Útvarp

  Eftirfarandi samtal heyrði ég í símatíma á útvarpsstöð í gær (ég stytti það dáldið).  Það var opin lína og hlustendur tjáðu sig um bílprófsaldur, umferðarlagabrot, sektir og þess háttar. 

  Kona, greinilega komin á efri ár, segir:  - Fólk virðist ekki vita að það má ekki ganga yfir umferðargötu nema á merktri gangbraut.  Það þyrfti að beita sektum gegn fólki sem gengur yfir götu utan gangbrautar.

Útvarpsmaðurinn:  -  Það er gert til dæmis í Bandaríkjunum.

Konan:  -  Mér er sagt að í Frakklandi sé keyrt á fólk sem fer út á götu utan gangbrauta.

Útvarpsmaðurinn: - Ha?  Keyra þeir yfir fólkið?

Konan:  - Já, og mega það eftir því sem mér hefur verið sagt.  

 

Heiðar flugfreyja

  Í DV núna um helgina stendur:  "Helga (Möller) á það sameiginlegt með Heiðari Jónssyni að hafa verið flugfreyja." 

  Orðið freyja er komið úr ásatrú.  Þar er Freyja ástar-  og frjósemisgyðja.  Orðið er notað yfir ýmsar kvenkenningar.  Þjónustustúlkur sem annast farþega í flugvélum eru kallaðar flugfreyjur.  Samkynhneigðu drengirnir sem vinna sama starf kallast flugþjónar. 

Hvers vegna er Heiðar "snyrtir" kallaður flugfreyja í DV?  Kannski vill hann sjálfur láta kalla sig flugfreyju?

  Rifjast þá upp þegar Sniglabandið eitt sinn ók á rútu norður yfir Holtavörðuheiði að vetri til.  Skafrenningur var og skóf sumstaðar í skafla.  Snjóhefill ók fram og til baka yfir heiðina og snyrti veginn.  Þegar Sniglabandið mætti heflinum gáfu þeir honum umsvifalaust nafnið "Heiðar snyrtir" af augljósum ástæðum.

Einelti og Upplyfting

  Samkvæmt athugun sem gerð hefur verið á elliheimilum í Danmörku er einelti þar verulegt vandamál.  Jafnvel verra en í grunnskólum.  Gamla fólkið er sérlega útsjónarsamt og lúmskt í eineltinu.  Sumir stunda það að etja fólki saman og stofna til illinda.  Baktal -  með tilheyrandi ýkjum,  rangtúlkunum,  hálfsannleik og lygum - er algengasta leiðin.  Einnig klíkumyndanir og að skilja fólk útundan.  Hrindingar og annað líkamlegt ofbeldi viðgengst þegar fáir sjá.  Kynferðislegt áreiti er vandamál.  Í þeim tilfellum eru ekki bara karlmenn gerendur. 

  Þetta kemur á óvart.  Samkvæmt öðrum rannsóknum hækkar siðferðisstuðull fólks jafnt og þétt eftir fertugsaldur.  Sú er ástæðan fyrir því að gamalt fólk stundar að öllu jöfnu ekki bílaþjófnaði eða innbrot.  En eineltisárátta og illgirni virðast færast í aukana með hækkandi aldri.  Það er full ástæða til að vera á varðbergi þegar gamalt fólk á í hlut.  Og ekki trúa því sem það segir um aðra.   

Upplyfting

  Í Nóatúni hitti ég Kristján Snorrason í dag.  Hann er æskufélagi norðan úr Skagafirði.  Mikill húmoristi.  Hann hefur spilað á hljómborð með hljómsveitinni Upplyftingu lengur en Ronnie Wood hefur spilað á gítar með Rolling Stones.  Ronnie gekk til liðs við Stóns ´76 og er ennþá, núna 31 ári síðar, jafnan kallaður nýi gaurinn í hljómsveitinni. 

  Eftir að hafa gegnt bankastjórnun áratugum saman fyrir sunnan flutti Kristján aftur norður á æskuslóðirnar í fyrra.  Fólk á það sameiginlegt með laxinum að margir sækja á æskuslóðir þegar aldurinn færist yfir.

  Magga, dóttir Kristjáns, sagði mér í fyrra frá því að Upplyfting væri komin í stúdíó að hljóðrita nýtt efni.  Aðspurður um hvernig gangi með það dæmi svaraði Kristján:  "Við erum tilbúnir í allt.  Erum meira að segja tilbúnir fyrir utanlandsmarkað.  Búnir að þýða nafn hljómsveitarinnar fyrir alþjóðamarkað.  Ef kallið kemur þá tökum við upp nafnið Viagra."

  Af því að spjallið var á þessum nótum þá sagði Kristján mér frá því að hann hitti um daginn kunnan eldri mann í Skagafirði.  Sá er kallaður Guddi.  Hann er það sem kallast einfeldningur eða "nævisti".  Er með hugsun barns.  En er ætíð snöggur til svars.  Guddi er alls ekki að reyna að vera fyndinn.  Hann er alvörugefinn.  En margt veltur skondið upp úr honum.  Kannski þarf maður samt að þekkja Gudda til að átta sig á því spaugilega í tilsvörum hans.  Guddi lifir í ævintýraheimi sem er honum raunveruleiki.  Segir frá því þegar villt nautahjörð réðist á hann.  Hans lífsbjörg var að snúa hvert brjálaða nautið á fætur öðru niður á hornunum þangað til hjörðin lá öll afvelta og bjargarlaus.  Annað í þeim dúr.

 Í fyrst skiptið sem ég hitti Gudda þuldi hann upp fyrir mér ýmis þrekvirki sem hann hafði unnið um ævina.  Í miðju spjalli segir hann:  "Mér líkar svo vel við þig að mig langar til að gefa þér eitthvað."  Svo reif hann upp peningaveskið sitt.  Það var tómt.  Þá reif hann sig úr skyrtunni og rétti mér hana sem gjöf.  Sat síðan ber að ofan og hélt áfram að segja ímyndaðar ævintýrasögur af sér.  

  Þegar Guddi og Kristján hittust um daginn kastaði Guddi skyndilega af sér vatni (það skiptir Gudda aldrei máli við hvaða aðstæður og innan um hvaða fólk hann pissar).  Kristján segir í stríðni við Gudda:  "Helvíti er hann lítill á þér."  Guddi svaraði:  "Hann passar víða."

  Rifjaðist þá upp fyrir mér þegar Guddi var að hjálpa okkur pabba að stinga út úr fjárhúsum.  Guddi keðjureykti.  Hann hafði þann hátt á að hafa sígarettuna stöðugt í munnvikunum til að hendurnar væru frjálsar við vinnuna.  Auðjón, bróðir minn, var þá 5 - 6 ára og fylgdist með.  Hann undraðist reykingar Gudda og spurði:  "Guddi, af hverju reykir þú svona mikið?"  Þá hrökk þetta gullkorn upp úr Gudda:  "Þeir sem vinna mikið þurfa að reykja mikið." 

Færeyjar

  Ég var að lesa í Fréttablaðinu í dag að ég hafi lengi verið búsettur í Færeyjum. Þetta þykir mér gott að frétta. Ég hef nefnilega mikið dálæti á Færeyjum. Samt man ég ekki eftir búsetunni þar. En það er ekkert að marka. Ég er kominn á sextugs aldur og minninu farið að hraka.

  Hitt er annað mál að ég man glöggt eftir að hafa skroppið til Færeyja tvisvar til þrisvar á ári síðan 1998. Framan af einkum til að kenna Færeyingum skrautskrift. En síðar einnig til að skemmta mér á Ólafsvöku og hinum ýmsu tónlistarhátíðum. Lengst hef ég samfleytt dvalið í 10 daga í Færeyjum, svo ég muni. Oftast er það þó vikudvöl.

  Þar fyrir utan: Hvenær er maður búsettur einhversstaðar og hvenær er maður ekki búsettur einhversstaðar? Hvað þarf maður að dvelja lengi á einum stað til að teljast búsettur þar? Það sem einn upplifir sem heimsókn upplifir annar sem búsetu. Út frá einhverjum sjónarmiðum hef ég kannski verið búsettur í Færeyjum.

  Hvað lengi þarf maður að hafa verið á einum stað til að teljast hafa verið þar lengi?