Langt yfir skammt

  Á hverjum virkum morgni,  rétt upp úr miðnætti,  vakna nokkrir sprækir Hvolsvellingar.  Þeir einhenda sér í að hakka kjöt til að hræra í kjötbollur,  skera niður lauk og steikja,  sjóða kartöflur og skræla,  laga piparsósu,  skera niður hrásalat,  spæla egg og sjóða naglasúpu.  Klukkan 3 er maturinn tilbúinn.  Hann er settur í stór ílát og borinn út í sendibíl.  Síðan er ekið í vesturátt.  Framhjá Hellu, Selfossi og Hveragerði,  yfir Hellisheiði í átt að Reykjavík.  Skörp beygja er tekin inn á Vesturlandsveg,  ekið í gegnum Mosfellsbæ,  framhjá Kjalarnesi, í gegnum Hvalfjarðargöng og haldið sem leið liggur norður í land;  í gegnum Borgarnes og yfir Holtavörðuheiði.  Oft þarf að moka snjó á heiðinni og setja keðjur undir bílinn.  Ekið er framhjá Brú og Staðarskála,  Laugabakka og í gegnum Blönduós.  Í Varmahlíð er gott að fá sér kaffi og bæta bensíni á bílinn.  Svo er haldið yfir Laxárdalsheiði.  Þegar nálgast Akureyri er tekin óvænt vinstribeygja og brunað í grunnskóla Dalvíkurbyggðar.  Þá er klukkan 11. 

  Þegar þangað er komið er maturinn orðinn kaldur og þurr.  Honum er þess vegna skellt í potta og á pönnur á ný.  Síðan er kallað á krakkana í mat.  Þeir eru heldur betur ánægðir með að fá langkeyrðan mat. 

  Eftir matinn er vaskað upp og þurrkað af borðum.  Svo er keyrt aftur suður til Hvolsvallar næstu 8 tímana.  Klukkan 9 um kvöldið komast Vellingar í háttinn.  Sælir og glaðir eftir góðan vinnudag.  Og reyna að sofa vel næstu 3 - 4 tímana þangað til nýr vinnudagur hefst.  Frekar stuttur svefntími.  Þeir sofa út um helgar í staðinn.

  Hvers vegna sjá Hvolsvellingar um máltíðir dalvískra barna,  hinumegin á landinu?  Vegna þess að Dalvíkingar sjálfir hafa annað og betra við tímann að gera.  Þar fyrir utan er sport að borða sunnlenskt kjöt og grænmeti í hádeginu en norðlenskt á kvöldin og um helgar.  

  Næsta vetur ætlar Dalvíkurskóli að kaupa matinn frá Frakklandi.  Þá verður alvöru stæll á liðinu.

Athugasemdir

[Jón Steinar Ragnarsson, 6.3.2007 kl. 00:48]

Þetta er mikill kjötfarsi. Aumingja börnin fá upphitaðan hvolsvelling í öll má.  Í alvöru talað....ma..ma...maður á ekki taut til!

[Stefán (IP-tala skráð) 6.3.2007 kl. 09:27]

Þetta er með eindæmum hallærislegt og raunar  til skammar fyrir bæjarstjórn Dalvíkurbyggðar. Maður vorkennir blessuðum börnunum.

Stefán

[Guðmundur (IP-tala skráð) 6.3.2007 kl. 10:52]

Ég reyni nú sjálfur að nýta alla afganga ef til falla einhverjir og hita þá aftur upp - en ekki myndi ég bjóða börnunum mínum dagsdaglega upp á upphitaðan mat, jukk. Enda skilst mér að þeim fækki óðum á Dalvík sem bjóða börnunum upp á þennan Bastillukost.

[Tommi (IP-tala skráð) 6.3.2007 kl. 13:11]

Já þetta þykir mikið sport á Dalvík, Nú fynnst  þeim  þau fyrst orðin svo menningarleg að ákveðið hefur verið að byggja menningarhús í allri gleðinnni á Dallas.  En annars þá er allt brjálað út af þessu og margir krakkar neita orðið að borða þessa "framandi" rétti...