Afi - II

  Það var snemma sumars sem afi hafði orð á því að Elli mágur hans ætti sjötugsafmæli á tilteknum degi nokkrum vikum síðar.  Er nær dró átti afmælið hug afa allan.  Afi fór að tala um veislu aldarinnar.  Síðustu dagana fyrir afmælið ræddi afi stöðugt um að nú væri verið að baka hnallþórur eða annað lostæti á Narfastöðum.  Borð myndu svigna undan kræsingum.  Elli væri pottþétt búinn að panta í póstkröfu heilu kassana af úrvals víni,  bestu fáanlegu vindlum og neftóbaki.

.

  Er stóri dagurinn rann upp vaknaði afi af spenningi fyrir allar aldir.  Og mikið sem hann varð glaður þegar við lögðum af stað síðdegis.

  Er við nálguðumst Narfastaði,  sem er í næstu sveit,   vakti undrun að engir gestir voru mættir.  Heimilisfólkið var úti í heyskap.  Elli dreif sig þó heim á hlað til að heilsa gestunum.  Afi rétti honum dýrasta koníaksfleyginn úr Ríkinu og veglegt afmæliskort, kyssti hann á kinnina og óskaði heilla.

.

  Elli varð eitt spurningarmerki.  Hann kannaðist ekkert við þetta merkisafmæli. 

  Það snöggfauk í afa við þessi tíðindi.  Hann stóð fastur á sínu og var fyrr en varði orðinn kjaftfor og ókurteis.  Æsti sig upp úr öllu valdi og hellti sér yfir Ella með óprenthæfum fúkyrðum. 

  Þegar Elli komst loks að fyrir orðaflaumnum í afa spurði hann:  "Heldur þú að ég viti ekki manna best allt um mín afmæli?"

  Afi hélt nú ekki og hreytti fjúkandi reiður út úr sér:  "Hvernig í andskotanum ættir þú að vita það?  Þú sem kannt ekki einu sinni að skrifa nafnið þitt!"

.

  Þá hrissti Elli höfuðið og bauð okkur inn í kaffi.  Vegna góðviðrisins vildu gestirnir ekki halda heimilisfólkinu of lengi frá heyskap.

   Er við kvöddum úti á hlaði hélt Elli á koníaksflöskunni frá afa og endurtók þakkir fyrir hana.  Þá kippti afi eldsnöggt flöskunni af Ella.  Sagði reiðilega að fyrst að Elli vissi ekki að hann ætti afmæli hefði hann ekkert við afmælisgjafir að gera.

.

  Á heimleiðinni hneykslaðist afi mjög á fáfræði Ella.  Máli sínu til áréttingar sagðist afi eitt sinn hafa séð Ella skrifa tvö s í Þórðarson. 

  Heimkomin flettu foreldrar mínir því upp að Elli hafði rétt fyrir sér með afmælið.  Sjötugsafmæli hans var árið áður.  Afa var þó ekki haggað heldur lýsti heimildunum sem "bölvaðri þvælu er væri étin upp eftir ruglinu úr Ella." 

.

  Næstu ár á eftir var viðkvæði hjá afa -  um leið og hann hristi höfuðið -  þegar tal barst að Ella:  "Að hugsa sér að þetta skuli vera mágur minn:  Eini maðurinn á öllu landinu sem veit ekki hvenær hann á afmæli."

Athugasemdir

[Hafsteinn Viðar Ásgeirsson, 3.4.2007 kl. 08:34]

Hún er ekki síðri þessi saga af honum afa þínum en sú fyrri. þetta hefur klárlega verið magnaður kall, en hvernig sem á því stendur þá heyrir maður aldrei orðið af svona karakterum. Gæti verið vegna þess að það er enginn til að segja frá þeim, allir svo uppteknir af að komast af að fólk tekur varla eftir skemmtilegu samferðafólki og enn síður að nokkur hafi tíma til að segja frá því, (yfir sjónvarpinu).....

[Jens Guð, 3.4.2007 kl. 09:16]

  Íslendingar eru einsleitari í dag en áður.  Í einangruninni í sveitinni í gamla daga fékk fólk að rækta með sér sérviskulega takta.  Fyrir daga fastrar skólagöngu hitti fólk ekki neinn af öðrum bæjum yfir heilu og hálfu vetrartímana.  Hvorki útvarp eða sjónvarp buðu upp á staðlaðar fyrirmyndir. 

  Í þau 27 ár sem ég hef ferðast um landið til að kenna skrautskrift tel ég mig merkja töluverða þróun í átt að þessari einsleitni.  Austfirska flámælskan er að hverfa.  Vestfirskan er horfin.  Norðlenskan er á undanhaldi.  Staðbundin orðatiltæki eru fáheyrð. 

[Rannveig Höskuldsdóttir (IP-tala skráð) 3.4.2007 kl. 09:36]

'Eg skemmti mér vel,hann afi hefur verið sérstakur.Má ég byðja um meira,afi 3,4 of 5

kveðja Rannveig

[Jens Guð, 3.4.2007 kl. 10:35]

Rannveig,  hvað er netfangið þitt?  Ég er með fréttir frá MC Föroyar. 

[Kristín Björg Þorsteinsdóttir, 3.4.2007 kl. 11:09]

Ég bið vinsamlegast um fleiri sögur af afa þínum - þær eru rosalega fyndnar og skemmtilegar

[Ásthildur Cesil Þórðardóttir, 3.4.2007 kl. 11:24]

Hörkukall hann afi þinn hehe

[Rannveig Höskuldsdóttir (IP-tala skráð) 3.4.2007 kl. 11:50]

[e-mail] Þarf líka að tala við þig og fá smá upplýsingar kv R

[Jens Guð, 3.4.2007 kl. 11:55]

Já,  ég á heldur betur eftir að rifja upp sögur af afa.  Þó að það sé sérstaklega gaman fyrir ættingjana og aðra sem þekktu kallinn þá er það ekki skilyrði fyrir því að geta brosað að tiktúrum hans. 

[IGG , 3.4.2007 kl. 22:32]

Tek undir með þeim sem hér hafa tjáð sig varðandi skemmtilegar afasögur.

[viðar (IP-tala skráð) 3.4.2007 kl. 23:55]

Ég vissi það að sá gammli myndi alls ekki klikka þegar að þú færir í það að snara þessu á bloggið. Annars held ég það það sé töluvert af honum afa þínum í þér! Ekki satt?

[Jens Guð, 4.4.2007 kl. 01:17]

Ja,  það er nú það,  Viðar minn.  Afi var ekki beinlínis sú fyrirmynd sem ég vil líkjast.  Hann steig ekki í vitið umfram það sem nauðsynlega þurfti.  Var að auki mjög ókurteis og óheflaður í framkomu.  Jafnvel þar sem það átti ekki við.  Kjaftfor og áraásahneigður þannig að ítrekað gekk hann fram af manni.  En,  jú,  þegar ég rifja upp unglingsárin er ég ekki frá því að eitthvað af hans genum hafi gengið í erfðir. 

[Halla (IP-tala skráð) 4.4.2007 kl. 19:38]

Frábærar sögur af afa þetta hefur verið hreinn snilldarkarl :)

 Var bara að detta um bloggið þitt fyrir nokkrum dögum og það er þetar orðinn fastur viðkomustaður í netrápinu.

Takk fyrir skemmtilegt blogg, fáséðir svo góðir pennar sem hafa líka húmor þetta tvennt fer nefnilega sjaldnast saman.

kveðja Halla