Kona stal í búð

  Sá fáheyrði atburður átti sér stað í Þórshöfn,  höfuðborg Færeyja,  í fyrradag að kona stal í búð.  Þetta gerðist í sjoppu í miðbænum.  Afgreiðslumaður í búðinni sá út undan sér hvar konan tróð einhverju ofan í buxur sínar.  Síðan hvarf hún á braut eins og ekkert hefði í skorist.  Kvaddi ekki einu sinni.

  Afgreiðslumanninum var eðlilega illa brugðið.  Hann hringdi umsvifalaust í lögregluna og sagði tíðindin.  Í þessu 19 þúsund manna sveitarfélagi þekkja allflestir alla.  Kannski ekki endilega persónulega alla.  En vita deili á nánast öllum.  Líka lögregluþjónar.  Þeir eru meira að segja með símanúmer fingralöngu konunnar.

  Næsta skref er að öðru hvoru megin við helgina ætla þeir að hringja í konuna.  Ætla að freista þess að semja við hana um að skila þýfinu.  Ef hún fellst á það fæst góð lending í málið.  Þangað til harðneitar lögreglan að upplýsa fjölmiðla um það hverju konan stal.

  Elstu Færeyingar muna ekki til þess að þarlend kona hafi áður stolið úr búð.  Hinsvegar eru dæmi þess að Íslendingar hafi stolið úr búðum og bílum í Færeyjum.

  Meðfylgjandi myndband er ekki frá Færeyjum.

 

  

Athugasemdir

[Sigurður I B Guðmundsson, 3.3.2017 kl. 15:57]

Kannski var hún bara að girða sig í brók!!

[Guðmundur Bjarnason (IP-tala skráð) 3.3.2017 kl. 16:56]

Kæri J. Guð,

öll erum við fædd þannig að við lærum fljótt að bjarga okkur. Enga öfund !

[Jóhann Kristinsson, 3.3.2017 kl. 23:24]

Kanski að konan sé íslensk?

Kveðja frá Houston

[Stefán (IP-tala skráð) 4.3.2017 kl. 00:05]

Ætli hún reyni að panta samtal við hann Guðna okkar forseta ?  Nei, hún stal ekki nógu miklu til að reyna það og svo kann hún sig klárlega betur en íslenskar konur.

[Jóhann Kristinsson, 4.3.2017 kl. 00:31]

Guðni er og hefur verið fyrir peninga og háskóla elítuna, ef konan er íelituni þá fær hún áheyrn hjá Guðna annars ekki.

Kveðja frá Houston

[Ásthildur Cesil Þórðardóttir, 4.3.2017 kl. 10:30]

Ætla að hringja í hana öðru hvoru megin við helgina til að fá botn í máliðl  Þetta er einfaldlega dásamleg setning 

[Jens Guð, 6.3.2017 kl. 09:29]

Sigurður I B,  hún hefur sennilega gert það í leiðinni.

[Jens Guð, 6.3.2017 kl. 09:29]

Guðmundur,  neyðin kennir naktri konu að spinna.

[Jens Guð, 6.3.2017 kl. 09:30]

Jóhann,  það mætti halda það.

[Jens Guð, 6.3.2017 kl. 09:32]

Stefán,  ef hún verður dæmd - sem ég efast um - er líklegt að aðstandendur hennar klagi í Guðna.

[Jens Guð, 6.3.2017 kl. 09:37]

Jóhann (#5), kosningabarátta hans naut ríkulegra fjárframlaga frá elítunni.

[Jens Guð, 6.3.2017 kl. 09:40]

Ásthildur Cesil, Færeyingar eru aðdáunarlega slakir og lausir við stress og æsing.

[Ásthildur Cesil Þórðardóttir, 6.3.2017 kl. 09:54]

Greinilega, þessi flotta setning ber það með sér.