á árinu en hefur ekki náð verulegu flugi.  Útgáfufyrirtæki Nirvana hefur stokkið á vagninn og ætlar að gefa lagið út á smáskífu með söfnunargildi.  Smáskífan verður gefin út í sérstökum hátíðarbúningi og aðeins í því upplagi sem dugir til að verða jólalag ársins.  Svo verður hún aldrei endurútgefin.

Veðbankar eru laginu ekki hagstæðir.  Þeir spá laginu 3ja sæti. 

  Annað sem setur strik í reikninginn:  Ekkja Kurts Cobains,  forsprakka Nirvana,  hefur boðið X-factor að sigurvegarinn í sjónvarpsþættinum fái að syngja Nirvana-lagið  In Bloom  og stilla því fram sem jólalaginu í ár.  X-factor menn fagna boði ekkjunnar,  Courtney Love.  Hún fer með höfundarrétt lagsins.  Þetta mun spara fyrirtækinu fyrirhöfn og vinnu við að ganga frá höfundarréttarmálum.  Það er oft snúið dæmi og lagahöfundar ekki allir tilbúnir að leyfa X-factor söngvurum að syngja sín lög.

  Sumir eru þrumu lostnir og svekktir yfir uppátæki ekkjunnar.  Aðrir telja þetta snjallt:  Að láta tvö Nirvana-lög slást um titilinn jólalagið 2011.  Til samans gætu bæði lögin selst í yfir milljón eintökum,  ásamt því að fá rosalega mikla spilun í ljósvakamiðlum.  Það þýðir að lögin skila erfingja Kurts Cobains vænni krónutölu í vasann.  Courtney á þann vasa.

   

 

Guðrún Ebba er hetja! Karl getur ekki setið áfram sem biskup

  Sjónvarpsviðtal Þórhalls Gunnarssonar við Guðrúnu Ebbu var átakanlegt og áhrifamikið.  Þórhallur sýndi sínar bestu hliðar sem góður sjónvarpsmaður:  Ágengur en nærfærinn og hélt sig við kjarna málsins.  Guðrún Ebba er hetja.  Þetta er stórt skref sem hún hefur stigið með því að segja alþjóð frá því skrímsli sem faðir hennar var;  margkrossaður frímúrari og biskup.  Æðsti embættismaður íslensku ríkiskirkjunnar. 

  Guðrún Ebba útskýrði mjög vel í hvaða stöðu fórnarlamb barnaníðs og annars heimilisofbeldi er.  Viðtalið á erindi inn í skólastofur landsins.

  Verri er hlutur núverandi biskups,  Karls Sigurbjörnssonar.  Hann kaus að stinga undir stól erindi Guðrúnar Ebbu.  Hann sat á því í hálft annað ár.  Reyndi þöggun í þessu alvarlega glæpamáli.  Það var ekki fyrr en DV tók málið upp sem erindi Guðrúnar Ebbu var dregið undan stóli Karls.  Karl hélt áfram að reyna að humma málið af sér.  Og hlóð lofsorðum á barnaníðinginn í millitíðinni.

  Er Karli stætt á að sitja áfram sem biskup eins og ekkert hafi í skorist?  Er hann það sáttur við sína framgöngu?  Eða er hann maður til að sýna fórnarlömbum kynferðisglæpamannsins samstöðu og samúð með því að viðurkenna embættisafglöp sín og segja af sér?

www.stigamot.is

www.aflidak.is

www.drekaslod.is

www.solstafir.is

 

Er Hussein Anti-Kristur?

  Ég hlustaði á spjall Egils Helgasonar við Noam Chomsky í Silfri Egils í sjónvarpinu í dag.  Það var áhugavert.  Þeir komu lítillega inn á þá merku staðreynd að fjórðungur bandarískra lýðveldissinna (republicana) telur fullvíst að forseti Bandaríkja Norður-Ameríku,  Barack Hussein Obama II, sé Anti-Kristur.  Með öðrum orðum að hann sé fulltrúi djöfulsins,  þess illgjarna og vonda skratta sem frá greinir skilmerkilega í mörg þúsund ára gömlum þjóðsögum gyðinga í Mið-Austurlöndum.  Anti-Kristur hefur eitthvað meiriháttar hlutverk í því að ferli að uppvakningurinn Jesú Kristur mæti enn einu sinni til jarðar og nú á okkar dögum heilögum. 

  Lýðveldissinnar eru um það bil helmingur Bandaríkjamanna.  Þannig að 25% þeirra er fjölmennur hópur.  Kannski hátt í 40 milljónir.  Getur verið að allur þessi fjöldi hafi rangt fyrir sér?  Það væri saga til næsta bæjar.  Þetta skiptir okkur jarðarbúa máli.  Bandaríkin eru í forystu í heiminum um þessar mundir. 

  Til gamans má geta að systir kallsins með húfuna,  Petes Seegers,  var kona Ewans McColls.  Dóttir hans sló í gegn á sínum tíma með lagi eftir Billy Bragg,  A New England:    

  Svo var henni drekkt - líkast til óviljandi - af auðmanni á spíttbáti úti fyrir Mexikó.  Áður sló breska leikkonan Tracy Ulaman í geng með lagi hennar  They Don´t Know.

Turnarnir féllu „þægilega“ niður

Máttur bænarinnar

  Ég sá áðan út undan mér heimildarmynd í sjónvarpinu um flótta nokkurra fanga úr fangelsi í Texas.  Þetta voru harðsvíraðir glæpamenn sem sátu inni fyrir morð og alls konar hrottaskap,  eins og gerist og gengur þarna um slóðir.  Þeir skipulögðu og undirbjuggu flóttann af mikilli útsjónasemi.  Það sem mestu máli skipti var að kvöldið áður en þeir létu til skarar skríða þá komu þeir saman,  spenntu greipar og báðu heitt og innilega til Drottins um að flóttinn úr fangelsinu myndi takast.  

  Það var eins og við manninn mælt:  Þeim tókst léttilega að yfirbuga,  lemja,  afklæða og binda nokkra fangaverði.  Flóttamennirnir fóru í föt fangavarðanna,  komust yfir byssur og bíl.  Því næst náðu þeir að plata aðra fangaverði til að opna hliðið á fangelsisgirðingunni og hleypa sér út í frelsið.

  Það var eitthvað sætt og krúttlegt við þetta.   

Andri á flandri - lofar góðu

  Íslenskt efni í sjónvarpsdagskrá RÚV hefur sveiflast öfga á milli upp á síðkastið.  Það hefur einkennst af hæstu hæðum (Popppunktur og kvikmyndir Friðriks Þórs) og hörmung (Tríó).  Ég tek fram að síðara dæmið er ekki tiltekið sem árás á höfund Tríós heldur stjórnendur RÚV. 

  Vegna þess að ég var í útlöndum þá hef ég núna verið að fletta upp á síðustu helgarþáttum á RÚV á "vodinu".  Hér á landi á,  eins og skagastrandarskáldið sagði.  Fyrsti þáttur  Andra á flandri  lofar góðu.  Virkilega góðu.  Ég horfði á hann tvisvar í beit.  Og skemmti mér jafn vel í bæði skiptin. 

  Flestir kannast við Andra Frey Viðarsson sem hressan og skemmtilegan útvarpsmann.  Fyrst á X-inu og síðan á rás 2.  Lýsingarorðið hress hefur reyndar verið gengisfellt af dagskrárgerðarmönnum útvarpsstöðva heimska fólksins,  FM957 og Kanans,  og er orðið neikvætt.  Andri er öðru vísi hress.  Í hans tilfelli er orðið hress jákvætt. 

  Það er ekki sjálfgefið að góður útvarpsmaður sé einnig góður í sjónvarpi.  Andri er hinsvegar aldeilis frábær sjónvarpsmaður.  Hann tekur sig ekki hátíðlega.  Gerir grín að sjálfum sér og nær að laða fram það besta hjá viðmælendum.

  Miðillinn Hilmar Guðmundsson fór á kostum.  Hjá honum dúkkuðu upp draugar með algengustu íslenskum mannanöfnum:  Þórarinn,  Tóti,  Sigríður,  Sigurður,  Siggi,  Bjarni,  Margrét,  Jói,  Guðmundur,  Gunna,  "hefur þú verið í sveit?",  pönnukökur...  Það er verulega merkilegt að draugar með sjaldgæf nöfn kíkja aldrei í heimsókn til miðla.

  Andri á flandri  er topp sjónvarpsefni.  Ég hlakka til að fylgjast með næstu þáttum.

  Meðfylgjandi myndbönd eru ekki úr þættinum  Andri á flandri  heldur gamlar klippur úr Kastljósi.

  Í gamla daga var Andri Freyr gítarleikari hljómsveita á borð við Bisund (2. sæti í Músíktilraunum),  Botnleðju (1. sæti í Músíktilraunum) og Fidel.

  Birkir Fjalar bróðir hans var trommuleikari og söngvari hljómsveita á borð við Döðlurnar,  Stjörnukisa (1. sæti í Músíktilraunum),  I Adapt og Celestine. 

  Viðar faðir þeirra var trommuleikari hinnar margumtöluðu hljómsveitar Frostmarks og Jarla.  Undir lok ferils Frostmarks var þar söngvari að nafni Jón Rúnar Halldórsson,  faðir Friðriks Dórs og Jóns Jónssonar.  Þeir eru að gera það gott þessa dagana.  Það voru einhver fleiri frægðarmenni í Frostmarki.  Galdrakallinn Villi Guðjóns hélt utan um það dæmi.  Gott ef ég kom ekki líka við sögu.