Gott sparnaðarráð - á oft eftir að koma sér vel

 

  Nú í byrjun kreppunnar eru sumarbústaðaeigendur,  mótorkrosskappar og fleiri byrjaðir að finna fyrir þrengingum.  Þeir eru farnir að stela rotþróm og vatnskössum hver frá öðrum.  Í þessu ástandi munar um hvert sparnaðarráð og allra best er ef það gengur EKKI út á að stela frá nágrannanum.  Í helgu boðorði segir að þú skulir ekki girnast þræl náunga þíns eða ambátt,  asna né nokkuð annað sem hann á.  Þar er verið að vísa til rotþróa og vatnskassa.  Jafnframt er hnykkt á að þú skulir ekki stela.

  Þegar sumrar sækir flugan í að verpa í siginn fisk,  skreið,  skerpukjöt og annan mat sem hangir úti í góða veðrinu.  Það er ólystugt að bera á borð matarbita sem iða í maðki.  En það er jafnframt blóðugt og reyndar ástæðulaust að henda mat.  Það má alltaf finna ráð.

  Maðkaðan mat er hægt að setja í plastpoka og binda vel fyrir.  Þegar dregur úr súrefni innan í pokanum skríður margur maðkurinn úr holu sinni í leit að súrefni.  Á tveimur sólarhringum er maðkurinn í pokanum dauður. 

  Þá er maturinn tekinn úr pokanum.  Alltaf er eitthvað af maðki sem hefur drepist áður en hann hefur rænu á að skríða úr matnum.  Einnig er viðbúið að einhverjir maðkar hafi verið dauðir áður en maturinn er settur í pokann.

  Til að lítið beri á maðki í matnum er heillaráð að laga ljósa karrísósu og sjóða hrísgrjón.  Hrísgrjónunum og matnum er skellt út í karrísósuna og öllu hrært vel saman.  Síðan er heimilisfólkinu og gestum talin trú um að þetta sé afskaplega fínn og vinsæll indverskur karríréttur.  Enginn tekur eftir litlum dauðum dýrum í matnum því maðkurinn lítur út eins og hrísgrjón í svona kássu.

Fleiri sparnaðarráð:

http://jensgud.blog.is/blog/jensgud/entry/501251

http://jensgud.blog.is/blog/jensgud/entry/530712

Athugasemdir

[Steinn Hafliðason, 13.5.2008 kl. 12:25]

 þú ert ótrúlegur

[Haraldur Bjarnason, 13.5.2008 kl. 12:39]

.....eins og hrísgrjón já....þú hefur sem sagt smakkað þennan ótrúlega rétt Jens

[Adda bloggar, 13.5.2008 kl. 12:42]

góður pistill.kv adda

ps.elskurnar mínar, langar að benda ykkur á þessa ungu hetju og biðja fyrir henni.Hún heitir Sigrún og er ung móðir með hvítblæði,og er úti í svíþjóð þessa dagana í mergskiptum.Þetta er erfið meðferð sem reynir á hetjuna mína!

ps.afsakaðu að ég tróð þessu inn á bloggið þitten allar bænir og hugsanir hjálpa henni

http://sigrunth.bloggar.is/

[J. Einar Valur Bjarnason Maack , 13.5.2008 kl. 13:35]

Ef þú átt hrísgrjón þarftu ekki að éta eitthvað maðkað rusl.

Svo eru smáfuglar og endur á hverju strái hérna.

Bara að veiða sér einn í steikina. (Sé þig fyrir mér hlaupa eftir t.d. Hjarðarhaganum með háf í hendi, að eltast við þresti ).

Annars skilst mér að maðkar séu meinhollir. 

[Þorsteinn Briem, 13.5.2008 kl. 13:37]

Er hann þar Gvöð inni,
á Umferðarmiðstöðinni,
maðkurinn Jens í mysu,
að moka upp í sig kisu.

[Haukur Nikulásson, 13.5.2008 kl. 14:32]

... og svaraðu því nú! Hvernig smakkast þetta Jens?

[Gunnar Helgi Eysteinsson, 13.5.2008 kl. 17:02]

Þú ert skemmtilega ógeðslegur, Jens. hahahahahahahahahahhaha

[Jens Guð, 13.5.2008 kl. 18:45]

 Steinn og Gunnar,  takk fyrir innlitið.

 Haraldur,  Einar Loki og Haukur,  ég bý einn og elda ekki heldur borða til skiptis á Umferðarmiðstöðinni,  Múlakaffi,  hjá Sægreifanum og hinum ýmsu veitingastöðum sem eru í grennd þegar ég verð svangur.  Ég veit ekki hvernig staðið er að matseld á þessum stöðum og veit þess vegna ekki hvort ég hef smakkað eitthvað svona.

  Adda,  þér er meira en velkomið að koma svona dæmi á framfæri á þessum vettvangi.

  Steini,  takk fyrir vísuna.

[Ómar Ingi, 13.5.2008 kl. 19:09]

Góður