Hvað fór úrskeiðis?

  Í maí-byrjun hélt ég því fram á Fésbók að DOddsson væri á leið í forsetaframboð.  Skrif hans í Morgunblaðinu bentu sterklega til þess.

  8. maí tilkynnti hann um framboð sitt.  Þann dag skrifaði ég bloggfærslu og nefndi að hann ætti öruggt rauðvínsfylgi (12 - 18%).  Með aðstoð kvótakónga gæti talan hækkað. 

  11. maí skrifaði ég bloggfærslu undir fyrirsögninni "Hvenær hefst skítkastið?".  Þá voru fjórtán í framboði en framboðsfrestur ekki runninn út.  Ég spáði því að þriðjungur þeirra myndi helltast úr lestinni.  Sem varð raunin.

  Um þetta leyti mældist fylgi við Guðna Th. um 70% í skoðanakönnunum.  Ég sagði að það væri útilokað að sú yrði niðurstaðan á kjördegi.  30 - 40% yrði lokatalan.  Nú liggur fyrir að hann fékk 39,1%.

  Andri Snær var með um 10% fylgi.  Ég spáði því að eitthvað af fylgi Guðna myndi færast yfir til Andra Snæ en ekki DOddsson.  

  Á þessum tíma vissi ég ekkert um Höllu. Hún mældist með 2%.   

  Skekkjumörk í spám 11. maí lágu í því að kosningabarátta var ekki hafin.  Ekkert var vitað um það hvernig auglýsingaherferðum frambjóðenda yrði háttað.  Samt rættust mínar spár.

  29. maí mældist fylgi við DOddsson 22,2% í skoðanakönnunum.  Þá voru frambjóðendur kynntir í þættinum Eyjunni á Stöð 2.  Hann slátraði framboði sínu þar.  Ótrúlegt klúður.  Hann hafði alla möguleika á að koma fyrir sem landsföðurlegt sameiningartákn;  allt um vefjandi og faðmandi þjóðarleiðtogi allrar þjóðarinnar.  Þess í stað mætti hann með hrútshorn,  illgjarn í árásarham,  geðvondur,  úfinn, óskammfeilinn og án sómakenndrar.

  Sem þaulvanur og farsæll almannatengill skil ég hvorki upp né niður hvers vegna kallinn framdi þetta "hara kirí".  Það er útilokað að fagmaður í PR hafi ráðlagt honum.  Líklegast þykir mér að hann hafi sjálfur verið fastur í síðustu öld umkringdur já-bræðrum amatöra sem kunna ekkert á PR.   

  Ég spáði þegar í stað í bloggfærslu að fylgi við DOddsson myndi hrapa.  Það gekk eftir.  Fylgið hrundi niður í 19% næsta dag.  Það ennþá einkennilegra var að kauði lærði ekkert af klúðrinu.  Því fór sem fór.  Sannaðist þar máltækið að erfitt sé að kenna gömlum hundi að sitja.

  Halla kom afskaplega vel fyrir í sjónvarpsþættinum. Ég spáði henni í bloggfærslunni vaxandi fylgi.  Það gekk heldur betur eftir.    

  Það er grobb að hreykja sér af því að hafa lesið rétt í forsetakosningarnar alveg frá upphafi.  Allar spár gengið eftir.  Ég kann þetta.

  Hitt skilur eftir spurningar:  Tvær konur buðu sig fram að fyrirmælum Jahve, Drottins allsherjar.  Þær slógu Íslandsmet.  Aldrei áður í sögu Íslands hafa forsetaframbjóðendur fengið jafn fá atkvæði. Engir utan stórfjölskyldunnar kusu þær.  Var hann að grínast og hrekkja?  

  Ný spá: Á næstu dögum munum við sjá lúserana og fylgismenn þeirra kenna fjölmiðlum um hrakfarirnar.  Sannaðu til.    

  

Hildur með fæst atkvæði sögunnar

Athugasemdir

[Sigurður K Hjaltested (IP-tala skráð) 26.6.2016 kl. 18:41]

Já Jens, þú varst ansi glöggur með þínar spár.

Ég ætla að vona að Guðni, eftir þessa eldskírn að verða kosinn forseti,

verður maður að meiri og eigi eftir að koma okkur á virkilega á óvart.

Þarna fer í fyrsta sinn fjöldskyldumaður inná á Bessastaði, þá á ég við

með ungabörn, og kannski er það sem þurfti til þess að æska þessa lands

sjái von um það að það séu ekki alltaf gömlu kallarnir sem ráða.

Þekki manninn ekki neitt, nema úr fjölmiðlum, en hef trú á því að

hann eigi eftir að standa sig.

M.b.kv.

[Grrr (IP-tala skráð) 27.6.2016 kl. 08:09]

Guð virðist hafa munað eftir því að hvetja Hildi og Guðrúnu til þess að bjóða sig fram.

Hann virðist hafa alveg gleymt því að hvetja landann til þess að kjósa þær.

[Stefán (IP-tala skráð) 27.6.2016 kl. 08:15]

Ég óska þjóðinni til hamingju með nýjan förseta sem ég spái mikilli farsæld í starfi. Looserar kosninganna var klárlega náhyrðin að baki Dabba.

[Jens Guð, 27.6.2016 kl. 18:59]

Sigurður K,  ég tek undir hvert þitt orð. 

[Jens Guð, 27.6.2016 kl. 19:02]

Grrr,  það er eitthvað sem gengur ekki upp í þessu.  Einhver hefur ekki lesið rétt í sín tákn.  Eða jafnvel að lesið var í tákn sem ekki voru nein tákn.  

[Jens Guð, 27.6.2016 kl. 19:03]

Stefán,  mér heyrist sem þjóðin sé sátt við sinn nýja forseta.