Smásaga um kærustupar

  Unga kærustuparið gat ekki verið ástfangnara og hamingjusamara.  Það var nýflutt inn í litla leiguíbúð.  Sambúðin var ævintýri upp á hvern dag.  Í innkaupaferð í matvöruverslun rákust þau á gamla skólasystur konunnar.  Þær þekktust samt aldrei mikið.  Skólasystirin fagnaði þó samfundinum eins og þær hafi alla tíð verið æskuvinkonur.  Knúsaði konuna í bak og fyrir.  Spurði frétta og sagði frá sjálfri sér.  Hún flutti til Frakklands en var þarna stödd á Íslandi í örfáa daga.  Vandamálið var að hún hafði ekki áttað sig á hvað gistimarkaðurinn á Íslandi er verðbólginn.   Kostnaðurinn var að slátra fjárhag hennar.   

  "Er smuga að ég fái að gista hjá ykkur í örfáa daga?" spurði hún.  "Þess vegna í svefnpoka á eldhúsgólfinu eða eitthvað?   Það myndi gjörsamlega bjarga fjárhagnum." 

  Unga parið var tvístígandi.  Konan spurði kærastann hvort hann myndi sætta sig við að hún gisti í stofusófanum í nokkra daga.  Hann sagði að það muni ekki "bögga" sig.  Eflaust yrði gaman fyrir þær dömurnar að rifja upp gamla skóladaga.

  Nokkrum dögum síðar fékk kærastan slæmt kvef.  Hún hóstaði heilu og hálfu næturnar.  Kallinn missti svefn og varð eins og uppvakningur í vinnunni.  Á þriðja degi sagði hann við kærustuna:  "Ég get ekki verið svefnlaus í marga daga til viðbótar.  Ég neyðist til að biðja þig um að sofa í stofunni þangað til kvefið er gengið yfir."

  Hún hafði fullan skilning á því.  Vandamálið var hinsvegar að stofusófinn var eiginlega of lítill fyrir skólasysturnar að deila honum.  Um morguninn tilkynnir skólasystirin að hóstinn hafi haldið fyrir henni vöku.  "Ég verð að fá að sofa í svefnherberginu,"  sagði hún.  "Hjónarúmið er alveg nógu breitt til að deila því með kærastanum þínum án vandræða."

  Þetta var samþykkt.  Hóstinn varð þrálátur.  Um síðir hjaðnaði hann.  Kærastan vildi eðlilega endurheimta sitt pláss í hjónarúminu.  Skólasystirin hafnaði því.  Sagðist vera ólétt.  Barnið væri getið í þessu rúmi.  Foreldrarnir væru sammála um að ala það upp í sameiningu sem par.    

  Kærustunni var brugðið við að vera óvænt x-kærasta (fyrrverandi).  Hún lét þó ekki á neinu bera.  Sagði:  "Ég styð það." 

  Skólasystirin varð hægt og bítandi stjórnsöm.  Hún fór að gefa x-inu fyrirmæli:  Það þurfi að strjúka af gólfunum;  nú þurfi að þurrka af.  X-ið sá um eldamennsku eins og áður.  Um helgar fékk hún fyrirmæli um bakstur:  Pönnukökur, vöfflur, ástarpunga og svo framvegis.

  Ef gest bar að garði fékk hún fyrirmæli:  "Skottastu út í búð eftir gosi og kökum."  

  Þegar barnið fæddist fékk hún nóg að gera:  Bleyjuskipti,  böðun,  út að ganga með barnavagninn.  Allan tímann vann hún sem kassadama í matvöruverslun.  Fjármál heimilisins voru sameiginleg.  Heimilisfaðirinn var með ágætar tekjur sem starfsmaður í álverinu í Straumsvik.  Skólasystirin vann aldrei úti.  Eiginlega ekki inni heldur ef frá er talið að hún var dugleg við að vakta sjónvarpið.   Hún fékk einn daginn hugmynd um að heimilið vantaði meiri innkomu.  Þá skráði hún x-ið í útburð á dagblöðum á morgnana.  Benti á að það væri holl og góð hreyfing sem bónus ofan á launin.  Sem er alveg rétt.  

          

Athugasemdir

[Sigurður I B Guðmundsson, 25.7.2019 kl. 00:00]

Verða nútíma börnin svona til eins og sést á myndinni!!?!!

[Jón Valur Jensson, 25.7.2019 kl. 06:00]

Ég er sammála Sigurði, Jens. Nógu svöl er sagan, en myndin óviðeigandi.

[Barði Ólafson (IP-tala skráð) 25.7.2019 kl. 13:46]

Þetta er samlíking sem Jens Guð setur fram á snilldar máta.

Ef filterað er út úr sögunni ýmislegt svo sem íbúðin, gisti vandræði skólasysturinnar, kvef kærustunnar o.fl., þá er þetta dæmasaga um Orkupakka 3, það er að segja , hvernig EES/ESB vinnur. Skólasystirin yfirtekur í litlum skrefum „sjálfstæði“ heimilis unga parsins með lævísum yfirgangi með samþykki/eftirgjöf unga kærustuparsins.

[Þorsteinn Siglaugsson, 25.7.2019 kl. 18:07]

Já, þetta er auðvitað dæmisaga um hvað annað en gamla góða orkupakkann, esb, gyðinga, frímúrara og alla hina vondu. Að sjálfsögðu.

[Sigurður Bjarklind (IP-tala skráð) 25.7.2019 kl. 18:38]

Einfalt mál. X-ið er lufsa, gaurinn er auli og skólasystir er femínisti. Svo hjálpi mér guð.

[Jóhann Elíasson, 25.7.2019 kl. 21:23]

Þessi saga er DÆMIGERÐ fyrir vinnubrögð ESB og hvernig EES samningurinn er "notaður" sem "þumalskrúfa" á aðildarríki EES samningsins.  Sigurður Bjarklind lýsir þessu ágætlega....

[Jens Guð, 26.7.2019 kl. 14:12]

Sigurður I B,  vesturlandabúar eru óðum að glutra niður þekkingu á því hvernig búa á til börnTalan er komin niður í 1,7 barn á par.  Nema í Færeyjum.  Þar er talan 2,5 börn.

[Jens Guð, 26.7.2019 kl. 14:17]

Jón Valur,  takk fyrir ábendinguna.  Í fljótfærni skoðaði ég myndina ekki almennilega.  Sá bara karl og tvær konur á þessari litlu mynd.  Takk fyrir góða umsögn um söguna.

[Jens Guð, 26.7.2019 kl. 14:17]

Barði,  bestu þakkir fyrir túlkunina.

[Jens Guð, 26.7.2019 kl. 14:18]

Þorsteinn,  að sjálfsögðu!

[Jens Guð, 26.7.2019 kl. 14:20]

Sigurður Bjarklind,  þú lest rétt í þetta! 

[Jens Guð, 26.7.2019 kl. 14:20]

Jóhann,  ég tek undir það.

[Jósef Smári Ásmundsson (IP-tala skráð) 26.7.2019 kl. 17:13]

Ekki vera að blanda helvítis pólitíkinni inn í þetta mál drengir. Þetta er bara einfalt "Trilogy". Ef að pólitikinni er bætt við eru þið búin að eyðileggja þennan ástarþríhyrning og búa til kvartett úr honum. Skammisti ykkar.

[Jens Guð, 26.7.2019 kl. 20:15]

Jósef Smári,  það er margt til í þessu.