Afa- og ömmudagurinn

 Víða í hinum siðmenntaða heimi er afa- og ömmudagurinn haldinn hátíðlegur með lúðrablæstri og söng.  Gallinn er sá að dagsetningin er ekki samræmd á milli landa.  Sumstaðar er afadagurinn haldinn á einum degi en ömmudagurinn á einhverjum allt öðrum degi.  Annars staðar er þetta einn og sami dagurinn.  Það er heppilegra.  Þá er ekki verið að gera upp á milli - með tilheyrandi leiðindum.  Þetta á að vera skemmtilegt.

  Vestur-Íslendingar í Kanada halda upp á afa- og ömmudaginn (Grandparents' Day) með pomp og prakt annan sunnudag í september.  Aðrir Kanadabúar gera það einnig.  Þetta er formlegur opinber hátíðisdagur.

  Sunnar í Ameríku halda Kanar daginn hátíðlegan á næsta sunnudegi á eftir frídegi verkamanna.  Hann er fyrsta mánudag í september.  Fyrir bragðið lendir bandaríski afa- og ömmudagurinn á sömu dagsetningu og sá kanadíski.  Þannig var það til að mynda í gær.  

  Er ekki tilvalið að einhver íslenskur þingmaður taki upp á sína arma baráttu fyrir því að lögfesta í sessi afa- og ömmudaginn?  Sporna þannig gegn hraðri þróun í þá átt að gamla fólkið gleymist.  Ég legg til að við fylgjum dagsetningu Vestur-Íslendinga.  Það gera Eistar.

 

Athugasemdir

[Sigurður I B Guðmundsson, 12.9.2016 kl. 11:20]

Ekki spurning kýla á þetta!!

[Halldór D.Gunnarsson (IP-tala skráð) 12.9.2016 kl. 11:29]

Er ekki frídagur verslunarmanna fyrsti mánudagur í ágúst.

[Jens Guð, 12.9.2016 kl. 12:13]

Sigurður I B,  takk fyrir stuðninginn!

[Jens Guð, 12.9.2016 kl. 12:15]

Halldór,  jú,  en ég vísaði til frídags verkamanna í Bandaríkjunum.  Ekki verslunarmanna.  

[Halldór Egill Guðnason, 12.9.2016 kl. 19:59]

Snilldarhugmynd og löngu tímabær. Tek heilshugar undir þetta og styð af fullri hörku, ef á þarf að halda.

 Góðar stundir, með kveðju að sunnan.

[Anna Sigríður Guðmundsdóttir, 12.9.2016 kl. 23:16]

Já, víða í hinum siðmenntaða heimi er ýmislegt siðmenntað gert. Sem nær því miður ekki svo auðveldlega jákvæðum viðbrögðum, netheimanna jarðtengingu, né samþykki frímúraranna alsráðandi, dómarastýrandi, kúgandi, siðblindu og gamaldags hér á Íslandi. 

Þetta finnst mér góð hugmynd hjá þér Jens. Og kannski finnst mér það vegna þess að ég er sjálf frekar gamaldags kerling :) Er alls ekki viss um að mér hefði fundist þetta merkileg hugmynd þegar ég var á mínum vegvilluráfandi unglingsárum.

M.b.kv. 

[Jens Guð, 13.9.2016 kl. 08:22]

Halldór,  takk fyrir stuðninginn!

[Jens Guð, 13.9.2016 kl. 08:30]

Anna Sigríður,  þetta er kannski verkefni fyrir Gráa herinn fremur en ungliðahreyfingar stjórnmálaflokkanna?

[Ingibjörg (IP-tala skráð) 13.9.2016 kl. 21:01]

Sæll Jens. Hvernig er tékkað á því í Kanada að fólk sem tekur þátt í að "halda upp á þetta með pomp og prakt" sé nú örugglega afar og ömmur? Hvað ef barnlaust eldra fólk svindlar sér með?

[Jens Guð, 14.9.2016 kl. 05:57]

Ingibjörg,  oft fara hátíðarhöldin fram í heimahúsi þar sem stórfjölskyldan kemur saman og allir þekkjast.  En það eru líka skemmtanir,  svo sem í sunnudagaskólum og víðar,  þar sem börn syngja og/eða dansa á sviði fyrir gamla fólkið.  Ég hef ekki heyrt af neinum vandræðum varðandi þetta.  Ekki fremur en að hérlendis eru stundum foreldraskemmtanir í barnaskólum og barnahópar heimsækja elliheimili til að syngja fyrir vistmenn.