Lulla frænka - II

  Um daginn kynnti ég til sögunnar á þessum vettvangi Lullu,  föðursystur mína.  Áður en lengra er haldið ráðlegg ég þér að fletta upp á þeirri færslu svo ég þurfi ekki að endurskrifa þá kynningu:  http://jensgud.blog.is/blog/jensgud/entry/1301441/

  Lulla átti það til að hafa allt á hornum sér gagnvart tilteknum manneskjum.  Það þurfti lítið sem ekkert til.  Þá málaði Lulla upp sterka og neikvæða mynd af viðkomandi og ýkti verulega allt sem að þeim snéri.  Þetta átti einungis við um fólk sem var Lullu alls óskylt og ótengt fjölskylduböndum. 

  Í gegnum svilkonu sína kynntist Lulla systrum sem bjuggu saman.  Lulla tók upp á því að heimsækja þær af og til.  Ekki mjög oft.  Kannski 3 - 4 sinnum á ári.  Systurnar voru afskaplega gestrisnar og lögðu á borð fyrir gesti veglega veislu.  Þær vissu að Lulla eldaði sjaldan eða aldrei heitan mat fyrir sig eina heima fyrir.  Þess vegna lögðu þær sig fram um að tína til og útbúa heitan mat handa Lullu - þrátt fyrir að hún kæmi ætíð í heimsókn utan matmálstíma.

  Eitt sinn kom Lulla í heimsókn til svilkonu sinnar.  Það var ólund í Lullu.  Hún hóf upptalningu á öllu því sem henni datt í hug systrunum til vansa.  Svilkonan brást til varnar og sagði hvasst:  "Að þú skulir leyfa þér að tala illa um systurnar.  Þær hafa aldrei sýnt þér annað en vinsemd.  Þú ert ekki fyrr komin inn úr dyrum hjá þeim en þær eru farnar að tína til allt það besta matarkyns sem þær eiga og útbúa veislumáltíð fyrir þig."

  Það hnussaði í Lullu af vandlætingu og hún sagði:  "Þær nota mig nú bara fyrir ruslafötu.  Henda í mig leifunum!"

  

Athugasemdir

[Hrúturinn (IP-tala skráð) 9.11.2013 kl. 22:56]

Hahahahaha....

[Jens Guð, 9.11.2013 kl. 23:52]

  Hrúturinn,  takk fyrir innlitið. 

[Siggi Lee Lewis, 10.11.2013 kl. 04:21]

Nú þyki ég nokkuð heimskur að eðlisfari. Ég varla næ meðalgreind. Ég náði ekki brandaranum. Hver var brandarinn?

[Siggi Lee Lewis, 10.11.2013 kl. 04:23]

Einhvern tíma heyrði ég annan brandara sem ég náði þó. Hann var þannig: "Strákur hét Leifur Arnar. Þegar mamma hans kom að sækja hann á leikskólan spurði hún um Leif Arnar. (leifarnar)

[Már Elíson, 10.11.2013 kl. 12:16]

Siggi Lee...(Vinsamlegast ekki koma óorði á Jerry Lee Lewis)...

Satt er það sem þú segir (#2)...en úr tók með kommentinu þínu síðara..(sjá #4).

Oft er betra að þegja og þykjast heimskur,

en tala, og taka af allan vafa.

Mundu þetta áður en þú færð tölvuna lánaða aftur...!

[Jens Guð, 10.11.2013 kl. 15:12]

  Ziggy Lee,  brandari á það sameiginlegt með froski að hann deyr við krufningu.

[Sigfús Sigurþórsson., 17.11.2013 kl. 14:01]

Haha, við lesum þessa færslu greinilega með misjöfnum hætti, mér finnst þetta vera bráðskemmtileg lýsing og saga um sérstaka kona, alsekki sem beinan brandara, þótt findin sé.