Gyllinæð

 

  5.  maí 1984 fæddist Daníel Ívar Ísfeld.  Hann varð 23ja ára gamall í gær.  Til hamingju með afmælið,  Danni minn.  Í mars 1999 stofnaði hann einhverja flottustu hljómsveit rokksögunnar,  Gyllinæð.  Með honum í hljómsveitinni voru trommusnillingurinn Maggi (sonur Magga Eiríks í Mannakornum).  Maggi trommari var síðar formlega kjörinn réttilega besti trommuleikari landsins (hefur síðan trommað með Andláti og Shadow Parade) og Gústi söngvari.  Danni spilaði á gítar.

  Strákarnir voru aðeins 14 - 15 ára þegar þeir stofnuðu Gyllinæð.  Þeir voru allir í Réttó.  Svo sérkennilegt sem það er þá var haldinn foreldrafundur í skólanum þegar hljómsveitin var stofnuð.  Ástæðan var sú að strákarnir tilheyrðu ekki sömu klíkunum og voru með kærur á bakinu fyrir ofbeldi og eitthvað slíkt.  Ótti skólayfirvalda gekk út á að ef þessir strákar næðu saman sem hljómsveit þá yrðu þeir ný og sameinuð hættuleg klíka.  Fulltrúar lögreglu og barnaverndar mættu á fundinn.  Niðurstaðan varð sú að á meðan strákarnir væru að spila músík þá væru þeir ekki að lemja skólabræður sína á meðan.  (Viðar,  þetta minnir á það þegar okkur var smalað í hljómsveitina Frostmark á Laugarvatni á sínum tíma).

  Gyllinæð starfaði í ár og vakti mikla athygli fjölmiðla.  Meðal annars frumflutti hún vikulega nýtt lag í þætti Tvíhöfða á X-inu.  Sjónvarpsstöð gerði umtalaðan þátt um hljómsveitina og Gyllinæð kom fram í fleiri sjónvarpsþáttum.  Hápunkti náði ferill hljómsveitarinnar þegar hún fór í tvígang í hljómleikaferð til Grænlands.  Báðar ferðirnar urðu ansi skrautlegar.        

  Á dögunum var sett upp síða um Gyllinæð á www.myspace.com/gyllinaed.   Síðan er rétt í burðarliðum og á eftir að hlaða utan á sig.  Væntanlega verða sjónvarpsþættirnir færðir inn á hana og fleiri lög.  Því miður fór hljómsveitin aldrei í hljóðver.  Lögin sem til eru með henni voru bara tekin upp á lítið kassettutæki á æfingum.

Athugasemdir

[Haukur Viðar, 6.5.2007 kl. 04:10]

Ég man eftir þessu. Þátturinn hét "Pétur og Páll" og það var Sindri Kjartans (bróðir Sigurjóns) sem var maðurinn á bak við þáttinn. Söngvarinn ætlaði út á lífið með einhvern hníf, sem þurfti að taka af honum. Tengistu þessum drengjum eitthvað?

Stórgóður þáttur, man hins vegar ekkert eftir tónlistinni.

[Davíð Frank (IP-tala skráð) 6.5.2007 kl. 20:33]

Það bráðvantar comeback frá Gyllinæðarmeisturunum !

[Quackmore, 6.5.2007 kl. 21:19]

Já, einhversstaðar á ég geisladisk með einhverjum 4 lögum frá þeim... Gyllinæð / Alsæla split album. Ertu að segja það Jens að það séu til fleiri lög og þú hafir ekki reddað mér þeim?!? (haha)

[Jens Guð, 6.5.2007 kl. 23:27]

  Ég á ekki önnur lög með Gyllinæð en þessi 3 á split-disknum.  En sá sem er að setja upp síðuna á eitthvað.  Og ég heyri að hann notar aðrar upptökur en á split-disknum. 

  Ég tengist Gyllinæð á ýmsa vegu. 

[Haukur Viðar, 8.5.2007 kl. 01:49]

"Ég tengist Gyllinæð á ýmsa vegu"

Ég hló, enda barnalegur