"Fölsk" netárás á færeyska fréttasíðu og útafkeyrsla hryðjuverkamanna

  Átök á milli bandarísku hryðjuverkasamtakanna Sea Shepherd og Færeyinga fara harðnandi.  Hryðjuverkamennirnir beita öllum ráðum - flestum klaufalegum - til að hindra hvalveiðar Færeyinga.   Um helgina varð færeysk netsíða, portal.fo, fyrir árás. Hún var skotin niður og yfirtekin af SS-liðum er þóttust vera á vegum hóps aðgerðarsinna í netheimum sem kalla sig Anonymous.  

  Ég veit fátt um þann félagsskap.  Hinsvegar spratt fram hópur Færeyinga sem er mér fróðari um Anonymous.  Hann benti á sitthvað sem passaði ekki við að þarna væri Anonymous á ferð.  Þar á meðal orðfæri ólík því sem fólk þekkir frá Anonymous en einkennir málflutning SS og áróðursmyndefni þeirra.  Að auki búa liðsmenn Anonymous yfir mun meiri tölvufærni en þessir skemmdarverkamenn.

  Nú hafa Anonymous staðfest að hafa hvergi komið nærri.  Þau samtök taki frekar afstöðu með Færeyingum en SS, án þess að taka þátt í deilum þeirra.

  Hér er myndband sem tölvuþrjótar SS póstuðu undir fölsku nafni inn á færeyskan netmiðil.

  Þegar SS-liðar óku um færeyskar götur í fyrra vakti athygli hvað þeim gekk illa að halda sig á vegi.  Þeir góndu eftir hvölum.  Þess vegna óku þeir út af.  

  Sagan endurtekur sig í ár.  Þeir eru staðnir að því að keyra út af.  Sem er afar óvenjulegt í Færeyjum.  Þar keyrir enginn út af.  Nema SS-aularnir.

  Löggan hefur nú gefið SS-liðum fyrirmæli um að horfa á götuna en ekki skima eftir hval þegar þeir eru úti að aka.

 

Athugasemdir

[Kristján Gunnarsson (IP-tala skráð) 28.7.2015 kl. 17:52]

Jens, þú þarft að setja fattarann í gang, og gera þér grein fyrir að Sea Shepherd og Paul Watson eru víkingar okkar tíma. Menn og konur sem láta verkin tala, setja allt í sölurnar og víla ekki fyrir sér að storka örlögunum. Þetta eru sannir víkingar.

Ég virði mikið strandhögg þeirra í Reykjavíkurhöfn hér um árið þegar þeir opnuðu botnlokur hvalveiðidallanna. Það kalla ég dirfsku og þor. Þeir sýndu okkur Íslendingunum hvað það er að vera víkingur, nokkuð sem ekki hafði sést á Íslandi frá lokum Sturlungaaldar. Og ekki hefur bólað á aftur hér á Fóni síðan dallarnir sukku.

[Ásthildur Cesil Þórðardóttir, 28.7.2015 kl. 20:11]

Frábær færsla Jens og ekki taka marg á fólki sem ekki þekkir mun á réttu og röngu 

[Jens Guð, 28.7.2015 kl. 20:37]

Kristján,  alvöru víkingar veiða hvað, borða hvalkjöt og lúta ekki í gras fyrir gráguggnum grasætum.  

[Jens Guð, 28.7.2015 kl. 20:38]

Ásthildur Cesil,  takk fyrir það.