Eggjasvindl

  Heilsugeirinn er uppfullur af plat heilsuvörum.  Allskonar vörur merktar sem lífrænt ræktaðar eru það ekki.  Allskonar húðvörur merktar sem alnáttúrulegar eru uppfullar af kemískum hráefnum.  Það kemur ekki á óvart þegar rannsókn matvælaeftirlits Bretlands hefur nú leitt í ljós að verulegt magn af eggjum sem seld eru sem afurð hamingjusamra lífrænt ræktaðra hænsna koma frá venjulegum hænsnabúum.

  Talandi um eggjasölu.  Kaupmaður á Sauðárkróki,  Bjarni Har,  hefur í áratugi rekið blandaða verslun með matvöru,  fatnað og fleira.  Hinumegin við götuna,  gengt honum,  rak Kaupfélagið 2 myndarlegar verslanir.  Annarsvegar vefnaðarvöruverslun.  Hinsvegar matvörubúð. 

  Einn daginn auglýsti Kaupfélagið tilboðsverð á eggjum.  Bjarni hengdi samdægurs upp í glugga hjá sér samskonar tilboðsverð.  Nokkrum dögum síðar bauð Kaupfélagið ennþá betra eggjaverð.  Bjarni bauð samstundis upp á sama verð.  Kaupfélagið vildi ekki láta litla kaupmanninn á horninu sprengja sig og lækkaði eggjaverðið í 3ja sinn.  Bjarni breytti strax verðinu hjá sér til samræmis.

  Að nokkrum dögum liðnum biður Kaupfélagsstjórinn Bjarna að koma á sinn fund.  Erindið var að semja um að þeir myndu hætta samtímis með tilboðsverð á eggjunum og selja þau með eðlilegri álagningu.  Lauk hann máli sínu með þessum orðum:  "Það gengur ekki til lengdar að við séum að borga með eggjunum."

  Bjarni svaraði:  "Mér er alveg sama.  Ekki borga ég með eggjunum.  Ég læt hana Helgu dóttir mína kaupa eggin í ykkar verslun og sel þau á sléttu."

  Í annað sinn var Bjarni í blaðaviðtali.  Umræðan snérist m.a. um það að verslunin var stöðugt rekin með tapi.  Blaðamanninum gekk illa að átta sig á hvernig hægt var að reka litla verslun með samfelldu tapi og spurði:  "Á hverju lifir þú þá?"  Bjarni svaraði:  "Veltunni."

 

Umfangsmikið eggjasvindl afhjúpað í Bretlandi

Athugasemdir

[Ásthildur Cesil Þórðardóttir, 19.3.2007 kl. 22:42]

Ég man eftir svona sögu líka frá Ísafirði.  Ætli þetta hafi tíðskast víða  Nema mig minnir að sagan hér hafi verið um kartöflur.

[Jens Guð, 19.3.2007 kl. 23:15]

Það er ekkert ósennilegt að litli kaupmaðurinn á horninu grípi til svona ráða oftar en maður heldur.  Ég þekki fleiri en eitt dæmi þess að verslunareigendur hafi keypt gos á tilboðsverði í Bónus fremur en hjá framleiðanda.  Um daginn var 2ja lítra Egils-kristall á 70 kall í Bónus.  Ég sá sjoppueiganda koma úr Bónus með fulla kerru vörunni.  Sennilega hefur hann ekið rúnt á milli Bónus-verslana vegna þess að nokkrum dögum síðar sá ég auglýsingu úti í glugga hjá honum:  "2ja lítra Egisl kristall á 99 kr."

[Vilborg Traustadóttir, 20.3.2007 kl. 00:10]

Það er alveg tilfellið.    Ég man þegar pabbi seldi gömlu beljurnar til "niðurrifs" í fiskbúðina.  Skömmu síðar var auglýst þar "úrvals nautakjöt".

[Ásthildur Cesil Þórðardóttir, 20.3.2007 kl. 08:47]

Skemmtilegasta sagan sem ég hef samt heyrt í sambandi við svona er um hann Benna á Mánakaffi, og hún er sönn.  Það veiddist risalúða úr sjó, og var landað í frystihúsinu í Hnífsdal.  Hún var sett í frysti, því það var eiginlega ekkert hægt að gera við hana.  Að lokum ákáðu eigendurnir að gefa Benna á Mánakaffi hana. 

Í marga, marga daga á eftir var lúða á borðum hjá Benna, Lúða ala þetta og lúða ala hitt.  Kostgangararnir voru farnir að tala um það sín á milli að fara og ganga til bols og höfðus á þeim sem gáfu Benna lúðuna.