Draumalandið

  Ég braust suður til Hafnarfjarðar í kvöld.  Gleymdi akstursgleraugunum.  Sá næstum ekki neitt.  Veit því ekki hvernig færðin var.  Elti bara afturljósin á næsta bíl á undan.  Sem var ekki nógu sniðugt.  Elti hann bæði í Nóatún og á bensínstöð.  En átti ekkert erindi á hvorugan staðinn.  Keypti mér samt sitthvað á báðum stöðum til að fara ekki erindisleysu. 

  Illa gekk mér að finna Hafnarfjarðarleikhúsið.  Þegar öll von virtist úti ákvað ég að hvíla lúin bein hjá Jóa í Fjörukránni.  Hann er búinn að gera Fjörukrána að afskaplega skemmtilegum stað.  Í þann mund sem ég var að stíga inn í Fjörukrána lenti ég í mikilli mannþröng.  Barst með straumnum fram og til baka um Fjörukráarhlaðið.  Loks bar mig smávegis af leið og inn í bakhús.  Þar tróðst þvagan inn í rökkvað bakherbergi.  Yfir gólfinu lá málningarplast og eitthvað drasl.  Til hliðar voru sætaraðir.  Þar settust allir.  Líka ég.  Enda þreyttur eftir þvælinginn,  eins og aðrir. 

  Varla hafði fólkið fyrr sest en allskonar fíflagangur upphófst á plastinu á gólfinu.  Fólk í einhverskonar málningargöllum sprellaði á milli þess sem það reifst og skammaðist.  Það er orðheppið þetta unga fólk.  Margt bráðfyndið valt upp úr því.  Söngvarinn úr pönksveitinni ágætu Atomstöðinni náði upp rokna stuði.  Hann er ágætur á gítar.  Salurinn fór á flug.  Klappaði og söng með.  Þetta var ljómandi gaman.  Dalvíkingur sem hefur hermt eftir Bubba í sjónvarpinu spilaði á bassa.  Paul McCartney er betri.  Þetta var mjög gaman.  Ég gleymdi tímanum.  Datt inn í brenglað tímaskyn hunds.  Skemmti mér svo konunglega.

  Allt í einu komst aftur hreifing á mannþröngina og ég barst með henni út í nóttina.  Þar hitti ég Ingibjörgu Guðmundsdóttur (BG & Ingibjörg).  Hún sagðist kíkja reglulega á blogg Jóns Steinars Ragnarssonar.  Í gegnum hans blogg hafði hún dottið inn á bloggið mitt.  Það detta sem sagt fleiri en ég.  Þá datt mér í hug að detta í það í kvöld.                    

Athugasemdir

[Jón Steinar Ragnarsson, 25.3.2007 kl. 01:00]

Þú hefur þá fundið draumalandið þrátt fyrir allt.  Ekki reyna að klína því á mig að þú hafir dottið í það AA prestinum sjálfum. Söng hún Ingibjörg ekki líka eitthvað um draumalandið í den? Eins og mig minni það. Frábær og heillandi manneskja.

[Jens Guð, 25.3.2007 kl. 01:12]

Mig er farið að gruna að ég hafi séð Draumalandið.  Ég man ekki eftir söng Ingibjargar um draumalandið.  En það er ekkert að marka.  Ég kann ekki öll lög hennar utan að.  Vildi þó endilega eiga þau á geislaplötu.  Afskaplega þægileg söngkona,  mikill mannvinur (var í Flokki mannsins og Húmanistaflokknum) og góð manneskja.  Gullfallega að utan sem innan. 

[IGG , 25.3.2007 kl. 01:48]

Ja hérna strákar þið eruð alveg dásamlegir. Takk fyrir allt skjallið! Jú jú Jens þú varst á/í Draumalandinu í kvöld - með mér - og fleirum. Mér fannst fíflalæti fólksins á plastinu mjög skemmtileg á köflum og einkar athygliverð. Sumt hafði meira að segja þau áhrif að ég var við það að brynna músum, enda afskaplega viðkvæm á vissum sviðum. Við eigum nefnilega bara eitt land og okkur ber að fara vel með það og varðveita til handa komandi kynslóðum. Það var glettilega margt í þessu Darumalandi líkt með grein Jóns Steinars um Mann-virkið. Þar fyrir utan má ég ég til að segja þér Jens að ég skellihló við lestur bloggfærslna þinna um leitina að leikhúsinu og tímaskyn hunda. Takk fyrir skemmtunina.

[Ásthildur Cesil Þórðardóttir, 25.3.2007 kl. 12:12]

Já þetta er skemmtilegur fundur.  Hæ Ingibjörg mín, og þetta samfélag verður alltaf skemmtilegra og skemmtilegra.