8 ára strákur pissaði á rútugólf

17.3.2007 | 23:06

8 ára strákur pissaði á rútugólf

Það var hárrétt ákvörðun hjá 8 ára strák að pissa á rútugólfið eftir að rútubílstjórinn hafði í þrígang neitað honum um pissustopp. Ég hvet alla rútufarþega sem ferðast á milli Reykjavíkur og Selfoss að sýna stráknum samstöðu með því að pissa líka á rútugólfið hjá þessum ósvífna rútubílstjóra.

Þessi frétt rifjar upp atburð sem átti sér stað á Austurland fyrir aldarfjórðungi eða svo. Þar kunna rútubílstjórar mannasiði. Í sætaferð eftir dansleik á Norðfirði þurfti ungur ofurölvi maður að pissa þegar rútan var uppi á miðju fjalli. Úti var svellglæra. Ungi maðurinn er rétt að byrja að pissa þegar hann rennur ofurrólega af stað á spariskónum. Hann tók ekki eftir neinu. En áfram rann hann hægt og rólega niður allt fjallið. Að mig minnir 3 kílómetra. Og tók aldrei eftir því að hann rann. Þegar hann rann yfir misjöfnur þá skrifaði hann það á ölvunarástandið. Loks er hann stoppaði hafði hann lokið við að pissa og renna upp buxnaklaufinni. Leit þá í kringum sig og skildi ekkert í hvað orðið hafði af rútunni.

Annar atburður í þessu samhengi. Á unglingsárum höfðum við Bauni, skólabróðir frá Laugarvatni, og Hrólfur, kunningi úr Keflavík, lent í partýi. Við rumskuðum þegar langt var liðið á dag og Hrólfur var ennþá blindfullur. Hrólfur átti engan pening en Bauni bauðst til að lána honum fyrir rútufari til Keflavíkur. Við röltum niður á Umferðarmiðstöð. Hrólf langaði í meira vín en það var allt búið. Við Bauni buðumst til að kaupa handa honum pilsner. Töldum honum trú um að ef hann myndi þamba 6 pilsnera á einu bretti þá myndi ekki renna af honum á leiðinni til Keflavíkur. Sennilega var það tilfellið.

Hrólfur varð afskaplega þakklátur og fylgdi fyrirmælum. Á meðan hann þambaði pilsnerinn laumaðist Bauni til rútubílstjórans. Kynnti sig sem gæslumann af Kleppi. Sagðist vera að fylgja vistmanni í rútuna. Móðir vistmannsins myndi taka á móti honum í Keflavík. Mjög áríðandi væri að hleypa vistmanninum ekki út úr rútunni því að þá tæki hann til fótanna út í buskann. Vistmaðurinn beitti jafnan því bragði að þykjast þurfa út að pissa. Besta ráðið væri að segja þá róandi við hann: "Við erum alveg að verða komnir, góði minn."

Bauni sótti síðan Hrólf og fór með til bílstjórans. Bílstjórinn sagði við Hrólf: "Það er best að þú sitjir hérna fremst hjá mér." Hann ætlaði greinilega að standa sína vakt.

Við Bauni fengum aldrei að vita hvernig ferðin gekk. Þrátt fyrir að spyrja Hrólf ítrekað næstu ár fengum við ekki annað svar en að okkur kæmi það ekki við. Sem gefur til kynna að eitthvað hafi borið til tíðinda þegar 2 lítrar af vatnslosandi pilsner fóru að streyma í þvagblöðruna.

P.s. Bauni er af mörgum þekktur sem dr. Guðmundur Rúnar Ásmundsson, ofurminniskennari. Hann hefur verið búsettur í Bandaríkjunum í kannski 15 ár en fór eins og stormsveipur um landið með kennslu í ofurminnistækni fyrir einhverjum árum.