Skotar eru stórveldi

  Ég styð Skota.  Styð einkum og sér í lagi þá Skota sem velja sjálfstæði Skotlands.  Skotar eiga miklu meiri samleið með okkur norrænum þjóðum í Skandinavíu en innræktaðri og úrkynjaðri elítu Englendinga.  Enska elítan hefur aldrei sýnt Skotum annað en hroka,  yfirgang og fyrirlitningu.   Skotabrandarnir víðfrægu eru glöggt dæmi um það.  Fátækt og þar af leiðandi sparsemi Skota hefur löngum verið aðhlátursefni Englendinga.  Þegar Englendingar hleypa af fallbyssu 12 skotum til heiðurs  Bretadrottningarpakkinu klukkan 12 á hádegi þá hleypa Skotar af einu skoti klukkan 1.  Þannig spara þeir hvern dag 11 skot. 

  Skosk tónlist,  önnur en sekkjapípublástur,  er jafnan skilgreind á alþjóðavettvangi sem bresk tónlist.  Það er ekki gerður greinarmunur á því hvort að hún sé skosk eða ensk.  Þetta er bara bresk músík.

  Íbúar Skotlands eru rösklega 5 milljónir.  Álíka margir og Danir og Finnar.  En Skotar eru stórveldi í tónlist á alþjóðamarkaði þegar tónlist þeirra er skilgreind skosk - í stað þess að vera skilgreind bresk eins og oftast. 

  Dæmi:  Um miðjan sjötta áratuginn tók skoskur söngvari,  Lonnie Donegan,  upp á því að endurvekja bandarískan kántrý-blússtíl frá þriðja áratug síðustu aldar,  skiffle.  Lonnie olli skiffle-æði í Bretlandi.  Allir sem vettlingi gátu valdið (og sokkum) fóru að spila skiffle að hætti Skotans Lonnie Donegan  Sjálfur flaug hann hæstum hæðum á vinsældalistum með skiffle-flutningi á söngvum bandarísku trúbadora á borð við Woody Guthrie og Leadbelly.  Bresk hljómsveit sem hét Bítlarnir var fyrstu árin skiffle-hljómsveit að hætti Lonnies Donegans.

 

  Frægasti söngvahöfundur Skota er sennilega Ewan McColl.  Hann tók virkan þátt í skiffle-bylgjunni og kynnti Bretum blús ásamt Alex Korner.  Þekktasta lag Ewans er kannski Dirty Old Town.  Það hefur verið krákað (cover song) af íslenskum hljómsveitum á borð við Papana og KKP. 

 

  Annað þekkt lag hans náði 1. sæti bandaríska vinsældalistans í flutningi Robertu Flack.  Líka þekkt í flutningi Elvis Presleys. 

 

  Á sjöunda áratugnum var Skotinn Donovan allt að því svar Breta við bandaríska Bob Dylan.  Kassagítartrúbador sem söng ljóðræna söngva með sterkri laglínu.

 

  Þungarokkið gekk í garð um 1970.  Þar átti skoska hljómsveitin Nazareth stórleik.  Raðaði lögum á vinsældalista:  "Broken Down Angel",  "Bad Bad Boy",  "Love Hurts" og allskonar.   Líka blússlagara Woodys Gutries,  "Vigilante Man". 

 

  Af seinni tíma poppstjörnum Skota má tiltaka Annie Lennox.  Ég hef ekkert gaman af dúett hennar,  Eurythmics.  En sú skoska fær plús í kladdann fyrir að vera gagnrýnin á landrán gyðinga í Palestínu og slátrun Ísraelhers á Palestínubörnum.  Hún er líka feiministi.  En músíkin ekki flott

  Hroki Englendinga gagnvart Skotum birtist meðal annars gagnvart enskuframburði sumra Skota.  Ég hef keyrt um hálendi Skotlands og,  já,  það er ekki auðvelt að skilja suma þar.  Þeir tala ekki Oxford-ensku.  En þeirra enska er ekkert ómerkilegri en London-enska.  Bara öðruvísi.  Tvíburabræðurnir í The Proclaimers eru ekkert nema flottir.

  Það væri aðeins til að æra óstöðugan að þylja upp alla þá yngri skosku tónlistarmenn sem njóta vinsælda um heim allan.  Kannski er hljómsveitin Primal Scream þeirra vinsælust.

 

 

. 

Skotar vilja flengja elítuna

Athugasemdir

[Axel Jóhann Hallgrímsson, 15.9.2014 kl. 22:13]

Lifi sjálfstætt Skotland!

[Helga Kristjánsdóttir, 16.9.2014 kl. 01:18]

Svo er nú Rod Stewart Skoti. Það var svo gaman að fá unga fótboltamenn frá Skotlandi hingað á áttunda áratugnum,Þeim var dreift á heimilin og síðan fóru þeir íslensku út til þeirra. Minnir að Skotar eigi langflesta uppfinningamenn í heiminum,er klaufi að googla það. Vona að þeir fái sjálfstæði.

[Wilhelm Emilsson, 16.9.2014 kl. 04:52]

If it's not Scottish, it's crap! :)

[Jósef Smári Ásmundsson, 16.9.2014 kl. 08:42]

Dittó. Ef Skotland verður sjálfstætt flyt ég þangað. En þú gleymir Ian Anderson í upptalningunni. Skammastu þín Jens.

[Stefán (IP-tala skráð) 16.9.2014 kl. 10:59]

Average White Band, Big Country, Ian Anderson, Aztec Camera, Primal Scream, Young bræður í AC/DC, Bon Scott ( AC/DC ), Bella & Sebastian, Jack Bruce, Lulu, Marmalade, Deacon Blue, Alex Harvay, The Jesus and Mary Chain, Loyd Cole, Simple Minds, Knopler bræður ( Dire Straits ), Annie Lennox, Gerry Rafferty, Stuart Sutcliffe ( Beatles ), John Martyn, Teenage Fanclup, Travis, Ultravox, The Proclaimers, The Waterboys, Wet Wet Wet.  

[Sigurður Pétur Jónsson (IP-tala skráð) 16.9.2014 kl. 12:28]

Og ekki gleyma Frankie Miller :-)

https://www.youtube.com/watch?v=OSQ6Vf8CIRc

[Ásthildur Cesil Þórðardóttir, 16.9.2014 kl. 12:38]

Það sem ég sé mest í þessu máli er vælið í englendingum, þeir hóta, múta og kalla til alla fræga og ríka til að reyna að telja skotum hughvarf. Hvað er það sem þeir óttast svona mikið ef skotar fá sjálfstæði.

Það er eitthvað sem þeir gefa ekki upp.

[Ómar Bjarki Kristjánsson, 16.9.2014 kl. 13:03]

Það væri óráðlegt af skotum að kjósa slit frá Bretlandi. Óráðlegt.

Það er ekkert þannig að allt myndi fara til andskotans hjá þeim - en mér finnst sláandi hve margir lausir endar eru á þessu hjá þeim. Þeir eiga eftir að hugsa þetta til enda.

Það er ljóst að margir virðast vera að styðja sjálfstæði bara útfrá óígrunduðum rökum ss. að vera á móti ,,elítunni" oþh.

Jafnframt finnst mér langt í frá að foringjar sjálfstæðissinna ss. Salmond sé sannfærandi pólitíkus.

Sjálfstæði eða slit frá Englandi gæti vel orðið skaðlegt fyrir skota til lengri tíma litið.

[Grrr (IP-tala skráð) 16.9.2014 kl. 19:51]

Ekki má gleyma viskíinu og lifrarpylsunni frá skotlandi.

[Jens Guð, 16.9.2014 kl. 22:13]

Axel Jóhann, ég tek undir það.

[Jens Guð, 16.9.2014 kl. 22:14]

Helga, Rod er af skoskum ættum. Og stoltur af upprunanum. Hann hefur átt það til að koma fram í skosku pilsi.

[Jens Guð, 16.9.2014 kl. 22:17]

Og þó að hann sé fæddur og uppalinn í London þá hefur hann verið duglegur við að þamba skoskt viský og náð góðri viskýrödd (með tilheyrandi hnútum á raddbönd).

[Jens Guð, 16.9.2014 kl. 22:17]

Wilhelm, einmitt.

[Jens Guð, 16.9.2014 kl. 22:21]

Jósef Smári, það er spurning hvað fara á langt með Skotann. IA fæddist í Skotlandi en var - að ég held - alinn upp í Englandi og hefur búið þar síðan. Að vísu var hann um tíma með laxeldi í Skotlandi. Þannig fékk hann einmitt áhuga á Íslandi: Að kynna sér laxeldi á Íslandi.

[Jens Guð, 16.9.2014 kl. 22:21]

Stefán, þetta er upptalningin endalausa. Ekki vissi ég að Stu hafi verið Skoti.

[Jens Guð, 16.9.2014 kl. 22:29]

Sigurður Pétur, einmitt. Wet, wet, wet náðu 1. sæti breska vinsældalistans með krákum (cover songs) af lögum eins og "With A Little Help From My Friend" (Bítlar) og "Love Is All Around" (The Troggs).

Til gamans: "With A Little Help From My Friend" var 2ja laga smáskífa með tveimur A-hliðum (engin B hlið). Hitt lagið var með írskættaða Billy Bragg. Eina lagið sem hann hefur átt í 1. sæti: http://www.youtube.com/watch?v=QERU68JLVEQ

[Jens Guð, 16.9.2014 kl. 22:33]

Ásthildur Cesil, ég hef fulla trú á því að Skotar séu betur settir utan breska sambandsríkisins en innan. Enskir stjórnmálamenn / ráðamenn hafa margir hverjir komið illa fram við Skota. Margrét Thatcher nánast lagði þá í einelti. Lokaði sjúkrahúsum þar og svo framvegis.

[Jens Guð, 16.9.2014 kl. 22:43]

Ómar Bjarki, ég veit það ekki. Sjálfstæðissinnar eru ekki allir samstíga í þeim skrefum sem þeir vilja taka. Margt er óljóst. Meirihlutinn vill áfram halda Bretadrottningu sem þjóðhöfðingja. Allt er óljóst varðandi gjaldmiðil. Sumir vilja halda í breska pundið. Aðrir vilja taka upp evru. Hitt er ljóst að Skotar hafa í langan tíma upplifað sig sem hornreku í breska sambandsríkinu. Í gegnum skatta og gjöld leggja þeir meira til sambandsríkisins en þeir fá til baka. Þar fyrir utan upplifa margir Skotar að Englendingar líti niður á þá. Skotabrandarar leika stórt hlutverk.

Margir Skotar vilja vera hluti af Norðurlöndunum. Það hugnast mér. Samskifti Færeyinga og Skota eru náin. Bæði í músík og á fleiri sviðum.

[Jens Guð, 16.9.2014 kl. 22:46]

Grrr, í fyrsta skipti (af mörgum) sem ég fór til Skotlands fyrir 30 árum tók ég bíl á leigu Gekk fyrst upp að pylsuvagni snemma morguns. Leist best á dökka pylsu í yfirstærð. Keypti hana ásamt meðlæti sem í boði var. Þegar á reyndi kom í ljós að pylsan var blóðmörskeppur. Ég hef oft síðan komið til Skotlands en aldrei aftur fengið mér þar blóðmörskepp.

[Jósef Smári Ásmundsson, 17.9.2014 kl. 06:06]

I.A fluttist til Blackburn 12 ára gamall . Samt Skoti. Ég er ennþá Fljótamaður.

[Jens Guð, 17.9.2014 kl. 23:16]

Jósef Smári, takk fyrir fróðleiksmolann. Ég fellst á að skilgreina IA sem Skota.

Eitt sinn þegar ég var í Skotlandi var í útvarpinu á hverju kvöldi þáttasería um sögu skoskrar tónlistar. Það var mjög gaman að hlusta á. Margir þekktir tónlistarmenn reyndust vera Skotar án þess að ég hafi vitað það áður.

Þátturinn rakti söguna í réttri tímaröð. Ég missti af fyrstu þáttunum. Mig minnir að röðin hafi verið komin að Nazareth þegar ég uppgötvaði þáttinn. Þannig að ég missti af því hvernig IA var afgreiddur.

Mér og eldri bróður mínum greinir á um það hvernig við skilgreinum okkur. Ég upplifi mig sem Skagfirðing þrátt fyrir að hafa flutt til Reykjavíkur sem unglingur - fyrir meira en fjórum áratugum.

Bróðir minn upplifir sig sem Reykvíking eftir að hafa flutt til Reykjavíkur um svipað leyti. Honum þykir fráleitt að teljast vera Skagfirðingur fyrir það eitt að hafa fæðst þar og slitið barnsskónum í Hjaltadal. Hann hefur aldrei verið í neinum samskiptum við Skagfirðinga í yfir fjóra áratugi. Þekkir þar næstum enga og fer aldrei í fjörðinn fagra.

Þetta er dálítið einstaklingsbundið.