Stónsari með móral yfir að hafa svindlað

 

 

  Hljótt fór að fyrir síðustu áramót boðaði gítarleikari the Rolling Stones,  Keith Richards,  söngkonuna Marianne Fathful á sinn fund í París.  Ég veit ekki af hverju í París.  Kannski er annaðhvort þeirra búsett í Frakklandi.  Eða kannski bæði. 

  Á fundinum játaði Keith fyrir henni að hann væri með bullandi móral yfir að hafa hlunnfarið hana um höfundarlaun fyrir lögin "Symphaty for the Devil",  "You Can´t Always Get What You Want" og "Sister Morphine".  Allt lög sem náðu miklum vinsældum í flutningi the Rolling Stones og haún átti stóran hlut í að semja með þeim Keith og Mick Jagger.

  Á þessum tíma sem lögin komu út á plötum var Marianne kærasta söngvara the Rolling Stones,  Mikka Jaggers.  Hún var jafnframt hálf út úr heimi vegna gríðarlegrar eiturlyfjaneyslu.  Fjölskylda hennar var og er vellauðug.  Marianne hefur aldrei þurft að pæla í peningum.  Réttskráð lög hennar og plötur hafa selst í bílförmum og skilað henni góðum tekjum.   

  Keith gerði sér þó lítið fyrir og endurgreiddi Marianne þau höfundarlaun sem hún hafði orðið af vegna þess að vera ekki réttilega skráð meðhöfundur áðurnefndra laga.  Jafnframt lét hann leiðrétta höfundarskráningu á þessum lögum.

  Marianne og Keith hafa alltaf talað hlýlega um hvort annað en ekki verið í miklu sambandi eftir að upp úr sambandi hennar og Jaggers slitnaði.  Klárlega hefur Keith fengið samþykki Jaggers fyrir því að leiðrétta höfundarlaun hennar.  Mick passar alltaf vel um sín fjármál.

      

Athugasemdir

[Stefán (IP-tala skráð) 10.6.2018 kl. 22:13]

Lagið Sister Morphine kom fyrst út sem B hlið á smáskífu með Marianne Feithful árið 1969, tveimur árum áður en það kom út á plötu með Rolling Stones. Þar er MF skráð sem meðhöfundur.

[Wilhelm Emilsson, 11.6.2018 kl. 00:32]

Samdi ekki Yoko Ono öll þessi lög? :)

[Stefán (IP-tala skráð) 11.6.2018 kl. 07:34]

Ja, Yoko samdi allavega lagið Imagine með John og á víst hugmyndina að textanum. En hvað ætli Mick og Keith muni svo sem frá þessum árum ? 

[Sigurður I B Guðmundsson, 11.6.2018 kl. 08:24]

Fór á tónleika með CCR BANDINU í leikhúsi Mosfellsbæjar og þar var enginn mórall, bara gleði!!

[Jens Guð, 11.6.2018 kl. 19:16]

Stefán (#1),  Lagið var réttskráð á smáskífum Marianne og the Rolling Stones í Bretlandi.  Í Bandaríkjunum var Marianne ekki skráð meðhöfundur á Stónsskífunni.  Ekki heldur á heimsmarkaði á plötunni "Sticky Fingers".  Ekki fyrr en platan var endurútgefin næstum aldarfjórðungi síðar.

[Jens Guð, 11.6.2018 kl. 19:17]

Wilhelm,  eflaust hefur hún samið flest þeirra.

[Jens Guð, 11.6.2018 kl. 19:23]

Stefán (#3),  ef ég man rétt þá gerði Jagger útgáfusamning við bókaforlag um að skrifa ævisögu sína.  Þegar á reyndi var fortíðin í þoku; minnið ekki nógu gott til að standa við samninginn.  Keith virðist hinsvegar vera með gott minni,  samanber bráðskemmtilega ævisögu hans og blaðaviðtöl. 

[Jens Guð, 11.6.2018 kl. 19:26]

Sigurður I B,  hafa þó tilteknir liðsmenn CCR farið í gegnum málaferli.  Bæði við hvern annan og einig var John Fogerty kærður fyrir að stela lagi frá sjálfum sér!

[Wilhelm Emilsson, 12.6.2018 kl. 01:58]

Ég man eftir þessu með Jagger. Hann mundi ósköp lítið og vildi fá ýtarlegar dagbækur Bills Wymans til að hressa upp á minnið. Wyman sagði nei, enda var að skrifa eigin ævisögu. Þegar Jagger er spurður um eitthvað pínlegt úr fortíðinni svarar hann oft, "That was á long time ago." Ég nota þetta núna stundum :)

[Jens Guð, 12.6.2018 kl. 18:23]

Wilhelm,  enda eru viðtöl við Keith alltaf miklu skemmtilegri en viðtöl við Jagger.  Til gamans:  Jagger kom mörgum í opna skjöldu í fyrra.  Hann er þekktur fyrir að halda fast um peningaveski sitt.  Er af mörgum skilgreindur nískur.  Yngri bróðir hans varð sjötugur.  Sá hefur átt pínlega rýran tónlistarferil.  Mick gaf honum í afmælisgjöf heljarinnar partý.  Tók skemmtistað og hótel á leigu.  Eða kannski var skemmtistaðurinn í hótelinu.  Hvergi var skorið við nögl í veitingum og gestum bauðst að gista á hótelinu um nóttina.  Þetta þótti mörgum hans nánustu vera ný og óvænt hlið á Mick. 

[Wilhelm Emilsson, 12.6.2018 kl. 19:52]

Já, þarna sýnir Jagger á sér nýja hlið 

[Jens Guð, 16.6.2018 kl. 03:58]

Kallinn er hálf áttræður.  Hann er kannski að átta sig á að stutt sé í að kveikt verði á lendingarljósunum.  Jafnframt að átta sig á að hann taki ekki auðæfin með sér yfir móðuna miklu.  

[Wilhelm Emilsson, 19.6.2018 kl. 07:34]

Mikið til í þessu. Eins og hann söng um árið: "Time waits for no one."