Veitingahússumsögn

 

  - Réttur:  Beikon og egg

  -  Veitingastaður:  Tapashúsið,  Ægissíðu 2

  - Verð:  890 krónur

  - Einkunn: ****

  Tapas er eitthvað sem nær yfir fjölbreytta smárétti.  Það eru tveir slíkir staðir á sama bletti í miðbæ við höfnina.  Mig bar niður á Tapashúsið sem er staðsett í húsaþyrpingu er telur meðal annars Sægreifann frábæra og Hamborgarbúlluna.  Það er eiginlega ætlast til að fleiri enn einn smáréttur sé settur saman í máltíð.  En sé maður ekki verulega svangur né gráðugur er alveg upplagt að prófa einn smárétt. 

  Tapashúsið er millifínt veitingahús með bryggjulegri stemmningu.  Á heimasíðu Tapashússins er klaufalegt að birta aðeins ljósmyndir af auðum sætum og borðum.  Tóm sæti og borð eru fráhrindandi.  

  Rétturinn "beikon og egg" er hálft léttsoðið egg og reykt svínasíða.  Svínasíðubitinn er af svipaðri stærð og hálfa eggið.  Eggið bragðast vel.  Síðubitinn bragðast ennþá betur.  Ég kann ekki að útlista bragðgott krydd á honum.  Lostæti.  Þetta er í raun 5 stjörnu biti en verðið dregur hann niður um eina stjörnu.   Til samanburðar kostar á Vitaborgaranum í Ármúla 2 spæld egg + 12 beikonsneiðar + 2 ristaðar brauðsneiðar og smjör fyrir 110 kr. meira.   

Veitingahússumsögn

 

.

- Veitingastaður:  Hrói höttur,  Hringbraut

- Réttur:  Pönnusteiktur fiskur

- Verð:  1890 kr.

- Einkunn:  **** (af 5)

.

  Fátt er betra en pönnusteiktur fiskur.  Einkum ef ekki er troðið utan á fiskinn raspi,  deigi eða öðru slíku.  Pönnusteiktur fiskur í Hróa hetti er eins og best verður á kosið.  Snöggsteiktur strípaður en nógu vel til þess að hann er fagurlega brúngullinleitur á báðum hliðum, stökkur yst en mjúkur og þéttur að innan.

  Þetta er þorskur.  Það er gott.  Hann er bragðsterkari og betri en hræætan ýsa,  sem því miður er víðast boðið upp á þegar réttur heitir pönnusteiktur fiskur.  

  Fiskstykkin eru tvö og nokkuð stór.  Bökuð kartafla var næstum því of lítil til að duga með þeim.  Eflaust er bakaða kartaflan stundum örlítið stærri - ef ég þekki bakaðar kartöflur rétt. 

  Það vantaði smjör eða sýrðan rjóma eða eitthvað slíkt með kartöflunni.  Kannski gleymdist það.  Afgreiðslustúlkan brá snögg við og sótti smjör þegar á þetta var bent.

  Ágætt hefði verið að hafa pipar á borðinu til að strá yfir smjörið á kartöflunni.  Í staðinn mátti nota krydd sem kennt er við franskar kartöflur.  Það er á borðum ásamt salti.

  Þó að bakaða kartaflan væri í smærra lagi þá kom það ekki að sök.  Ferska salatið var vel útilátið.  Í því var m.a. paprika og agúrkur.  Aldeilis prýðilegt.

  Á matseðli stendur að sjávarfangssósa sé með pönnusteikta fisknum.  Hún var fjarri góðu gamni.  Þess í stað var ljúffeng sveppasósa.

  Með pönnusteiktum fiski á alltaf að vera örþunn sítrónusneið.  Bæði til að útiloka matareitrun (sem að vísu eru litlar líkur á) en öllu fremur upp á bragð að gera.  Sítrónusneiðina vantaði.  Ekkert stórmál.  Áreiðanlega hefði verið auðsótt mál að fara fram á sítrónusneið.  Ég hafði bara ekki rænu á því.  Þetta var ljómandi gott eins og það var.

  Án þess að hugsa út í hvort súpa dagsins væri með í pakkanum fékk ég mér súpu í skál.  Það var grænmetis- og núðlusúpa með chili bragði.  Dálítið asíuleg og bragðgóð súpa.

  Hrói höttur er millifínn veitingastaður.  Ég mun oftar fá mér pönnusteiktan fisk þar.  Það er góður réttur. 

 

 

   

 

Jólahlaðborð á BSÍ

  Ég er dálítið í því þessa dagana að kíkja á jólahlaðborð.  Jafnframt smakka ég á því sem þar er í boði.  Það er svo gaman.  Og bragðgott.  Á Umferðarmiðstöðinni í Vatnsmýri,  BSÍ (Bifreiðastöð Íslands) er veitingastaður sem heitir Fljótt og gott.  Staðurinn stendur undir nafni.  Þar er daglega hægt að velja úr fjölda heimilislegra rétta á verðinu frá 1290 kr. til um það bil 2000 kr.  Réttirnir eru afgreiddir tilbúnir úr hitaborði.  Meðlæti er að finna í salatbar.  Innifalið í verði er súpa og kaffi. 

  Þetta er alveg ljómandi góður kostur. 

  Þessa dagana býður Fljótt og gott daglega upp á jólahlaðborð til klukkan 16.00.  Það kostar 2490 kall og er eins og sameinað jólahlaðborð Húsasmiðjunnar og Byko.  Um þau jólahlaðborð má léttilega lesa með því að smella á þessa slóð:  http://www.jensgud.blog.is/blog/jensgud/entry/1204452/

  Á jólahlaðborði Fljótt og gott er úrval síldarrétta.  Þar er einnig graflax og reyktur lax.  Til samanburðar við sjávarrétti Húsasmiðjunnar er í tilfelli Húsasmiðjunnar reyktur lax,  rækjur og túnfiskur.  Gallinn er sá að laxinn klárast fljótt og nýr sjávarréttabakki er ekki borinn fram fyrr en túnfiskurinn og rækjurnar eru einnig búin.   Það er því hending (og heppni) að ná laxbita.  Á BSÍ er engin hætta á slíku.  Það er alltaf til nóg af laxi.

  Eins og í Húsasmiðjunni og Byko er á BSÍ boðið upp á heita pörusteik.  Eins og í Húsasmiðjunni er einnig í boði byonskinka og heitar partýpylsur.  Þær eru betri á BSÍ.  Ég held að þær séu steiktar en ekki soðnar eins og í Húsasmiðjunni. 

  Allir staðirnir eru með sykraðar kartöflur.  Eins og í Bykó er á BSÍ hangikjöt,  soðnar kartöflur og jafningur.  Það sem Fljótt og gott hefur umfram hina staðina er heitar litlar kjötbollur og reykt nautstunga.  Hún er lostæti.

  Eins og í Byko er á BSÍ er "ris a la mande" í eftirrétt.  Að auki er á BSÍ ostaterta í eftirrétt. 

  Niðurstaðan er sú að örlítið dýrara jólahlaðborð Fljótt og gott í samanburði við Húsasmiðjuna og Byko er fyllilega þess virði.  Samanburðurinn er samt ekki alveg sanngjarn.  Húsasmiðjan og Byko nota (og niðurgreiða) jólahlaðborð sín til að lokka viðskiptavini á staðinn.  Þaðan fara þeir út hlaðnir vörum sem viðskiptavinir kaupa þar í leiðinni.  Sjálfur hef ég ósjaldan mætt þangað í jólahlaðborð og gengið út með skrúfjárn,  ofnlykil,  málningarvörur,  leikföng,  úlpu og sitthvað fleira.  Eitthvað sem ég ætlaði ekki að kaupa þegar mætt var á staðinn.  Bara eitthvað sem ég hef rekist á og gripið með mér í leiðinni.  Ég hef horft upp á aðra maula jólamat með troðfullar innkaupakerrur sér við hlið.

  Í dag var - að ég held - jólahlaðborð í Kænunni í Hafnarfirði á 1900 kall.  Ég ætlaði að kíkja á það en gleymdi því og var allt í einu pakksaddur á BSÍ.  Sæll og sáttur.

  Næst ætla ég að mæta á jólahlaðborðið á Hótel Loftleiðum. 

Skemmtilega óvænt tilviljun og jólagjöfin 2011

  Rannsóknarsetur verslunarinnar er snilldar fyrirbæri.  Toppurinn í starfseminni er svokölluð jólagjafanefnd.  Hún er að sögn Emils B. Karlssonar,  forstöðumanns,  skipuð löggiltu smekkfólki.  Gaman væri að vita hvaða fyrirbæri löggildir smekkmenn.  Það er brýnt að vita það.  Einnig eru í nefndinni tískulöggur,  sem eru þær löggur innan deilda rannsóknarlögreglu,   umferðarlögreglu og fíkniefnalögreglu er gera sér best grein fyrir tísku og eru þessa dagana að reyna að staðsetja næstu tískubylgju:  http://www.jensgud.blog.is/blog/jensgud/entry/1205573/

  Löggilta smekkfólkið og tískulöggurnar hafa komið sér saman um að jólagjöfin á Íslandi 2011 sé tölva.  Svokölluð iPad spjaldtölva Apple.  Valið kom forstjóra Epli.is,  umboðsaðila Apple á Íslandi, ánægjulega á óvart.  Sambýliskona hans í jólagjafanefndinni hafði ekkert samráð við hann um valið og hann kemur henni á óvart í staðinn með því að bjóða henni upp á rómantískan kvöldverð til að fagna valinu.  Það eru þessi litlu óvæntu atvik sem krydda tilveruna í skugga bankahrunsins,  sem er víst ekkert bankahrun heldur nett bankafall eða bankaáfall.

  Ódýrasta útgáfan af Apple iPad spjaldtölvunni kostar aðeins 85 þúsund kall.  Sem er innan skekkjumarka á þeirri upphæð sem fólk ver til jólagjafakaupa handa vinum og ættingjum 2011.

  Rök fyrir sjaldtölvu sem jólagjöfinni 2011 er tiltekið að allir noti spjaldtölvu óháð aldri.  Kornabörn í vöggu jafnt sem háaldraðar ömmur og afar. 

  Á einhverjum tímapunkti hef ég sem afi orðið viðskila við hugtakið "allir".  Ég veit ekkert hvað spjaldtölva er, iPad og það allt.  Ég hef aldrei séð jafnaldra mína (nálægt sextugu) eða mér eldri afa og ömmur brúka svona tæki.  Það er ekkert að marka.  Ég er sjóndapur og þekki ekki í sundur farsíma frá sjónvarpsfjarstýringu. 

Spjaldtölva jólagjöfin í ár

Ódýr og góð jólahlaðborð

  Fyrir örfáum áratugum leiddu Íslendingar ekki huga að jólum fyrr en í desember.  Nú er öldin önnur.  Jólastemmningin hellist yfir af þunga snemma í nóvember.  Jólahlaðborðin vega þar þungt.  Núna um helgina héldust samráðsfyrirtækin á byggingavörumarkaðnum,  Húsasmiðjan og Bykó,  í hendur við að bjóða upp á jólahlaðborð.  Verðið er það sama, 1290 kall.  Skemmtileg tilviljun.

  það er reyndar spurning hvort 2ja rétta jólamáltíð Bykó fellur undir hugtakið hlaðborð.  Að vísu er "ris a la mande" í eftirrétt.  En þetta er ósköp svipað og á borðum íslenskra heimila um jól án þess að talað sé um hlaðborð:  Pörusteik og kalt hangikjöt ásamt meðlæti:  Kartöflum,  grænum baunum,  rauðkáli og þess háttar.

  Hlaðborðið í Húsasmiðjunni er alvöru danskt jólahlaðborð.  Það er pörusteik,  byonskinka,  heitir kjúklingaleggir,  heitar partýpylsur og kjúklinganaggar.  Meðlæti og það allt er veislulegra:  Reyktur lax, rækjur, þrjár tegundir af síldarsalati og svo framvegis.

  Hvoru tveggja,  jólamáltíðin í Bykó og danska jólahlaðborðið í Húsasmiðjunni,  eru vel peninganna virði.  Það er kostur að það sem í boði er sé ólíkt.  Stundum er stemmning fyrir hangikjöti og "ris a la mande".  Stundum er stemmning fyrir dönsku jólahlaðborði.

  Þriðji kosturinn er hangikjötsmáltíð í IKEA.  Hún kostar 895 kall.  Með því að skjótast þangað einstaka sinnum má spara 395 kall í samanburði við hina staðina. 

  Það er svooooo gaman að jólunum.  Sem betur fer eru þau bara einu sinni á ári.  Það gerir þau svo skemmtileg.

 

Íslendingar gleðja

 

  Útlendingar um allan heim hafa til nokkurra ára hlegið sig máttlausa yfir fíflagangi kolgeggjaðra Íslendinga,  sem héldu að þeir væru mestir og bestir í heimi,  snjallastir allra í fjármálabraski.  Þeir hældu sér og hver öðrum við hvert tækifæri fyrir einstaka snilli.  Þeir hömpuðu "íslensku leiðinni";  að láta kylfu ráða kasti í stað þess að hanga yfir smáatriðum.  Forsetinn,  seðlabankastjóri og aðrar toppfígúrur sáu um uppklapp og húrrahróp fyrir "íslensku útrásarvíkingana".  Það þarf svo sem ekkert að halda áfram með upptalninguna á "tærri snilldinni".  Mestu skiptir að sögur af brjáluðum kóksniffandi gullétandi íslensku vitleysingunum er útlendingum óendanleg uppspretta hláturs. 

  Það er öllum hollt að hlæja.  Gamansögurnar af Íslendingum gleðja.  Einu útlendingarnir sem hlæja ekki þegar tal berst að íslensku kóngunum eru þeir sem töpuðu peningum á kókflippi þeirra.

  Sjálf/ir getum við Íslendingar brosað yfir lýsingum útlendinga á Íslendingum.  Kíkið á fréttina hér fyrir neðan.  Þaðan er hægt að smella á sjónvarpsviðtalið sem um ræðir.  Spjallið um Ísland hefst á mínútu 31.30.

Hlegið að Íslendingum

Misskilningur sem verður leiðréttur

  Það getur alltaf hent þegar fyrirtæki haslar sér völl á nýjum vettvangi að hitt og þetta misskiljist.  Þegar misskilningurinn kemur í ljós er næsta skref að leiðrétta hann.  Þannig verður það í tilfelli íslenskra pípulagningamanna fyrirtækisins Pípulagningaverktaka ehf.  sem nú eru við störf í Noregi. 

  Pípulagningaverktakar ehf.  er virt og vinsælt fyrirtæki í pípulögnum á Íslandi.  Það hóf starfsemi á Blönduósi fyrir röskum þremur áratugum og hefur vaxið upp í það að verða eitt hið stærsta á sínu sviði hérlendis.  Fyrirtækið nýtur sérstöðu fyrir áherslu á umhverfisvernd,  gæðamál og öryggismál starfsmanna. 

  Það var eðlilegt skref í uppgangi fyrirtækisins að fara í útrás til Noregs.  Í því skrefi hefur komið upp hlálegur misskilningur sem nú hefur orðið fréttaefni í Noregi.  Misskilningur sem hugsanlega má rekja til tungumálaörðugleika.  Nútíma norska er tyrfið tungumál fyrir Íslendinga.  Það er auðvelt að misskilja hana - þó að vilji sé til annars.  Það er bara eins og gengur.

  Ég er búinn að senda forstjóra Pípulagningaverktaka ehf.,  Bjarna Jónssyni úr Vatnsdal,  beiðni um fésbókarvináttu.  Hann hefur ekki sinnt því.  Þar er um annan misskilning að ræða.  Sem verður væntanlega leiðréttur um leið og norski misskilningurinn.  Það er málið.  Misskilningar eru til að leiðrétta þá.  Eftir að misskilningar hafa verið leiðréttir er gaman.  Það er kostur við misskilng.

 

Unnu í Noregi fyrir lúsarlaun

Gömlu skónum breytt í nýja

  Allir kannast við það erfiða vandamál að fá leiða á gömlu skónum sínum.  Skórnir sem lengi vel voru uppáhalds skórnir eru skyndilega orðnir þreytulegir og glæsibragurinn sem geislaði af þeim er horfinn eins og dögg fyrir sólu.  Þá er til gott ráð.  Það er ódýrt og einfalt.  Það eina sem þarf að gera er að skipta um reimar á skónum.  Nýju reimarnar þurfa að vera rauðar eða appelsínugular eða í öðrum áberandi lit.  Nýju reimarnar stela allri athyglinni.  Það skiptir ekki máli hvort þetta eru svartir spariskór eða strigaskór.  Þetta eru orðnir nýir skór.  Allir dáðst að þeim. 

 

Óvenjuleg nýbreytni

  Allir kannast við að þegar greiðslukort af einhverjun tagi er notað þá er gjaldfærð önnur upphæð en sú sem úttekt nemur.  Það er gaman.  Það er fjölbreytni.  Það er skemmtilegur samkvæmisleikur að fá endanlegt uppgjör frá greiðslukortafyrirtækjum og reyna að fá það til að stemma nokkurn veginn við úttektir.

  Sú óvenjulega nýbreytni hefur verið tekin upp hjá bensínfyrirtæki sem ég skipti við að við sjálfsala þess hafa verið settir upp límmiðar með textanum "Einungis er gjaldfærð sú upphæð sem dælt er fyrir."   

Ekki henda gömlu hurðinni!

  Íslendingar eru alltaf að endurnýja hurðir.  Það má varla halda fermingarveislu í heimahúsi eða afmælisveislu öðru vísi en skipta um hurð í íbúðinni.  Sem er hið besta mál.  Verra er að iðulega er gömlu hurðinni hent á haugana.  Það er hið versta mál.  Gömlu hurðina á að nýta sem sófaborð eða stofuborð.  Það eina sem til þarf er að fjarlægja hurðarhún og setja löpp eða lappir undir gömlu hurðina.  Hér er vel heppnað dæmi:

  Þessi hurð á myndinni fyrir ofan yrði glæsilegt stofuborð.  Hurðin á myndinni hér fyrir neðan er aftur á móti ekki heppileg til framhaldslífs sem stofuborð.