Gervi platpizza

  Hvaða veitingahús selja gervipizzur og platpizzur?  Þau hljóta að vera nokkur.  Sum veitingahús reyna að aðgreina sig frá þeim.  Þau þurfa stöðugt að vekja athygli á því að þau selji ekta pizzur.  Önnur auglýsa að þau selji alvöru pizzur.  Enn önnur hamra á því að þau selji ekta alvöru pizzur. 

  Ég þekki ekki þennan pizzubransa.  Veit þó að lengst af hefur pizzan verið fátækramatur.  Þegar ekki eru til peningur fyrir alvöru mat á ítölskum heimilum þá er málinu reddað með pizzu.  Hnoðað í hveitibotn,  tómatsósu smurt ofan á.  Síðan er tekið til í ísskápnum og eldhúsruslafötunni.  Öllu ætilegu smalað saman,  skorið í bita og dreift yfir hveitibotninn.  Ofan á eru raspaðir niður allir ostaafgangar.  Þetta er látið bakast í ofni og börnin fara ekki svöng í rúmið þann daginn.  Þannig eru ekta alvöru pizzur. 

Athugasemdir

[Jón Steinar Ragnarsson, 23.3.2007 kl. 14:22]

Humar var nú fátækramatur í den og menn átu þann fjanda ekki nema þegar uppskerubrestur rak þá niður í fjöru eins og rollur í þangbeit. Annars er athyglisvert að hlusta á og pæla í hástigsmálnotkun auglýsenda og oft þversögnum og rakalausum þvættingi þeirra.  Erum við virkilega að hlaupa út í búð á grundvelli þessa trúboðs?

[Vilborg Traustadóttir, 23.3.2007 kl. 23:47]

Er þetta e-ð eins og Gervigrasafræðingur?

[Jens Guð, 24.3.2007 kl. 00:15]

Ég hef grun um það.  Ég veit ekki hvort fleirum en mér þykir titillinn gervigrasafræðingur sérstaklega kjánalegur.  Mér þykir hann út í hött.  Hann getur bæði þýtt að viðkomandi sé plat grasafræðingur og sérfróður um gervigras.  Ég veit ekkert um gras eða gervigras.  Þetta er bara eitthvað sem mér datt skyndilega í hug og þótti fyndið þegar ég skráði mig hér inn. Af því að mér er eðlislægara að bulla einhverja þvælu fremur en taka dægurþras hátíðlega þá kom þessi fíflalegi titill upp í hugann þó að nákvæmara væri að skrá mig skrautskriftarkennara eða heildsala.