Spaugilegt atvik

  Fötluð kona,  bundin við hjólastól, bjó í kjallaraíbúð á Leifsgötu.  Einn daginn fékk hún upphringingu frá frænku sinni utan af landi.  Sú sagði að 17 ára sonur sinn ætlaði til Reykjavíkur kvöldið eftir til að kaupa sér bíl.  Spurning væri hvort að hann fengi að gista á Leifsgötunni í eina eða tvær nætur.

  Sú fatlaða tók erindinu fagnandi.  Þennan unga frænda sinn hafði hún ekki séð frá því að hann var barn.  Móðir drengsins sagði að hann fengi far til Reykjavíkur með vörubílstjóra.  Þeir yrðu seint á ferð.  Strákurinn myndi varla skila sér í hús fyrr en eftir miðnætti.

  Kvöldið eftir,  rétt undir miðnætti,  bað sú fatlaða heimahjúkrunarkonuna sína um að laga mat handa frændanum og halda honum heitum þangað til stráksi mætti.  En fyrst bað hún hjúkrunarkonuna um að renna sér í hjólastólnum inn í stofu.  Þar ætlaði hún að dotta þangað til frændinn kæmi.

  Þetta var síðsumars og farið að rökkva.  Þeirri fötluðu rann í brjóst en vaknaði nokkru síðar við að frændinn stóð yfir henni.  Hún heilsaði honum fagnandi,  bauð hann margvelkominn og bað hann um að renna hjólastólnum fram í eldhús.  Þar biði hans heitur matur.

  Strákur tók hraustlega til matar síns.  Var greinilega glorhungraður.  En afskaplega fámáll.  Svaraði bara með já og nei og gjóaði augum feimnislega i allar áttir.  Þeirri fötluðu þótti það ekkert einkennileg.  Sveitastrákurinn væri óvanur ókunnugum og feiminn.  Öllu einkennilegra þótti þeirri fötluðu að þegar strákur hafði skóflað í sig matnum þá fór hann út úr húsinu.

  Nokkrum mínútum síðar bankaði annar ungur drengur á dyrnar.  Sá kynnti sig sem frændann og ættarsvipurinn leyndi sér ekki.  Hver var þá hinn drengurinn?  Við nánari athugun kom í ljós að stofugluggi hafði verið spenntur upp og gluggasyllan og gólfið fyrir neðan atað mold og grasi.  Svangi drengurinn hafði greinilega brotist inn um stofugluggann,  sennilega án þess að taka eftir hreyfingarlausri sofandi konunni í hjólastólnum.

  Sá hefur orðið undrandi á góðum viðtökum,  svo ekki sé minnst á að vera boðið upp á heita máltíð.

Bauð bófa í kaffi og köku

Athugasemdir

[Ragnheiður , 6.4.2008 kl. 18:50]

Æj sá hefur verið hissa á móttökunum blessaður

[Birna Dis Vilbertsdóttir (IP-tala skráð) 6.4.2008 kl. 18:58]

Góð saga

[Ómar Ingi, 6.4.2008 kl. 19:59]

Frábær saga

[Markús frá Djúpalæk, 6.4.2008 kl. 20:18]

Stórkostleg saga

[Númi (IP-tala skráð) 6.4.2008 kl. 21:03]

Sæmileg saga.

[Númi (IP-tala skráð) 6.4.2008 kl. 21:04]

Ógnvekjandi saga.

[Númi (IP-tala skráð) 6.4.2008 kl. 21:04]

Bófaleg saga.

[Helga Guðrún Eiríksdóttir, 6.4.2008 kl. 21:10]

Útvarp Saga?

[Steini Briem (IP-tala skráð) 6.4.2008 kl. 21:27]

Af hverju var þessi fróma og fatlaða kona "bundin við hjólastól"?! Það ætti að kæra þessa heima"hjúkrunar"konu.

[Heidi Strand, 6.4.2008 kl. 22:00]

Þetta er íslenskt gestrisni.

[Jens Guð, 6.4.2008 kl. 22:22]

  Steini,  þessi var góður!

  Valdemar,  þessi atburður átti sér stað í raunveruleikanum.

[Helga Guðrún Eiríksdóttir, 6.4.2008 kl. 23:04]

Bondage tekur greinilega á sig ýmsar myndir...  

[Villi Asgeirsson, 7.4.2008 kl. 08:13]

Hvað fékk frændinn? Mjólk og matarkex?