Barn

  Ég átti leið um Selfoss.  Kíkti þar á héraðsblað sem heitir Dagskráin.  Þar sagði ónefndur frá því að eldra barn sitt upplýsti yngra barn um að bankinn ætti hús fjölskyldunnar á móti heimilisfólkinu.  Yngra barnið spurði þá:  "Hvar á bankastjórinn að sofa hjá okkur?"  Taldi sjálfsagt að bankastjórinn sem eignaraðili að húsinu ætti rétt á að fá herbergi í húsinu.

  Þetta rifjar upp skemmtilega sögu frá því er ég kenndi skrautskrift Höfn í Hornafirði fyrir nokkrum árum.  Kona á námskeiðinu var ólétt.  Barnung dóttir hennar spurði ömmu sína:  "Ert þú líka með barn í maganum eins og mamma?"

Amman svaraði:  "Nei,  ég er búin að eignast öll mín börn."

Barnið varð hissa og sagði:  "Átt þú börn?  Ég hef aldrei séð þau."

Amman: "Jú,  Siggi frændi þinn er barnið mitt.  Líka Jóna frænka þín og pabbi þinn.  Hann er barnið mitt."

Krakkinn varð eitt spurningarmerki en sagði loks:  "Ha?  Er pabbi barnið þitt?"

Amman:  "Já, hann er barnið mitt."

Krakkinn - eftir langa umhugsun:  "En ef að pabbi er barnið þitt,  hvað er hann þá alltaf að gera heima hjá mér og mömmu?"

 

Athugasemdir

[Sigfús Sigurþórsson., 5.3.2007 kl. 03:21]

Hahahaha, hvað erpabbi að gera hjá mér og mömmu.

Kv. SigfúsSig. 

[Ásthildur Cesil Þórðardóttir, 5.3.2007 kl. 09:36]

Algjörlega rökrænt svar frá sjónarhóli barnsins hehehe..... Góður. 

[Jón Steinar Ragnarsson, 5.3.2007 kl. 11:12]

Samkvæmt þessu gæti bankastjórinn verið með allan sinn frændgarð hjá mér og leyft mér að gista í skápnum undir stiganum eins og Harry greyið Potter.

Krúttleg saga.