Færeyingar rúlla Dönum upp

 

  Á sama tíma og Íslendingar halda áfram að hasla sér völl í færeysku viðskiptalífi velta danskir fjölmiðlar fyrir sér hvers vegna færeysku tónlistarfólki gengur hlutfallslega vel á danska markaðnum.  Færeyingar eru rösklega 48 þúsund,  eða eins og lítið þorp,  í danska sambandsríkinu sem telur hátt í 6 milljónir manna. 

  Færeyska innrásin í Danmörku hófst í ársbyrjun 2002 er þungarokkshljómsveitin Týr sigraði í dönsku tónlistarkeppninni Melody Makers.  Týr náði bæði titlinum "Besta hljómsveitin" (valin af dómnefnd) og "Vinsælasta hljómsveitin" (valin af almenningi).  Í kjölfarið sló Týr í gegn hérlendis með laginu  Ormurinn langi.  Það er önnur saga.

  Sigur Týs í Melody Makers vakti mikla athygli og mikla umfjöllun í dönskum fjölmiðlum.  Augu Dana var beint að Færeyjum.  Það leiddi til þess að færeysku hljómsveitinni Clickhaze var boðið að spila á Hróarskeldu.  Þar heillaði hún danska gagnrýnendur upp úr skónum.  Margir þeirra sögðu hljómleika Clickhaze hafa verið toppinn á Hróarskeldu hátíðinni það sumarið.  Í Jyllands-Posten var frammistöðu Clickhaze lýst á þann hátt að söngkona hljómsveitarinnar,  Eivör,  hefði blásið Björk út í hafsauga.  Lesendur voru hvattir til að gleyma Björk.  Eivör væri framtíðin.  Eivör mótmælti þessari söguskoðun í öllum viðtölum þar sem þetta bar á góma. Sagðist vera aðdáandi Bjarkar og frábað sér að taka þátt í samanburði á sönghæfileikum þeirra.  Þegar ég var kynnir á hljómleikum Clickhaze á Grand Rock 2002 og vitnaði til þessara ummæla Jyllands-Posten hóf Eivör hljómleikana með þeim orðum að Björk sé frábær og ummæli JP algjörlega út í hött. 

  Síðar heillaði Evör Dani sem sólósöngkona.  Hún hefur fengið margar útnefningar og nokkur verðlaun í dönsku tónlistarverðlaununum.  Einnig tók stórsveit danska ríkisútvarpsins upp á því að útsetja lög Eivarar og flytja í útvarpinu.  Það starf þróaðist þannig að síðar söng Eivör lögin með hljómsveitinni inn á plötu.

  Teitur er annar færeyskur tónlistarmaður sem nýtur vinsælda og virðingar í Danmörku.  Hann hefur verið drjúgur við að fá tilnefningar og verðlaun í dönsku tónlistarverðlaununum. 

 

  Högni Lisberg er enn einn færeyski tónlistarmaðurinn sem hefur haslað sér völl í Danmörku,  spilað á Hróarskeldu og fleiri dönskum tónlistarhátíðum.

  Fyrir tveimur árum vakti pönkskotin færeysk popprokksveit,  The Dreams,  athygli í dönsku "Músíktilraunum".  The Dreams hafnaði í 2.  sæti og sló hressilega í gegn.  Enginn man lengur eftir hljómsveitinni sem sigraði en The Dreams hefur raðað lögum í 1. sæti danska vinsældalistans og sigrað í ótal vinsældakosningum.  The Dreams er ofur vinsæl í Danmörku. 

  Fyrir 2 árum eða svo kom færeyska söngkonan Guðrun Sölja,  sá og sigraði í söngvarakeppninni "Stjarna kvöldsins" í danska sjónvarpinu.  Í fyrra endurtók færeyska söngkonan Linda Andrews leikinn í danska X-factor.  Í ár er færeyska söngkonan Anna Nygaard á fljúgandi siglingu í danska X-factor og virðist sigurstrangleg.

  Þetta er ástæðan fyrir því að danskir fjölmiðlar spyrja sig hvernig á því standi að færeyskir tónlistarmenn séu svona sigurstranglir hvar sem til þeirra spyrst.  Danir vísa jafnframt til þess að færeyski söngvarinn Jógvan sigraði í íslensku X-factor og sé kominn í lokaúrslit í forkeppni Júrivisjón á Íslandi. 

  Hér fyrir neðan er forsíðufrétt í danska Berlingske Tidene af því að færeyska söngkonan Anna Nygaard meiddi sig á hökunni.  Hún missteig sig í stiga og féll við.

          

Hilda hf. eignast í Færeyjabanka

Athugasemdir

[Ari (IP-tala skráð) 31.1.2010 kl. 16:39]

Sigur Týs í Melody Makers vakti mikla athygli og mikla umfjöllun í dönskum fjölmiðlum.

Geturðu gefið krækju á þetta og fleira frá dönum?

 Annars var Guðríð Hansen rökkuð niður af Ædol dómurunum (Bubba og co .....eða var það X-factor?) á sínum tíma þegar hún tók þátt í því hér. Nokkrum árum seinna var hún mikið þekkt í Færeyjum sem trúbadúra og vann titilinn besta söngkonan þar http://planet.portal.fo/?lg=45598

[Haukur Kristinsson (IP-tala skráð) 31.1.2010 kl. 16:43]

Takk fyrir þetta Jens. Yndislegur söngur hjá Eivör.

[Jens Guð, 31.1.2010 kl. 16:56]

  Ari,  mér þykir líklegt að eitthvað megi finna um þetta á heimasíðu Týs.  Þegar Týr sigraði í keppninni barst rás 2 frétt af úrslitunum ásamt upptöku frá sigurkvöldinu þar sem Týr flutti  Orminn langa.  Sú var ástæðan fyrir því að Guðni Már Henningsson spilaði upptökuna í Popplandi á rás 2.  Lagið vakti svo mikla hrifningu hlustenda að símakerfi RÚV nánast sprakk.

  Kiddi kanína (Hljómalind) einhenti sér í að skipuleggja hljómleikaferð með Tý um Ísland.  Ég hjálpaði til.  Meðal annars við "plöggið".  Við fengum í hendur úrklippur úr dönskum prentmiðlum.  Ég hef ekki haldið þeim til haga.  Áreiðanlega er hægt að "gúgla" eitthvað af því upp - þó netið hafi ekki - fyrir þessum 8 árum - verið orðið það öfluga alnet sem það er í dag.

  Þátttaka Guðríðar Hansen í íslenskri söngvakeppni hefur alveg farið framhjá mér.  Eins og margt fleira sem snýr að þessum söngvakeppnum.  Hinsvegar veit ég að hún nýtur vinsælda í Færeyjum.  Takk fyrir hlekkinn.

[Jens Guð, 31.1.2010 kl. 17:00]

  Ég vil bæta því við að Guðríð Hansen hélt hljómleika á Kaffi Hressó í fyrravor (að mig minnir).  Ég komst ekki á þá hljómleika vegna þess að sama kvöld spilaði færeyska hljómsveitin Spælimeninir á Dubliners í Reykjavík.  Þar var ég að hjálpa til.  Hinsvegar frétti ég að góður rómur hafi verið gerður að flutningi Guðríðar á Hressó.

[Jens Guð, 31.1.2010 kl. 17:00]

  Haukur,  það er eins og öll lög verði yndisleg í flutningi Eivarar.

[Siggi Lee Lewis, 31.1.2010 kl. 19:32]

Ég hef bara einu sinni farið til Færeyja. Færeyjar eru mitt land, ásamt reyndar USA.

En ég get vel hugsað mér að búa í Færeyjum á gamals aldri, snargeðveikur, útúrdópaður og blindfullur.

[Jens Guð, 31.1.2010 kl. 20:56]

  Siggi Lee,  það hefur stundum hvarflað að mér að flytja til Færeyja.  Og ekki fráleitt að ég láti verða af því einn góðan veðurdag.  Það er gaman að fá sér í glas í Færeyjum.  Hinsvegar held ég að það sé erfitt að vera dópisti þar.  Færeyingar hafa sagt mér það.  Þeir Færeyingar sem sækja í dóp flytja til Danmerkur eða Íslands.

[Jens Guð, 31.1.2010 kl. 23:28]

  Ásamt dönskum fjölmiðlamönnum getum við enn frekar velt fyrir okkur hvers vegna færeyskir tónlistarmenn ná svona góðum árangri.  Ef við skoðum sölutölur yfir plötusölu á Íslandi í liðinni viku er Eivör með 4ðu söluhæstu plötuna,  Live.  Jógvan er með 5tu söluhæstu plötuna,  Vinalög.  Bloodgroup er með 12. söluhæstu plötuna,  Dry Land. 

  Plata Eivarar hefur verið ofarlega á íslenska vinsældalistanum í 10 vikur.  Plata Jógvans í 12 vikur.  Plata Bloodgroup í 7 vikur.  Þar fyrir utan hefur lag Bloodgroup,  My Army,  verið ofarlega á íslenska vinsældalistanum í 7 vikur.  Er nú í 9. sæti.

  Hér erum við bara að tala um vinsældalista dagsins í dag.  Á síðustu árum höfum við verið með margar aðrar færeyskar plötur og lög ofarlega á vinsældalistum.  2002 var  Ormurinn langi  vinsælasta lagið á Íslandi.  Svo voru það Brandur Enni,  Makrel,  pönksveitin 200,  Lena Andersen,  Högni Lisberg,  Teitur...

[Auðjón (IP-tala skráð) 11.2.2010 kl. 01:00]

Þú þarft að heyra nýja lagið með The Dreams, geðveikt. http://www.youtube.com/watch?v=dDnLICEx7h4&feature=related

[Jens Guð, 11.2.2010 kl. 13:15]

  Auðjón,  þeir eiga fína pönkspretti alltaf inn á milli.