Rykmaurar

  Rykmaurar eru útbreiddustu húsdýr heims.  Það eru til 2 tegundir af rykmaurum.  Önnur er tvöfalt stærri en hin.  Báðar eru vinalegar og sauðmeinlausar.  Hugsa ekki um neitt annað en kynlíf og að fá sér eitthvað gott að borða þess á milli.  Til að hafa orku í næstu törn.  Þetta eru einfeldningar sem velta sér ekki upp úr vaxtaokri bankanna eða hvort Íslendingar eigi að taka upp evru.

  Reyndar eru á fáum byggðum bólum jafn fáir rykmaurar og í íslenskum rúmum.  Erlendis eru yfirleitt milljónir rykmaura í einu rúmi.  Hérlendis eru bara nokkrir tugir í hverju rúmi þegar best lætur.  Í sumum rúmum engir.  Þurru og köldu veðurfari er kennt um.

  Til að losna algjörlega við rykmaura af sínu heimili er best að kaupa frystikistu.  Það er hægt að fá þær á 10.000 kall í Góða hirðinum.  Síðan er fyrsta verk þegar heimilisfólkið er komið á fætur að stinga öllum rúmfötum í frystikistuna.

  Um kvöldið,  þegar gengið er til náða,  eru rúmfötin tekin brakandi fersk úr frystikistunni.  Allir rykmaurar steindauðir úr kuldahrolli.  Það er hressileg útilykt af rúmfötunum þegar maður leggst á svalan koddann og breiðir grjótharða sængina upp að höku,  sæll og glaður vitandi að það séu engir maurar með dónaskap í rúmfötunum þá nóttina.  Þetta ráð má kalla kulda gegn klámi.   

Athugasemdir

[Jón Steinar Ragnarsson, 20.3.2007 kl. 03:00]

Ég heyrði rödd Örnólfs Thorlasíus undir þessum lestri. Hávísindalegt og fróðlegt.

Annað er með þetta vaxtaokur og verðtryggingu. Erum við algerirsauðir að láta þetta yfir okkur ganga?  Fyrir 10 milljón króna lán í 40 ár þurfum við út með 56 milljónir. Ef við tökum lánið til jafns í jenum og svissnenskum frönkum, borgum við 18 milljónir.  Við erum því að þræla út hundraðþúsundkalli á mánuði í 40 ár til að koma okkur sómasamlegu þaki yfir höfuðið. Segjum frá tvítugu til sextugs!  Sé tekið tillit til launa og okurs á öllum sviðum erum við í raun í ánauð eins og þrælar fyrir þessa glæpona.  Hvernig væri að farna að gera uppreisn gegn þessu?  Ef ekki þá erum við ekkert annað en rollur og eigum skilið slíka meðferð fyrir heimskuna.  Er engin leið að opna augu fólks fyrir þessu og bindast samtökum gegn þessu? Eigum við að halda áfram að tuldra ofan í bringuna á okkur á meðan við hlustum á hagnaðartölur stórfyrirtækja og banka og arðgreiðslur þeirra til hinna fáu útvöldu?

[Ásthildur Cesil Þórðardóttir, 20.3.2007 kl. 08:33]

Ef rykmaurarnir eru óþarfir, þá hefur Guð gert mistök, ef við gerum ráð fyrir að almættið geri ekki mistök þá hljóta maurarnir að hafa einhvern tilgang með tilveru sinni.  Nærast þeir ekki á dauðum húðfrumum ?

[Jens Guð, 20.3.2007 kl. 09:26]

Íslendingar eru hjarðdýr.  Láta bankana teyma sig eins og lömb til slátrunar.  90% lán,  100% lán.  Svo bara reddast þetta.

Rykmaurar eru óþarfir.  Þó að þeirra uppáhaldsmatur séu dauðar húðfrumur þá skilja þeir eftir jafn mikið af "ryki" í formi saurs og dauðra maura.  Það er saurinn úr þeim sem veldur rykofnæmi hjá mörgum.  Guðirnir voru bara að grallarast þegar þeir hönnuðu þessar 2 tegundir rykmaura. 

[Ásthildur Cesil Þórðardóttir, 20.3.2007 kl. 10:31]

[Stefán (IP-tala skráð) 20.3.2007 kl. 12:18]

Sennilega urðu sömu hönnunarmistökin við gerð rykmaura og Framsóknarmanna. Rykmaurar eru þó öllu meinlausari, en eiga það  þó sameiginlegt með Framsóknarmönnum að þola illa dagsljósið.

Stefán