Smásaga um búð

  Það er rólegt í litlu hverfisbúðinni á horninu.  Aðeins einn viðskiptavinur er þar innandyra.  Það er öldruð kona.  Hún kaupir eldspýtustokk.  Hún stendur fyrir framan afgreiðsluborðið og telur peninga upp úr snjáðri peningabuddu.  Það gengur brösuglega.  Hún á erfitt með að greina á milli krónupenings,  fimmkalls og tíkalls.

  Afgreiðslumaðurinn leyfir henni að taka sér þann tíma sem þarf.  Ekkert liggur á.  Þau eru á svipuðum aldri og hafa átt í viðskiptum til áratuga.  

  Seint og síðarmeira tekst konunni að smala saman réttri upphæð.  Er hún gengur út um dyrnar mætir hún ókunnugum manni.  Hann er illa áttaður.  Það er eins og hann viti ekki hvort hann er að koma eða fara.  Hann gónir hikandi í allar áttir.  Konan slær hann af öllu afli í andlitið með töskunni sinni.  Svo heldur hún heim á leið.  Það er eins og brái af karlinum.  Hann þurfti á högginu að halda til að ná áttum.  Samt er hann hikandi er hann læðist inn í búðina.  Þar gengur hann ringlaður um og veit varla hvað hann er að gera.

  Afgreiðslumaðurinn þreifar eftir hornaboltakylfu undir afgreiðsluborðinu.  Hann gælir við þá hugmynd að lúberja komumann og ræna hann - ef svo vel vildi til að hann væri með verðmæti á sér.  Með herkjum nær hann að stoppa sig og bryddar þess í stað upp á samræðum.  

  - Góðan dag.  Get ég aðstoðað þig?

  - Nei,  ég veit það ekki.  

  - Hver veit það þá?  Jólasveinninn kannski?

  - Mér finnst eins og ég eigi ekki að vera hér.

  - Það finnst mér líka.  En af hverju ertu þá hérna?

  - Ég var á leið í aðra smásögu en þessa og villtist af leið.  Svo var ég allt í einu kominn í þessa sögu.

  - Ég get reddað þér út úr þessari sögu ef þú vilt.  Ég er höfundur hennar og ræð hvernig hún er.

  - Ég vil gjarnan komast út úr þessari sögu.  En hvernig kemst ég í réttu söguna?

  - Það er þitt vandamál en ekki mitt.  Hinsvegar skal ég gefa þér mandarínu í nesti.  Um leið óska ég þér gleðilegra jóla, gott og farsælt komandi ár, þökkum liðið, fjölskyldan í Litla-Koti.  Þar með ert þú úr sögunni.  

 

 

        

Athugasemdir

[Sigurður I B Guðmundsson, 18.12.2020 kl. 00:15]

Var einmitt að semja jólasögu þegar einhver ráfandi og ruglaður karl kom allt í einu inn í hana (söguna mína) og nú losna ég ekki við hann en mandarínan var góð!!

[sigurður bjarklind (IP-tala skráð) 18.12.2020 kl. 08:01]

Heyrðu nafni. Þú áttir ekki þessa mandarínu. Ruglaði karlinn átti að fá hana og nú situr þú uppi með hann yfir jólin.

[Sigurður I B Guðmundsson, 18.12.2020 kl. 08:43]

Held að þetta sé klementína en ekki mandarína sem ég sit upp með!!

[Jens Guð, 18.12.2020 kl. 10:44]

Sigurður I B (# 1), mandarínur eru alltaf góðar.

[Jens Guð, 18.12.2020 kl. 10:45]

Sigurður Bjarklind,  takk fyrir innlitið.

[Jens Guð, 18.12.2020 kl. 10:47]

Sigurður I B (# 3),  munurinn er sá að klementínur eru steinlausar.

[Loncexter, 18.12.2020 kl. 21:26]

Ég komst ekki inn í útvarp sögu. Hvað gera bændur þá ?

[Jens Guð, 18.12.2020 kl. 22:22]

Loncexter, bændur bíða þá í rólegheitum eftir öskudeginum.

[Stefan (IP-tala skráð) 19.12.2020 kl. 06:24]

Loncexter, mikið varstu heppinn.

[Jens Guð, 19.12.2020 kl. 20:26]

Stefán,  .það er margt gott og fróðlegt á Útvarpi Sögu. 

[Stefán (IP-tala skráð) 20.12.2020 kl. 17:24]

Svo lenti Svandís Svavarsdóttir greinilega líka í rangri sögu og er alveg ringluð í sínu ráðuneyti. Langar biðraðir í allskonar aðgerðir og allt of lítið bóluefni keypt. Það verður að koma henni út úr þessari sögu sem fyrst og inn í Lísu í Undralandi eða eitthvað ... 

[Jens Guð, 20.12.2020 kl. 17:51]

Stefán, hún hefur lent í I Am The Walrus,  eins og gengur í þessu embætti.  https://youtu.be/t1Jm5epJr10

[Stefan (IP-tala skráð) 20.12.2020 kl. 22:11]

Og ef Þorolfur vill halda sig i rettri sogu, þa a hann þegar i stað að fara frsm a algjors lokun landamæra a Bretland.

[Jens Guð, 20.12.2020 kl. 22:33]

Stefán (# 13),  ég er sammála því.  Opna þess í stað til Grænlands.  Þar er enginn með covid.  Um tíma var reyndar einn í Aasiaat og annar í Kangerlussuaq.  Það er liðin tíð.  Ég held að sá síðarnefndi hafi verið Kani.