Ný og spennandi plata frá Mosa frænda

  Á fögrum vordögum 2009 ýtti ég úr vör merkilegri skoðanakönnun - á þessum vettvangi - um bestu íslensku smáskífuna.  Vel, gegnsætt og lýðræðislega var að verki staðið.  Minn smekkur réði engu.  Lesendur fengu - undir nafni - alfarið að nefna til sögunnar sínar uppáhalds smáskífur.  Síðan var kosið á milli þeirra sem flestar tilnefningar fengu.

  Strax í forkönnuninni blasti við að "Katla kalda" með Mosa frænda var sigurstrangleg.  Svo fór að af nálægt 700 atkvæðum fékk hún tæpan þriðjung og sigraði með yfirburðum.  

  Fátt er betra á ferilsskrá hljómsveitar en eiga bestu íslensku smáskífuna.  Sú kom út á níunda áratugnum.  Seldist vel og fékk grimma spilun í útvarpi og á diskótekum.  Klassík alla tíð síðan.  

  Hljómsveitin Mosi frændi hefur aldrei (alveg) hætt fremur en Sham 69 og the Stranglers.  Ekki nóg með það:  Væntanleg er á markað ný plata.  Þar kemur ÞÚ til sögunnar.  Útgáfan er fjármögnuð í gegnum Karolina Fund.  Það má auðveldlega sannreyna með því að smella HÉR.

  Wikipedia

        

Athugasemdir

[Sigurður I B Guðmundsson, 2.8.2017 kl. 18:40]

Síðast smáskífan sem ég keypti var: Roof Tops (EMI) Hlið 1: Söknuður og Það fer ekki eftir því. Hlið 2: Fólk á flótta og Sjúklegur draumur um lasið blóm. Held að fátt toppi þetta!!

[Stefán (IP-tala skráð) 2.8.2017 kl. 22:55]

Vesturbæjarhljómsveitin Roof Tops var alveg hreint mögnuð hljómsveit og í fararbroddi með kolsvarta soulmúsík á Íslandi. Ari Jóns söng og öskraði við trommusettið og Guðni Páls lék jafnvel á tvo saxa í einu. 

[Jens Guð, 3.8.2017 kl. 16:52]

Sigurður I B, þú hefur klárlega gott minni.  Skífuna hefur þú væntanlega keypt nálægt hálfri öld.  Ekki hef ég grænan grun um það hver var fyrsta eða síðasta smáskífa sem ég keypti.  Þó var síðasta smáskífan áreiðanlega keypt á níunda áratugnum.

[Jens Guð, 3.8.2017 kl. 16:54]

Stefán,  það er margt gott með Roof Tops.