Enn bætir í eineltið

  Fyrir löngu síðan hóf ljúflingurinn Dóni Trump kosningabaráttu.  Hann dreymir um að verða forseti Bandaríkja Norður-Ameríku.  Það er fallegur ásetningur.  Verra er að frá fyrsta degi hefur vont fólk rekið í hann hrútshorn.  Menn dylgja,  menn bera hann út,  menn hæða hann.  Góðmennið sætir grófu einelti.

  Tónlistarmenn eru áberandi í ofsóknunum.  Þeir hafa betri tækifæri til að láta rödd sína heyrast en leikskólakennarar.  Ekki aðeins hafa þeir hljóðnema uppi á sviði heldur bergmála fjölmiðlar rödd þeirra út um allt.  

  Vinsælasta pönksveit heims, Green Day, var að hefja hljómleikaferð.  Á sviðinu gerði söngvarinn sér lítið fyrir og formælti Dóna.  Jafnframt snéri hann einum söngtexta yfir á hann.  Nokkrum dögum áður hallmælti Bruce Springsteen honum í spjalli við Rolling Stone tímaritið.  Söluhæsta tónlistarblað heims.  Kallaði hann fávita.  Honum er kennt um að hafa rekið í gjaldþrot náungann sem gaf Brúsa fyrsta gítarinn.  Áreiðanlega óhappaverk eða misskilningur.  Þannig er það með alla sem lenda í gjaldþroti eftir viðskipti við Dóna.      

  Meðal annarra sem sparka í prúðmennið eru Cher, Ellie Goulding, Madonna, Waka Flocka Flame, Shakira, Young Jeezy, Miley Cyrus, Young Thug, Moby, Morrissay, Henry Rollins, Angel Hazel, Roger Waters (Pink Floyd), Bono (U2), Wyclef (Fugees), Vivian Campbell (Def Leppard9, Corey Tailor (Slipknot), Ricky Martin, Demi Lovato, David Crospy, Father John Misty, hljómsveitin Wavves, Katy Perry og þúsund til viðbótar.   

  Fjöldi tónlistarmanna hefur meinað piltinum að spila tónlist þeirra á kosningafundum.  Má þar nefna Neil Young, Steven Tyler (Aerosmith), R.E.M., The Rolling Stones, Twisted Sister, Adele, Elton John, Luciano Pavarotti og eftirlifandi liðsmenn Queen.  Til viðbótar hefur tengdasonur Kára Stefánssonar bannað Dóna að nota tónlist föður síns, George Harrison.   

  Til að bæta gráu ofan á svart hefur frjálshyggjurokkarinn Mojo Nixon samið níðsöng um strákinn.  Það er eins og þetta lið sé að ganga af göflunum.

Hljóðnemi Trumps til vandræða

Athugasemdir

[Sigurður I B Guðmundsson, 1.10.2016 kl. 16:44]

Þú gætir nú boðið honum að nota "Þorraþrælinn" fyrir dágóða summu!!!

[Helgi Armannsson (IP-tala skráð) 2.10.2016 kl. 06:05]

ég sel þetta ekki dýrara en ég keypti það,en mer kæmi þetta ekkert a óvart

https://www.youtube.com/watch?v=fqFp_PKjKhA

[Matthías (IP-tala skráð) 2.10.2016 kl. 08:46]

Ted Nugent mun styðja hann ...

[Jens Guð, 2.10.2016 kl. 13:24]

Sigurður I B, góð hugmynd.  Hann borgar nefnilega helklings pening fyrir notkun á lögum.

[Jens Guð, 2.10.2016 kl. 13:29]

Helgi,  allskonar kosningasvindl er alvanalegt í Ameríku.  Spurningin er jafnan hversu stórtækt það verður hverju sinni.  

[Jens Guð, 2.10.2016 kl. 13:34]

Matthías,  um helmingur bandarískra kjósenda styður hann.  Þeirra á meðal ýmsir í skemmtiiðnaðinum og Ku Klux Klan.  Líka útlendingar á borð við Putin og Kim Jong-un.