Bítlarnir eða Stóns

  Fyrir nokkrum vikum setti ég inn skoðanakönnun.  Spurningin var:  Bítlarnir,  Stóns eða hljómsveitarnar metnar að jöfnu.  Úrslitin lágu fljótt fyrir.  Þau breyttust ekkert frá því að hundrað atkvæði voru greidd eða 455 atkvæði:

  62,4% kusu Bítlana.  25,7% Rolling Stones og 11,9% lögðu hljómsveitirnar að jöfnu.  Af þessari afgerandi niðurstöðu ræð ég að aðdáendur Rolling Stones séu fyrst og fremst rokkarar eða blúsistar. Bítlarnir höfði til mun breiðari hóps.  Þessi mikli munur kemur mér þó pínulítið á óvart.  Að óreyndu hefði ég ætlað að munurinn væri minni.

  Sjálfur geri ég ekki mun á þessum hljómsveitum.  Þannig lagað.  Í einhverjum tilvikum var nefnt að djúpstæðari áhrif Bítlanna á þróun poppmúsíkur hafi ráðið því hvor hljómsveitin var kosin.  Þau rök eiga fullan rétt á sér.  Burt séð frá því hvor hljómsveitin er í meiri uppáhaldi.      

Athugasemdir

[Kristín Björg Þorsteinsdóttir, 16.6.2007 kl. 04:28]

Söknuður?

[Maja Solla (IP-tala skráð) 16.6.2007 kl. 08:23]

Bítlarnir voru mikið spilaðir á mínu heimili, sem og flestum held ég. Grunar líka að þeir hafi verið svolítið meira áberandi í útvarpi og svoleiðis, sem gæti sagt til um hvers vegna fleiri kjósa þá fram yfir Stones, Bítlarnir voru og eru hreinlega "aðgengilegri".

[Haukur Nikulásson, 16.6.2007 kl. 09:50]

Hluti af þessu Jens er að Bítlarnir höfðu "hreinni" ímynd. Stónsararnir þóttu skítugri, grófari og gældu við djöfulinn (sbr. Sympathy for the Devil). Ég held að þetta hafi haft sín áhrif.

Ég er þó þeirrar skoðunar að tónlistarlega stóður Bítlarnir þeim framar í lagasmíðum, hljóðfæraleik, söng og upptökutækni (með George Martin).

Þar sem ég er að spila svolítið sjálfur kom það sjálfum mér á óvart að Stónslögin eru vinsælli sem ballmúsík heldur en Bítlalögin, hér munar þó ekkert miklu. Kannski er einfaldleiki og sterkara bít betra þegar fólk ætlar að dansa fremur en að hlusta.

Eins og áður þegar músík á í hlut, þetta eru allt bara smekksatriði. 

[Jens Guð, 16.6.2007 kl. 11:07]

  Klárlega er það rétt hjá þér,  Kristín skólasystir,  að söknuður á einhvern hlut að máli.  Bítlarnir hættu 1969 á meðan Stóns eru enn í fullu fjöri.  Sömuleiðis er það tilfellið,  eins og Maja nefnir,  að Bítlaplötur eru/voru til að fleiri heimilum.  Ég minnist viðtala við unga tónlistarmenn sem hafa sagt frá því að Bítlarnir voru spilaðir heima fyrir á uppvaxtarárunum.

  Ég tek undir með Hauki að það kemur á óvart að Stónslögin séu vinsælli á böllum.  Þó er ekki lengra síðan en í gær að í rás 1 var spiluð hljómleikaútgáfa af Honky Tonk Woman með Megasi (íslenskur texti).  Sömuleiðis hef ég tekið eftir því að margar ballhljómsveitir eru með Dead Flowers á dagskrá. 

[Georg P Sveinbjörnsson, 17.6.2007 kl. 02:14]

Komst aldrei eiginlega aldrei almennilega í samband við hvorugt bandið, ég var elsta barn á heimilinu og enginn eldri bróðir sem hafði áhrif á tónlistarsmekkinn, fyrsta platan sem ég keypti var Hinn Íslenski Þursaflokkur, fyrsta útlenska platan The Kick Inside með Kate Bush, síðan lá maður náttúrulega yfir þeim útvarpsþáttum sem þó voru að spila eitthvað annað en kannski það sem var allra vinsælast,.

Áfangar var þáttur sem ekki mátti missa af t.d og progrock og post-punk átti hug minn allan, verslaði allt sem ég gat með Pink Floyd, Genesis, Yes, King Crimson, Jethro Tull (forfallinn Tull´ari á fleiri ár, úff, get alls ekki hlustað á þá í dag) Patti Smith, Talking Heads,The Stranglers og Killing Joke...plötu eða geisladisk með Bítlunum eða Stones hef ég aldrei á ævinni verslað, samt eiga báðar heilan helling af lögum sem mér finnast skemmtileg í dag.... líklega eiga Rolling Stones þó vinningin ef ég yrði krafinn um svar.

[Jens Guð, 18.6.2007 kl. 00:10]

  Georg,  þú hefur greinilega fengið gott músíkuppeldi þrátt fyrir að hafa hvorki alist upp við Bítla né Stóns.  Satt að segja held ég samt að það sé fremur fátítt að hvorug þessara merku hljómsveita bankað á dyr.  Ef þú ert á höfuðborgarsvæðinu þykir mér líklegt að þú hafir verslað plötur með Patti Smith,  Talking Heads,  The Stranglers og snillinganna í Killing Joke af okkur sem stóðum að Stuð-búðinni eða Gramminu. Einkum þykir mér gaman að þú skulir hafa uppgötvað Killing Joke. 

  Þeir sem ekki þekkja Bítlana nema af útvarpsspilun eru yfirleitt með ranga mynd af plötum þeirra.  Það væri gaman ef þú hlerar á netinu lög eins og Helter Skelter eða Rain.  Hápunktur Rolling Stones voru plöturnar Beggars Banquet og Let it Bleed.