Breytir öllu í gull

  Fyrst var hann flautuleikari á Reyðarfirði.  Svo gítarleikari þungarokkshljómsveitarinnar Bisund(ar). Hún kom, sá og hreppti 2. sæti í Músíktilraunum 1999.  Bróðir hans,  Birkir Fjalar í Bisund,  var kosinn besti trommuleikari Músíktilrauna. Hann gerði síðar garðinn frægan með Stjörnukisa, Gleðisveitinni Döðlunum, I Adapt,  Hellvar(i) og Celestine.  

  Andri Freyr sló í gegn í útvarpsþættinum Karate á X-inu.  Hann trompaði það rækilega með þættinum "Freysa" á sömu stöð.  Það var svakalegur þáttur sem gekk út og suður yfir fínu línuna. Langt yfir. Var kærður þvers og kruss. Fékk á sig handrukkara,  vinslit og allskonar til viðbótar.  Hann lét allt vaða og fór yfir öll mörk.  

 Um svipað leyti var Andri Freyr gítarleikari Botnleðju.  Spilaði með þeirri hljómsveit út um allan heim,  meðal annars með Blur.  Hann var líka í hljómsveitinni frábæru Fidel.

  Mörgum kom á óvart þegar þessi hressi og kjaftfori þungarokkari var ráðinn sem morgunútvarpshani á Rás 2.  Það þótti djarft og bratt.  En morgunþáttur hans og Gunnu Dísar,  Virkir morgnar,  stal senunni.  Sá eða sú sem tók þá glannalegu ákvörðun að ráða þau í morgunþáttinn hitti beint í mark.

  Í framhjáhlaupi - eða kannski áður - man það ekki - fór hann á kostum með Ómari Ragnarssyni í dagskrárliðnum "Ómar og Andri á flandri" á Rás 2.  Líka kvöldþættinum "Litlu hafmeyjunni" með Dodda litla á Rás 2.  Þar talaði hann frá Danmörku. Síðar með vinsælum sjónvarpsþáttunum "Andri á flandri".  Þeir sjónvarpsþættir nutu mikilla vinsælda í norrænum sjónvarpsstöðvum.  Svo mjög að til að mynda í Noregi þá tæmdust götur á útsendingatíma þáttanna.  Snilldar þættir.

  Eðlilega hafa fjölmiðlafyrirtæki sótt í kappann og togast á um hann.  Framleiðslufyrirtækið Republik hefur nú ráðið hann sem yfirmann innlendrar dagskrárgerðar.  Spennandi verður að fylgjast með.  Allt sem hann snertir breytist í gull. 

    

Andri Freyr ráðinn til Republik

Athugasemdir

[Ásthildur Cesil Þórðardóttir, 17.8.2016 kl. 22:42]

Frábærir fróðleiksmolar.

[Mofi, 18.8.2016 kl. 18:20]

Góð grein Jens, mjög fróðlegt. Mér datt í hug þegar ég las þetta, er einhver séns að þú gætir vitað um flott íslenskt þungarokkslag sem er instrumental?  Mig minnar að ég átti það á spólu fyrir alveg 20 árum síðan en hef ekki grænan grun um hvað þetta gæti hafa verið, hvaða hljómsveit og hvað þá, hvaða lag. Einhverjar hugmyndir?

[Jens Guð, 18.8.2016 kl. 18:56]

Ásthildur Cesil, takk fyrir það. 

[Jens Guð, 18.8.2016 kl. 19:17]

Mofi,  nú stend ég á gati. Fyrir 20 árum voru mjög fáar íslenskar þungarokksplötur komnar út.  Eiginlega bara með Þrumuvagninum, Start(i) og Bootlegs. Spurning hvort að þetta sé lag með jaðarhljómsveit með þungarokkskeim án þess að vera eiginleg þungarokkshljómsveit. Ég man samt ekki eftir neinu "instrumental" lagi í deildinni.  Nema ef vera skyldi með Pelican eða Svanfríði.     

[Mofi, 18.8.2016 kl. 23:41]

Er séns að þú getir gert lista yfir nokkur íslensk instramental þungarokks lög sem gætu passað við þetta?  Kannski meira en 20 ár... Þetta er orðið svo langt síðan að ég er byrjaður að hugsa að kannski er þetta algjör ímyndun í mér.  

[Jens Guð, 20.8.2016 kl. 13:15]

Einu instrumental lögin sem ég man eftir og mögulega er hægt að kenna við hljómsveitir í námunda við þungarokk eru frá áttunda áratugnum:  "Á Sprengisandi" og "Litla flugan" með Pelican,  svo og "Finido" með Svanfríði, sem heyra má hér:

https://www.youtube.com/watch?v=-fQTsXCpGhk

[Jens Guð, 20.8.2016 kl. 21:04]

Sendu mér lýsingu á laginu: Er það gítarriff-frasi? Hljómborð? Fiðla?

[Mofi, 22.8.2016 kl. 23:32]

Þetta hérna er svipuð samsetning, rafmagnsgítar og trommur: https://www.youtube.com/watch?v=MYS1u0kmet8

Harðari trommur og beittari/sterkari gítar ef það meikar sens og melódían ekki þekkt lag heldur alveg þeirra; að ég minnsta kotsi þekkti ég hana ekki annars staðar frá.

[Jens Guð, 28.8.2016 kl. 20:16]

Mofi,  ég átta mig ekki á hvaða lag þetta er. Lýsingin gæti átt við færeyska Vikingband:  https://www.youtube.com/watch?v=eujKlVuf5ag

[Mofi, 29.8.2016 kl. 15:24]

Nei, ekki þetta heldur. Ef ég finn það þá sýni ég þér það. Ekki búast við neinu, tuttugu ár og ég er engu nær. Takk fyrir að reyna :)

[Ásthildur Cesil Þórðardóttir, 29.8.2016 kl. 19:49]

Stundum fannst mér Andri og Sóli fara yfir strikið þegar Gunna Dís var ekki með, en guð minn góður þau voru svo sannarlega með höfuð og herðar yfir væmnina og ófyndna þeirra sem við tóku, sem betur fer hætta þeir eftir þennan mánuð.  Hrein hörumung að hlusta á fólk sem er að reyna að vera fyndnir en eru það ekki, fyrir utan ambögurnar og tuðið.  Svo er spurning um hvað tekur við.