Spennandi sjónvarpsþáttur

  Sjónvarpið hefur tekið til sýningar finnska heimildarmynd í 25 þáttum,  Pohjantähden alla:  Viimeinen tupakka.  Í henni er fylgst með hálffimmtugum manni í nokkra daga eftir að hann hættir að reykja.

  Ég minnist ekki að jafn spennandi sjónvarpsefni hafi verið borið á borð áður.  Það liggur við að ég kaupi mér sjónvarp til að geta fylgst með þessum þáttum.   

  Sjálfur hef ég oft byrjað að reykja.  Einkum þegar ég er í heilsuátaki.  Þá set ég lungun í leikfimi með því að reykja dálítið.  Það er verst hvað það er óþægilegt að reykja.  Hálsinn verður þurr.  Reykurinn ertir augun.  Sígarettubragðið er rammt og vont.  En maður lætur sig hafa þetta fyrir heilsuna.  Það er miklu verra og erfiðara að byrja að reykja en hætta því.  Ég er í raun ætíð mjög glaður,  feginn og þakklátur sjálfum mér þegar heilsuátaki lýkur og ég hætti að reykja.  Það er auðveldara en að drekka kók.

  Hinsvegar öfunda ég alltaf reykingafólkið á skrautskriftarnámskeiðunum hjá mér.  Í hverjum frímínútum brýst það út í öllu veðri.  Þó að það sé stórhríð og norðangaddur þá stendur það úti í kófinu og reykir.  10 mínútum síðar kemur það aftur inn í tíma og geislar af heilbrigði:  Rjótt í kinnum,  útitekið og angar af fersku útilofti. 

Athugasemdir

[Guðríður Hrefna Haraldsdóttir, 27.3.2007 kl. 22:45]

Vá, ég verð að horfa. En sú snilldarhugmynd að þætti!

[Jens Guð, 27.3.2007 kl. 22:49]

Á íslensku heitir þátturinn Síðasta sígarettan.

[Vilborg Traustadóttir, 27.3.2007 kl. 22:50]

Ef þið virkilega viljið hætta að reykja (ekki byrja eins og sumir) þá er óbrigðult ráð að fara á fyllerí með Möggu systir og reykja út í eitt heila nótt. Hins vegar þori ég ekki að byrja að reykja aftur ( hef þó tvisvar reynt það),  þar sem ég er hætt að drekka líka og því gæti allt farið til fj.... ef....

[IGG , 27.3.2007 kl. 23:39]

Kæri Jens, enn einu sinni hefur þú kitlað hláturtaugar mínar hressilega með skrifum þínum. Takk fyrir - það er svo hollt að hlæja - heilsuátak!

[Jón Steinar Ragnarsson, 27.3.2007 kl. 23:41]

Hljómar skelfilega spenandi. Fann að hárin risu á höfði mér bara við lýsinguna á efnistökunum. Þeir svíkja ekki Finnarnir í sjónvarpsmenningu sinni.

Mér þykir rosalega auðvelt að drekka kók en á bágt með að hætta að reykja. Hætti og byrja aftur tuttugu sinnum á dag.  Einhver ráð?

[Jens Guð, 28.3.2007 kl. 00:02]

Hláturinn lengir lífið,  Ingibjörg mín.  Ef maður kemur að manneskju í andaslitrum á að segja henni að hlægja.  Það er eins og við manninn mælt.  Ef hún nær góðu hláturskasti þá nær hún jafnframt nokkrum árum til viðbótar. 

Jón,  það er frábært að hætta að reykja 20 sinnum á dag.  Tuttuguföld ánægja.

[IGG , 28.3.2007 kl. 11:28]

Þú hefur lengt líf mitt töluvert Jens, hafðu þökk fyrir það og takk líka fyrir heillaráðið varðanda andaslitrin!!! Ég ætla að reyna að muna það þegar að því kemur hjá mér!

Ingibjörg G.G.