Leifur óheppni

19.11.2024 | 10:15

John Lydon (Rotten) er söngvari Sex Pistols og PIL. Hann hefur sent frá sér tvær sjálfsævisögur. Þær eru keimlíkar. Í annarri þeirra segir af meðstofnanda PIL, gítarleikaranum flotta Keith heitnum Levene. Lydon segir hann hafa verið fagmann í neikvæðni.

Nokkrum árum áður stofnaði Keith hljómsveitina The Clash. Hann þótti svo leiðinlegur að honum var sparkað.

Kunningi minn er í sama gír. Hann leyfir sér aldrei að gleðjast. Hann finnur ætíð einhverja vankanta á öllu. Gárungarnir kalla hann Leif óheppna.

Hann er tengdur bílaumboði fjölskylduböndum. Eitt sinn var hann í bílavandræðum. Umboðið gaf honum nýjan bíl. Kappinn hafði allt á hornum sér. Einkum var hann ósáttur við að bíllinn var hvítur. Hann hélt því fram að hvítir bílar væru ógæfutæki. Þeir lentu í árekstrum og fleiri vandamálum en aðrir bílar. Eftir langt ólundarskeið tókst honum að skipta á bílnum við vinnufélaga sem átti rauðan bíl. Sá var gamall og mikið keyrður. Öllu munaði að hann var ekki hvít slysagildra.

Svo bar til að við hittumst á asískum veitingastað. Í boði var meðal annars tilboðsréttur mánaðarins. Hægt var að velja á milli venjulegs skammts og stórs. Ég valdi venjulegan en vinurinn stóran. Er réttirnir voru bornir fram blasti við að skammtarnir voru álíka stórir. Eiginlega munaði aðeins að hans var á stærri diski. Þetta "óréttlæti" eyðilagði fyrir honum daginn. Skipti engu þó ég héldi því fram að hans skammtur væri í réttri stærð; ég hefði fengið óvenju stóran skammt.

Steininn tók úr er hann fékk lottóvinning upp á 9 millur. Í stað fagnaðar brotnaði hann niður. Þvílík ógæfa! Vikuna áður hafði 80 milljón króna vinningur gengið út. Kauða leið eins og hann hefði í raun tapað 71 milljón með því að fá vinning í "rangri" viku! Hann var svo miður sín að hann mætti ekki í vinnu í nokkra daga.

Flokkur: Tónlist | Facebook

Athugasemdir

Þetta minnir mig á! Vinur minn sem er mjög trúaður (hvað svo sem það þýðir) fer alltaf með bænir áður en hann fer að sofa. Konan hans er aftur á móti ekkert gefin fyrir bænir. Ég spurði hann einhverju sinni hvort hann hefði ekki áhyggjur af konu sinni að komast inn í himnaríkið? Nei, nei sagði hann. Alltaf þegar ég er búinn með mínar bænir segi ég alltaf: Hún Stína mín biður að heilsa!

Sigurður I B Guðmundsson, 19.11.2024 kl. 10:55

Ég hef oft lesið um tónlistarmenn sem hlusta mest á aðra tegund tónlistar en þá tónlist sem þeir flytja sjálfir. Það á t.d. við um pönkarann Johnny Rotten sem svo varð nýbylgjusöngvarinn John Lydon. Lydon hefur nefnt sem uppáhaldsplötur sínar, plötur með The Kinks, prog með Van der Graff Generator, þjóðlagarokk með Steeleye Span, kraut rokk með Can, glam art rokk með Roxy Music, Captain Beefheart, Kate Bush, Traffic, Marc Bolan, Cliff Richard, Alice Cooper, The Stooges, Kraftwerk og svo söng hann í rándýrt söngkerfi sem Sex Pistols stálu frá David Bowie.

Stefán (IP-tala skráð) 19.11.2024 kl. 11:13