Hverju reiddust goðin?

  Ég vissi ekkert hver Sindri Sindrason fréttamaður er.  Fyrr en í dag.  Hvar sem ég kom í dag var spurt:  "Sástu þegar Geir missti sig við Sindra Sindrason?"  Fyrst vissi ég ekki við hvað var átt.  Svo komst ég að því og fékk útskrift á atburðinum.  Þannig gekk þetta fyrir sig:

  Eins og venja er með fréttamenn beið Sindri Sindrason fyrir utan Stjórnarráðið.  Geir Hahaharde renndi í hlað og steig þungfættur út.  Sindri gekk til móts við hann og sagði glaðlega:

 - Jæja,  komdu sæll Geir.  Jæja,  hvar eru peningarnir sem þurfa að komast inn í landið?

Geir (pirraður):  Á þetta að vera viðtal?

Sindri:  Já,  ég hefði viljað aðeins að heyra um þetta.

Geir (hrokafullur og skipandi):  Hafa samband fyrirfram.

Sindri:  Geir,  þjóðin náttúrlega bíður eftir aðgerðum frá ríkisstjórninni.  Geturðu ekki gefið okkur smá "komment"?

Geir (að springa úr pirringi):  Ég skal gera það,  Sindri,  ef þú hagar þér ekki svona dónalega.  Þá myndi ég tala við þig.

Sindri:  Hvers vegna er dónalegt að bíða eftir forsætisráðherra?

Geir skellir hurðinni á nefið á Sindra sem segir í forundran:

 - Þar hafið þið það.

  Á einhverju bloggi,  sem ég týndi strax í ógáti - sá ég fullyrt að Geir hafi ekki kallað Sindra dóna.  Það er kjánaleg hártogun.  Þegar einhver er sakaður um að vera dónalegur liggur í hlutarins eðli að verið er að skilgreina viðkomandi dóna.

  En látum það vera.  Miklu áhugaverðara er að komast að því hvers vegna Geir missti sig.  Svona pirringur ku vera þekktur á vinnustöðum þar sem karlar dvelja langdvölum kvenmannslausir.  Þetta kallast brundfyllisgremja.  Þegar svona pirringur hendir konur er það afsakað með því að þær séu á túr.  En þegar þetta hendir forsætisráðherrann,  ja,  kannski... og þó...nei...?

Athugasemdir

[Hjörtur J. Guðmundsson, 13.6.2008 kl. 23:47]

Ef sá sem hegðar sér dónalega er dóni, er þá sá sem hegðar sér apalega api?

[Júlíus Valsson, 13.6.2008 kl. 23:56]

Rétt hjá Geir að snúa af sér svona angurgapa.

[Jens Guð, 13.6.2008 kl. 23:58]

  Hjörtur,  samkvæmt Orðabók Menningarsjóðs þýðir orðið api 1) dýrategund af ættbálki spendýra 2) jötunn 3) kjáni,  fífl 4) trissa í vefstól.

  Það getur þess vegna meðal annars ráðist af því hvort verið er að saka einhvern um að vera fífl eða trissa í vefstól. 

[Sigurður Þórðarson, 14.6.2008 kl. 00:00]

Hérna er myndskeiðið með viðureign þeirra

[DoctorE (IP-tala skráð) 14.6.2008 kl. 00:08]

Geir var mjög dónalegur og pirraður mjög yfir að vera spurður mjög eðlilegrar spurningar.
Þessi ríkisstjórn virðist telja alla dóna sem spyrja eðlilegra og rökréttra spurninga, það er eins og engum komi neitt við hvað hún er að sýsla, hvað hún hyggst gera í málum og eða bara kosningaloforðum.

[Jens Guð, 14.6.2008 kl. 00:09]

  Júlíus,  reynum að líta framhjá því hvort Sindri sé angurapi.  Um það hef ég ekki hugmynd.  Ég þekki manninn ekki neitt og vissi ekki af honum fyrr en í dag.  Hann virðist hafa verið þarna í eðlilegu og algengu hlutverki fréttamanns.  Með öðrum orðum að vinna vinnuna sína og alls ekki dónalegur.

  Reynum líka að líta framhjá því að Geir er formaður Sjálfstæðisflokksins.  Ég var blaðamaður í þrjá áratugi og átti einungis vinsamleg samskipti við stjórnmálamenn allra flokka.  Viðbrögð Geirs í þessu tilfelli voru sérkennileg og vekja eðlilega upp spurningar. 

[Þorsteinn Briem, 14.6.2008 kl. 00:17]

Mér finnst þetta líka dónaleg spurning og hefði ekki svarað henni.

Þar að auki er Sindri Sindrason apalegt nafn.

[Jens Guð, 14.6.2008 kl. 00:17]

  Siggi,  takk fyrir myndskeiðið.

  DoctorE,  Sindri var þarna í því hlutverki að spyrja spurningar sem brennur á landsmönnum.  Hann var þarna sem fréttamaður fulltrúi landsmanna.  Það er sérkennilegt að forsætisráðherrann bregðist við með því að gefa honum og þar með landsmönnum löngutöng.  "Fuck you" kallast það á ensku.  Bíðum við.  Í umboði hverra - ef ekki landsmanna - er Geir forsætisráðherra? 

[Þorsteinn Briem, 14.6.2008 kl. 00:19]

Ég gæti best trúað að apinn í Hveragerði hafi heitið Sindri Sindrason.

[Jens Guð, 14.6.2008 kl. 00:19]

  Steini,  áttu við að Geir hefði frekar átt að kalla Sindra apa?

[Rúna Guðfinnsdóttir, 14.6.2008 kl. 00:26]

Mér fannst þetta hreint makalaust, því Geir hefur alltaf verið talinn kurteis og fágaður maður í fasi og framkomu.  Slæmur dagur hjá honum??

[Jens Guð, 14.6.2008 kl. 00:27]

  Steini,  nafnið Sindri er dregið af því þegar geislar af málmsagi.  Sögnin að sindra lýsir því þegar geislar eða ljómar af málmsaginu.  Ég sé ekki margt apalegt við það.

[Þorsteinn Briem, 14.6.2008 kl. 00:33]

Ég hefði kallað hann bjánalegan apa eða apalegan bjána.

Á eftir að gera það upp við mig hvort orðalagið ég hefði valið.

Og látið hann svo slá blettinn í kringum Stjórnarráðið, þar sem Bíbí valhoppaði eitt sinn á stuttbuxunum og át þar alla ánamaðka. Þeir hafa ekki þorað að láta sjá sig aftur á lóðinni tíu skref frá tukthúsinu fyrrverandi allt um kring og ég held að Sindri Sindrason ætti að fara að dæmi þeirra.

[Jens Guð, 14.6.2008 kl. 00:34]

  Rúna,  ég tek undir það að Geir hefur jafnan komið fram sem frekar glaðlyndur og jákvæður kurteis embættismaður.  Hann hefur einmitt borið af sér góðan þokka sem slíkur.  Og jafnvel þótt fara yfir strikið með galsafengnum tilsvörum,  samanber þetta með að ef hann náði ekki sætustu stelpunni á ballinu þá gæti hann reddað sér með einhverri annarri sem gerir sama gagn. 

  Sömuleiðis fór hann á kostum í fyndnum tilsvörum á lokadögum þingsins.  Þingheimur lá grenjandi í hlátri af hnyttni hans.  Þessi uppákoma er óvæntur stílbrjótur.

[Númi (IP-tala skráð) 14.6.2008 kl. 00:34]

Ég tl fullvíst að Geir Forsætisráðherra vor,hafi verið að koma af námskeiði í Seðlabankanum,hjá vini sínum Davíð Oddsyni.Á þessu námskeiði hefur Geir verið að læra um siði Davíðs,um drottningarviðtöl og fýluköst og hroka og fleira og fleira.Geir fékk þarna tækifæri á að prófa sig,og eflaust hefur Davíð hinn mikli horft á með aðdáun,á lærisveininn sinn hann Geir.

[Jens Guð, 14.6.2008 kl. 00:37]

  Steini,  ég næ ekki alveg þessu með að Bíbí hafi etið alla ánamaðka í kringum Stjórnarráðið.  Ég hélt að hann hafi verið meira fyrir nautasteik.

[Lára Hanna Einarsdóttir, 14.6.2008 kl. 00:41]

Þetta er ekki í fyrsta sinn sem fyrrum prúðmennið Geir gerist sekur um slíkan hroka. Ég skrifaði lítinn pistil með myndbandi um þetta 26. mars sl. - sjá hér.

Spurning hvað hefur komið yfir manninn... kannski Númi hafi rétt fyrir sér... 

[Jens Guð, 14.6.2008 kl. 00:41]

  Númi,  svei mér þá.  Þetta gæti verið rétt hjá þér.  Það hljómar þannig.

[Jens Guð, 14.6.2008 kl. 00:47]

  Lára Hanna,  takk fyrir myndbandið.  Vonandi er það ekki að verða kækur hjá Geir að taka mánaðarlegt pirringskast.  Annars þurfa fréttamenn og aðrir landsmenn að fara að reikna út hvenær hann á glaðvær 3ja vikna tímabil og svo kemur röðin að fjórðu pirringsvikunni.

[Þorsteinn Briem, 14.6.2008 kl. 00:48]

Ekki þegar hann var á stuttbuxunum. Bíbí var eitt sinn ungur drengur en það gildir náttúrlega ekki um alla og því er von að þú spyrjir nánar út í þetta atriði, Jensinn minn.

Það er fáránlegt að hanga fyrir utan Stjórnarráðið í fréttaleit. Það gerði ég aldrei. Geir Haarde á fallega dóttur og í alla staði mun eðlilegra að nálgast hann í gegnum hana.

[Júlíus Valsson, 14.6.2008 kl. 00:52]

Jens, mér finnst þetta ansi klaufaleg aðkoma að forsætisráðherra landsins: "- Jæja,  komdu sæll Geir.  Jæja,  hvar eru peningarnir sem þurfa að komast inn í landið?"

Hafa menn engan stíl? 

[DoctorE (IP-tala skráð) 14.6.2008 kl. 00:54]

PMS aka pre-moneyproblem-syndrome

[Þorsteinn Briem, 14.6.2008 kl. 01:02]

Júlíus Valsson veit hvað hann syngur. Og áður en til að mynda menntamálaráðherrann veit af er maður búinn að spyrja hana spjörunum úr. Það á ekki að taka ráðherrana með trukki, heldur mýkt og fimi. Þá segja þeir manni öll sín leyndarmál.

[Jens Guð, 14.6.2008 kl. 01:11]

  DoctorE,  kannski er þetta rétt hjá þér. 

  Steini,  ertu að vísa til staðdeyfi "anal" sleypiefnis sem tollurinn gerði upptækt í vikunni?

[Jens Guð, 14.6.2008 kl. 01:22]

  Júlíus,  ég fellst fúslega á að það er engin reisn yfir spurningunum.  Enda er ég ekki í því hlutverki að upphefja Sindra.  Né heldur í því hlutverki að deila á Geir sem formann Sjálfstæðisflokksins.  Eins og einhver sagði löngu á undan mér þá eiga allir sína slæmu daga.  Engu að síður kom og kemur á óvart að þessi okkar ástsæli forsætisráðherra skuli sína á sér þessa óvæntu hlið.   

[Þorsteinn Briem, 14.6.2008 kl. 01:23]

Handjárn og titrarar koma sér ætíð vel, Jensinn minn.

En maður byrjar nú ekki á þeim atriðum, ekki einu sinni við gömul tukthús.

[Jens Guð, 14.6.2008 kl. 01:48]

  Steini, ég er með einfaldan smekk.  Ég átta mig ekki á kostum handjárna og titrara.  Það er eitthvað fyrir guðsmanninn Gvend í Byrginu.  Innan og utan tukthúsa.

[Lesandi (IP-tala skráð) 14.6.2008 kl. 02:00]

Nú eruð þið komnir út á sleipa braut Steini minn og Jens.

[Þorsteinn Briem, 14.6.2008 kl. 02:11]

Þó þú farir nú ekki að nota handjárn og titrara á sjálfan þig, Jensinn minn.

[Þorsteinn Briem, 14.6.2008 kl. 02:24]

Nei, ég segi nú bara svona, ekki að ég viti það, eins og hún amma mín sagði.

[Þórður Ingi (IP-tala skráð) 14.6.2008 kl. 03:58]

Sindri: „Jæja, hvar eru peningarnir sem eiga að komast inn í landið?"

Einstaklingur sem býr í samfélagi sem á að heita siðmenntað, á að eiga þess kost að náunginn geri alla vega tilraun til að hefja samtal á viðunandi máta. Öllum yrði brugðið ef að þeim er otað lítilli stöng og spurt "Hvað eru peningarnir". Sindri kemur jú aftan að honum.

Annars hlýtur maður sem á að bera ábyrgð á efnahagsmálum þjóðarinnar að eiga rétt á tíma og rúmi til að svara stórum spurningum. Þeim er ekki svarað á ferðinni. Geir hefði kannski átt að segja: "Þetta reddast, við erum að vinna í þessu" og halda síðan áfram sína leið.

[Dr.Feelgood (IP-tala skráð) 14.6.2008 kl. 09:48]

Dónalegt? Hafið þið séð og heyrt hvernig fréttamenn, jafnvel frá hinu ginnheilaga BBC (að sumra áliti) nálgast þann sem býr í 10 Downing Street hverju sinni? Þau okkar sem eru afskaplega holl foringja Flokksins hverju sinni verða að gera sér ljóst, að fréttamaðurinn - hver sem hann er og hvort hann heitir Sindri eða Sigmar - er að spyrja spurninganna OKKAR. Við erum að spyrja hvert annað þessarar spurningar sem Sindri spurði, hann er að fara fyrir okkar hönd á fund forsætisráðherrans og spyrja vegna þess, að við fáum ekki að komast í talfæri við hæstvirtan forsætisráðherra. Þetta er hlutverk fréttamanna, finna svör við spurningunum OKKAR! Þegar hæstvirtur svarar spurningunum okkar með hroka, er hann að sýna okkur hroka. Þetta er ekki flóknara en það.

[JEA, 14.6.2008 kl. 10:29]

Var karlinn ekki bara ílla fyrir kallaður?  Ég held að það sé nú í lagi svona stundum,  það eru ekki allir dagar góðir dagar nema eftir 11 daga eins og máltakið segir.

[Ómar Bjarki Kristjánsson, 14.6.2008 kl. 11:07]

Steingrímur Hermansson hefði farið létt með að tækla þetta á sínum tíma.

[Júlíus Valsson, 14.6.2008 kl. 12:41]

Smekkleysið ríður ekki við einteyming í fjölmiðlum hér á landi. Það er engin afsökun þótt fréttamenn í útlöndum séu upp til hópa dónar.

[Halla Rut , 14.6.2008 kl. 12:50]

Ég varð hissa þegar ég sá hvernig Geir brást við. Ekki gott PR hjá honum.

Aðeins ráðalaus maður verður reiður. Svo þar höfum við svarið við spurningu Sindra...Ég veit ekkert hvað ég á að gera, hef ekki hugmynd.

[Ingvar Valgeirsson, 14.6.2008 kl. 13:42]

Aðeins ráðalaus maður verður reiður - hvaða bévítans bull er það?

Mér fannst báðir koma illa út. Fréttamaðurinn var dónalegur, það er lágmarkskurteisi að bjóða góðan daginn í upphafi samtals. Geir kom illa út, svolítið overreaction hjá honum.

Svo þótti það frétt að Steingrími J. fannst framkoma Geirs óviðunandi - bjuggust þeir við að hann myndi verja Geir? Veit Steingrímur J. eitthvað meira en aðrir um mannasiði?

[Sigurður Þórðarson, 14.6.2008 kl. 13:55]

Ég man ekki betur en að Sindri sé Óðinskenning (nafn á Óðni)

[Þorsteinn Briem, 14.6.2008 kl. 14:29]

Þessi Sindri Sindrason er bara amatör, enda ber nafnið það greinilega með sér. Og ég hefði líka hundskammað hann, þó ekki væri fyrir annað en að heita svona fáránlegu nafni. Þetta er dvergsheiti, Sigurður minn.

Í alvöru fréttamennsku kemur maður sér upp samböndum alls staðar í þjóðfélaginu, allt frá Lalla Johns til Geirs Haarde. Þú situr bara á barnum og bíður eftir að þeir hringi í þig. Geir og Lalli heilsuðu mér með virktum niðri á Austurvelli um daginn og þeir eru jafn mikilvægir í þjóðfélaginu. Annar er ekkert án hins.

Maður sefur hjá réttu stelpunum í öllum flokkum og fær sér neðan í því með réttu köllunum. Ég hef látið mig hafa það að kúra hjá sirka þúsund stelpum um allt land til að koma mér upp réttu samböndunum. En það er ekki þar með sagt að maður eigi að sleikja þær upp við hvert tækifæri, eða þá Halldór Ásgrímsson, enda þótt hann gefi manni pönnsur með jarðarberjasultu og rjóma.

En maður hangir ekki fyrir utan Stjórnarráðið í leit að fréttum, eins og svartbakur sem vokir yfir ruslahaugunum í leit að æti.

Eitt sinn skrifaði ég til að mynda ræðu fyrir Þorstein Pálsson, þá sjávarútvegsráðherra, án þess að hafa nokkurn tíma verið í Sjálfstæðisflokknum. Og Þorsteinn vissi ekki einu sinni að ég hefði skrifað ræðuna, heldur hélt hann að aðstoðarmaður sinn hefði skrifað hana.

En ekkert er skemmtilegra í fréttamennsku en að plata og rassskella aðra fréttamenn. Ljósamenn í Þjóðleikhúsinu fóru í verkfall og þjóðleikhússtjóri gekk í þeirra starf en neitaði að hleypa fréttamönnum inn í húsið meðan á sýningu stóð. Ég borgaði mig hins vegar inn á sýninguna og var því eini fréttamaðurinn á staðnum.

Hinir fréttamennirnir hoppandi öskureiðir fyrir utan húsið á meðan ég tók viðtöl við bæði ljósameistarana og þjóðleikhússtjórann, þar sem hann lýsti upp sviðið eins og hann hefði aldrei gert annað. Og daginn eftir kom þessi fyrirsögn í Mogganum: Skemmtilegra en að vera þjóðleikhússtjóri. Ásamt mynd af kalli skælbrosandi að stýra ljósunum.

Svona á að gera þetta og hætta þessu norpi fyrir utan Stjórnarráðið. Það er fréttamannastéttinni til háborinnar skammar!

[Sigurgeir Þór (IP-tala skráð) 14.6.2008 kl. 19:21]

Er ekki venjan sú að menn panta viðtöl við forsætisráðherra. Mér finnst ekkert sjálfsagt við það að fjölmiðlamenn geti hangið fyrir framan vinnustaði eða heimili stjórnmálamanna og fengið viðtal hvenær sem þeim hentar.

[Magnús Geir Guðmundsson, 14.6.2008 kl. 19:38]

hahahaha, nú skín sólin björt og lífið svo skrambi skemmtilegt, STeini fór nefnilega réttu megin fram úr rúninu í morgun í yrsta skipti í tvo mánuði og þá er ekki að spyrja af fjörinu!

[Stefán Þór Helgason (IP-tala skráð) 14.6.2008 kl. 20:56]

Finnst engum það vera dónalegt að koma bara sísvona upp að forsætisráðherra og spyrja: Jæja Geir, hvar eru peningarnir sem eiga að koma inn í landið? Þó hann sé fréttamaður þá hefur hann ekki rétt á að tala við forsætisráðherra hvenær sem honum sýnist og sitja fyrir honum til að spyrja hann spurninga. Hefði ekki verið lang einfaldast fyrir hann að panta tíma þar sem Geir gæti útskýrt fyrir honum í rólegheitum hvernig málið er statt. Þetta er hvorki það lítið né ómerkilegt mál að það verði afgreitt á tröppum stjórnarráðsins.

Þó svo að fréttamenn séu hættir að þéra ráðherra þá eiga þeir ekki að hætta að sýna ráðherrum virðingu og virða það að þeir vilji svara spurningum í rólegheitum en ekki á hlaupum. Sindri hefði átt að beita annarri aðferð og hann veit það sjálfur, það vita a.m.k. allir góðir fréttamenn sem ég trúi að hann sé.

[Zaraþústra, 15.6.2008 kl. 01:56]

Mér finnst þetta einstaklega heimskulegt viðtal.  Ef að Sindri hefði fyrst reynt hringt í forsætisráðherra eða aðstoðarmanns hans og beðið um viðtal væri kannski skiljanlegra að hann bíði eftir honum við skrifstofuna hans.  Hvernig myndi ykkur líða ef að fréttamaður biði fyrir utan vinnuna ykkar og spyrðu ykkur svona upp úr þurru.  Það er ekkert afskaplega þægilegt.  Sama þótt svo hann sé forsætisráðherra, hvergi í starfslýsingu þessa embættis stendur að hann eigi að hafa svör á hraðbergi í hvert skipti sem talsmenn þjóðarinnar reyna að ná tali af þeim.

Fyrir svo utan það hversu illa orðuð þessi spurning er.  Það er sjálfsagt að spyrja kannski fyrst hvort hann megi leggja fyrir hann stutta spurningu (varla reiknaði hann með löngu viðtali þarna?), ef hann neitar honum um viðtal ætti það svo ekki að ná lengra.  Í staðinn reyna menn að gera úr þessu einhverja æsifrétt, er Sindri að hefna sín af því að hann fékk ekki krassandi viðtal?  Slá tvær flugur í einu höggi, hefnd og æsifrétt.  Vel að verki staðið.

[Haraldur Bjarnason, 15.6.2008 kl. 07:13]

Geir sýndi þarna ótvírætt davíðska takta!!!

[Ingvar Valgeirsson, 15.6.2008 kl. 16:05]

Nei, Davíð hefði sagt eitthvað hnitmiðaðra.