Brýnna breytinga er þörf

  Áður en Sykurmolarnir slógu í gegn erlendis og Björk varð súperstjarna á alþjóðavettvangi vissu útlendingar ekki hvar Ísland var.  Ef þeir vissu þá á annað borð að Ísland væri til.  Ísland var yfirleitt ekki að finna á útlendum landakortum.  Útlenda túrhesta á Íslandi mátti telja á fingrum sér og nokkurra annarra. 

  Nú er öldin önnur.  Árlega heimsækja Ísland yfir 600 þúsund útlendingar.  Þar af eru Bandaríkjamenn fjölmennastir.   Víða í Bandaríkjunum er nekt algjörlega forboðin.   Nekt jafngildir grófasta klámi.  Fyrir örfáum árum sást í eina eða tvær sekúndur í bert hægra brjóst á söngkonunni Janet Jackson í sjónvarpsútsendingu.  Sjónvarpsstöðin var umsvifalaust sektuð um 66 milljónir króna.  Samt var geirvartan hulin með stjörnu.  Ýmsum þótti sektarupphæðin of lág miðað við hvað brotið var alvarlegt og gróft.  Lesendadálkar dagblaða fylltust af bréfum frá sjónvarpsáhorfendum sem voru í losti.  Einn sagðist ekki þora að hleypa hundinum sínum inn í sjónvarpsholið eftir þetta af ótta við að eitthvað þessu líkt gæti endurtekið sig.

  Mörgum Bandaríkjamönnum (og eflaust fleiri útlendingum) er alvarlega misboðið í búnings- og þvottaklefum íslenskra sundlauga.  Eftir að hafa einu sinni upplifað þá nekt sem þar blasir við - og verið jafnvel sjálfir neyddir af sundlaugavörðum til að þvo sér naktir fyrir framan aðra - geta þeir ekki hugsað sér að fara aftur í sund á Íslandi.  Þess eru dæmi að þeir hafi þurft að leita sér aðstoðar hjá sálfræðingi til að ná heilsu eftir áfallið.

  Íslenskar sundlaugar verða árlega af háum upphæðum vegna þessa fyrirkomulags.  Það væri mjög arðbær fjárfesting að setja upp þunnt tjald fyrir eins og eina sturtu í hverri sundlaug. 

Íslenskur kynfæraþvottur ekkert gamanmál

Athugasemdir

[hilmar jónsson, 3.2.2012 kl. 20:15]

Heldurðu nú að um verulegar upphæðir sé að tefla Jens ?

Annars setti ég blogg við þessa frétt líka, en mbl valdi að kippa því úr tengslum við fréttina.

Skyldi ég hafa misboðið þeim...siðferðilega ?

[jonas (IP-tala skráð) 3.2.2012 kl. 20:21]

Eða bara að tepruskapru bandaríkjamanna. "Land of the free , home of the brave" (Hvað sem það nú þýðir) sé búin að ná tökum á þér. Ég held annars að þú eigir erfitt með að rökstyðja þitt mál. Þó svo að þú gætir það þá getum við ekki fylgt eftir í blindni einhverjum fáránlegum siðum , vanþróaðra samfélaga eins og USA. Verum frjáls. USA er það svo sannarlega ekki.

[Jens Guð, 3.2.2012 kl. 22:27]

  Hilmar,  það munar um hverja krónu.  Ekki síst gjaldeyrinn. 

  Ég átta mig ekki á hvað hefur farið fyrir brjóstið á þeim sem kvörtuðu undan bloggfærslunni þinni.  Ég sé ekkert í henni sem á að stuða neinn.

[Jens Guð, 3.2.2012 kl. 22:33]

  Jónas,  gjaldeyrisforði Íslendinga er í húfi.  Undir þannig kringumstæðum er sjálfsagt að taka tillit til tepruskapar útlendra ferðamanna.