Veitingaumsögn - Grill 66

 - Réttur:  Hamborgari

 - Veitingastaður:  Grill 66, bensínstöðinni í Álfheimum

 - Verð: 1235 kr.

 - Einkunn:  ** (af 5)

.

  Þýsk samloka,  kennd við hafnarborgina Hamborg,  nýtur vinsælda víða um heim.  Vinsældirnar felast sennilega í því að hamborgarasamloka er yfirleitt afgreidd með heitri nýgrillaðri kjötbollu.  Á síðustu árum er kjötbollan yfirleitt höfð flöt.  Það er heppilegt.  Þá er hún í jöfnu magni þvert yfir alla samlokuna. 

  Hamborgarar og pylsur fást í flestum bensínstöðvum á Íslandi.  Fátæklingum þykir þægilegt að grípa með sér heita fljótlagaða rétti af því tagi.  Kosturinn við pylsur og hamborgara er að það er mögulegt að naga þá undir stýri.

  Á bensínstöðinni í Álfheimum er veitingastaðurinn Grill 66,  nefndur í "höfuðið" á þjóðvegi 66 sem er að finna á Vestfjörðum.  Nánar tiltekið þá liggur hann frá Ísafirði til Kollafjarðar.  Svo skemmtilega vill til að það tekur 66 mínútur að aka þennan malarveg. 

  Að óreyndu mætti ætla að Grill 66 hafi byrjað sem veitingastaður við þjóðveg 66.  Svo er ekki.  Grill 66 er víða að finna á Íslandi.  En ekki á Vestfjörðum.  Þar með er komin hugsanleg skýring á nafninu:  Það vísar til þess að Grill 66 sé ekki við þjóðveg 66 en víða annars staðar.

 Nöfn á samlokum Grills 66 eru álíka langsótt.  Hamborgarinn sem hér er til umfjöllunar heitir Pontiac.  Fyrir utan nafnið á hann ekkert sameiginlegt með bílategundinni Pontiac.  Það er líka til smáþorp í Michigan sem heitir Pontiac.  Kannski lítur það út eins og hamborgari?

  Hamborgarinn Pontiac er 140 gr flöt nautahakksbolla með osti, steiktum lauk, sveppum,  jöklasalati og hamborgarasósu.  Hamborgarinn er safaríkur en bragðlaus.  Það er ágæt aðstaða til að snæða inni á veitingastaðnum en ég greip samlokuna með mér út.  Með í pakkanum var lítið plastmál sem innihélt kryddað salt fyrir franskar kartöflur.  Ég keypti ekki kartöflur.  Þess vegna dreg ég þá ályktun að saltkryddið hafi átt að fara á bragðlausan hamborgarann.  Kartöflukrydd hentar ekki á hamborgara.  Það er til hamborgarakrydd.  Best er krydd sem heitir "Best á hamborgarann".  Til þrautavara má komast af með aðeins pipar og salti.  Hamborgara þarf að krydda.  

  Ég get ekki mælt með Pontiac.  Nema menn taki sig á og kryddi kvikindið rækilega.  Verðið er of hátt.     

.

Fleiri nýlegar umsagnir: 

http://www.jensgud.blog.is/blog/jensgud/entry/1284984/

http://www.jensgud.blog.is/blog/jensgud/entry/1282151/

http://www.jensgud.blog.is/blog/jensgud/entry/1280116/

http://www.jensgud.blog.is/blog/jensgud/entry/1279446/

http://www.jensgud.blog.is/blog/jensgud/entry/1270414/

 

Opnar Joe & the Juice á Íslandi

Athugasemdir

[Björn Emilsson, 3.3.2013 kl. 02:02]

Subway býður Bát Mánaðirns á 450 kronur.  Hvað myndurðu telja hæfilegt verð fyrir Pointiacinn?

[Jens Guð, 3.3.2013 kl. 19:33]

  Björn,  rjúkandi heitur nýgrillaður hamborgari annarsvegar og hálfur (6") kaldur bátur hinsvegar eru ekki alveg í sama flokki.  Verð á kalda bátnum á frekar að bera saman við samlokur í kæliskápum stórmarkaða.  Þar fyrir utan er ósanngjarnt að bera saman verð á vöru sem er seld á fullu verði og vöru sem er á tilboðsverði.

  Annars held ég að tilboðsverð Subway á bát mánaðarins sé ágætt.  Ég tel að verðið á Pontiac eigi að vera undir 1000 kalli.