Óhugnanleg frásögn af ofsóknum

  Þetta byrjaði ósköp sakleysislega.  Tvær 15 ára stelpur döðruðu við - að þær héldu - jafnaldra sinn á msn.  Það átti eftir að breytast í fjögurra ára martröð.  Núna eru þessar stelpur orðnar tvítugar og tilbúnar að segja sögu sína.  Hún er sem hér segir:

  Fyrir 5 árum byrjuðu stelpurnar,  sem eru norskar,  að spjalla á netinu við "strák" í öðru norðurevrópsku landi.  Spjallið þróaðist út í það að  "strákurinn"  fór að tala um þær sem kærustur sínar.  Við það var þeim brugðið og vildu slíta sambandinu.  En hann hélt áfram að hafa samband við þær.

  Þegar stelpurnar báðu hann um að láta sig í friði sagðist viðkomandi vera faðir drengsins.  Drengurinn hafi framið sjálfsmorð.  Maðurinn ásakaði þær stelpur um að bera ábyrgar á sjálfsmorðinu og hann væri sjálfur að íhuga sjálfsmorð vegna harms yfir sjálfsmorði sonar síns.  Síðar kom í ljós að hann hafði aldrei eignast börn.

  Stelpunum var illilega brugðið við tíðindin og fóru í það hlutverk að reyna að hugga syrgjandi föðurinn.  Eftir stöðugt spjall í þrjá mánuði fékk hann stelpurnar til að hitta sig á hótelherbergi.  Til að gera langa sögu stutta þá hófst þar kynferðislegt samband þeirra.

  Maðurinn hélt því fram að hann væri á fertugsaldri.  Síðar uppgötvuðu stelpurnar að hann er á sextugsaldri.  Hann útskýrði fullorðinslegt útlit sitt,  hrukkur umhverfis augu og bauga,  með því að hann væri búinn að gráta svo mikið vegna sorgarinnar sem þær hefðu kallað yfir hann vegna sjálfsmorðs sonarins.

  Stelpurnar héldu áfram að hitta manninn.  Hann fór að hlaða á þær gjöfum og peningum.  Stelpurnar áttuðu sig seint og síðar meir á að maðurinn var sjúkur.  Þegar þær vildu slíta sambandi við hann tóku hótanir við.  Hann póstsendi þeim meðal annars ljósmynd af heimili þeirra með þeim orðum að hann væri búinn að borga mönnum háa fjárupphæð fyrir að kveikja í húsinu og brenna þær inni.

  Hann fór að saka þær um framhjáhald.  Sömuleiðis setti hann í innheimtu reikning sem hann hafði skrifað á þær upp á 5 milljónir íslenskra króna fyrir símakostnaði og fleiru.  Hann hélt einnig áfram að senda þeim allskonar skilaboð.  Meðal annars ljósmynd af legsteini með nafni hans á. 

  Þessu næst tók hann upp á því að senda vinum þeirra og fjölskyldu tölvupóst.  Hann hafði náð símaskrá af símum þeirra í gegnum eitthvað sem heitir bluetooth.  Jafnframt náði hann að hakka sig inn á tölvur þeirra og komst yfir netfangaskrá þeirra.  Í sendingum til vina þeirra vísaði hann á heimasíðu sem hann hafði útbúið.  Á henni voru nektarmyndir af stelpunum.  Þar fyrir utan útbjó hann tvær kynningar á þeim í þeirra nafni á netsíðu sem kallast Facebook.  Þar birti hann sömuleiðis nektarmyndir af þeim.   

  Vegna ofsóknanna hafa báðar stelpurnar skipt formlega um nafn í þjóðskrá og skipt um heimilisfang hjá Hagstofunni. 

  Norska lögreglan stendur ráðalaus gagnvart þessum ofsóknum vegna þess að maðurinn er ekki búsettur í Noregi.  Samt sem áður hafa stelpurnar komist að því að maðurinn hefur leikið sama leik gagnvart fleiri norskum stúlkum.  Og þær hafa vísbendingar um gagnvart stúlkum í fleiri löndum.

Athugasemdir

[Jóna Á. Gísladóttir, 23.7.2007 kl. 01:31]

Djöfull er til sjúkt fólk. Afhverju ætli það sé ekki hægt að láta yfirvöld í hans landi inn í málið?

[Jens Guð, 23.7.2007 kl. 01:50]

  Mér skilst að vegna þess að löndin standa utan við Evrópusambandið þá sé ekki hægt að setja alríkislögreglu Evrópusambandsins í málið.  Einhver alheimslögregla sem kallast Interpol fer ekki í málið nema maðurinn sé eftirlýstur fyrir að hafa brotið af sér eitthvað sem er skilgreint sem alþjóðalög:  Myrt einhvern,  stungið af frá dómi fyrir eiturlyfjasmygl eða álíka.  Þetta dæmi telst ekki vera nógu alvarlegt til að það dæmi grípi inn í atburðarrásina.  Stelpurnar hafa látið reyna á öll svona batterí.  Án árangurs. 

[Kolgrima, 23.7.2007 kl. 01:55]

Þetta er ógeðslegt - aumingja stelpurnar.

[Björg Árnadóttir, 23.7.2007 kl. 09:28]

Dæmi um sumt það versta í þessu dásamlega tæki, Netinu. Tala við dæturnar - og synina - vera viss um að þau skilji að þetta er ekki bara tuð í erfiðum foreldrum.

[Kristinn Birgisson (IP-tala skráð) 23.7.2007 kl. 10:30]

Má maður setja þessa frásögu inn á sitt eigið blogg, fleirum til varnaðar?

[Heiða (IP-tala skráð) 23.7.2007 kl. 12:09]

Það eru til fleiri dæmi af svona sögum. Þetta sem maðurinn gerði heitir að "fake-a" og það er svo mikið af svona dæmum á netinu. Sérstaklega á myspace.com og fleiri svoleiðis síðum. Þessu til varnar geta börn beðið viðkomandi sem þau eru að tala við að taka mynd af sér þar sem manneskjan heldur á blaði sem stendur á "msn addressa viðkomandi og nafn" eða þá ef að þetta er myspace prófíll þá er hægt að biðja viðkomandi að skrifa urlið sitt á blaðið. Þetta ættu allir að gera enda svoleiðis hægt að komast að hvort að er verið að plata sig eða ekki. Svo eru webcam nátturulega líka frábær tól.

[Jens Guð, 23.7.2007 kl. 13:37]

  Kristinn,  þér er það velkomið.  Láttu þess samt getið hvaðan frásögnin er sótt. 

[Búðardalsskrímslið (IP-tala skráð) 23.7.2007 kl. 13:54]

Margir hafa líka tælt ömmur til sín á fölskum forsendum og tekið síðan myndir af elliheimilunum.

[Guðsteinn Haukur Barkarson, 23.7.2007 kl. 17:27]

Úfff ... þetta er alveg hrikaleg lýsing! Eins gott að vera á verðbergi og tala við börnin okkar!

[Guðrún B. (IP-tala skráð) 23.7.2007 kl. 18:58]

Þetta virðist vera algengt, því miður, kanski ekki í akkurat þessari mynd, en svona atburðir gerast bara allt of oft.

Ég verð að segja það að eftir því sem tæknin verður betri, því hættulegri verður hún. Á mínu heimili er reglan sú, að eftir því sem við verðum tæknilegri á heimilinu, því harðari verða reglurnar samfara því.  Eina leiðin til að vernda börnin okkar eins mikið og við mögulega getum, er að halda þeim eins mikið frá tækniheiminum eins og hægt er. Þvi miður.  

[Ómar Ingi, 23.7.2007 kl. 21:17]

Hrikalega mikið til af sjúku fólki þarna úti og eins gott fyrir fólk að hafa varan á þegar samskipti eru höfð á netinu það er nokkuð ljóst en þessi saga er MJÖG ógvekjandi og verður nú vonandi öðrum víti til varnaðar.

[Heiða Þórðar, 23.7.2007 kl. 22:57]

Svakalegt!

[Eva Björk Hjartardóttir (IP-tala skráð) 23.7.2007 kl. 23:46]

Jiii þetta er hræðilegt  að fólk skuli geta verið svona geðveikt !

[Jón Steinar Ragnarsson, 24.7.2007 kl. 02:38]

"Síðar kom í ljós að hann hafði aldrei eignast börn." ???  Hvaðan kom þessi setning?  Ég fæ ekki fyrir nokkurn mun áttað mig á henni í þessu samhengi.

[Jens Guð, 24.7.2007 kl. 03:06]

  Þessi setning á að upplýsa að saga mannsins um sjálfsmorð sonar hans var ósönn.  Hann átti aldrei son. 

[Óskar Þorkelsson, 24.7.2007 kl. 11:49]

Ég hef einfalda reglu á netinu.. ég trúi engum á spjallborðum .  Netið er oft vettvangur fólks sem á undir högg að sækja í eðlilegum samskiptum manna á milli.. í skjóli netsins geta þau verið hver sem er og njóta þess að kvelja saklaust fólk.

[Jens Guð, 24.7.2007 kl. 14:07]

 Guðlaugur,  með því að birta ofangreinda færslu er ég nákvæmlega að vekja athygli á því sem Óskar Þorkelsson setur fram í sinni athugasemd.  Mér virðist sem þú sért að reyna að snúa viðvörunarorðum hans um hættur spjallborða netsins upp í gagnrýni á mína bloggfærslu og draga sannleiksgildi frásagnarinnar í efa.

  Þetta mál hefur fengið mikla umfjöllun í norskum fjölmiðlum.  Ég fylgdist með umræðunni,  meðal annars í gegnum Verdens Gang.  Það má alveg vera rétt að Interpol taki á barnaklámi og barnaníðingsmálum.  Samkvæmt upplýsingum norsku lögreglunnar er þetta mál hinsvegar ekki nógu alvarlegt til að vera tekið fyrir.

  Það er ágætt að vera tortrygginn og gagnrýninn á allar bloggfærslur.  En það er líka auðvelt að falla í þá gryfju að gera sig kjánalegan með því að afneita upplýsingum sem auðvelt er að sannreyna.  Athugasemdir við eina færslu þurfa yfirleitt ekki að verða fleiri en 20 uns einhver hefur gert sig að fífli á þann hátt.        

[Vilmundur Kristjansson (IP-tala skráð) 24.7.2007 kl. 14:08]

Ég hef heyrt um svipuð dæmi og veit um dæmi þar sem ofsóknir á netinu voru til staðar í nokkur ár, þó ekki hafi það verið kynferðislegt. Svo þetta með að passa sig á netinu, passa börnin sín og ráðast gegn svona óhugnaði með öllum mögulegum ráðum er meira en lítið í lagi.

Þessi saga er þannig að engin nöfn eru nefnd, svo ekki beinist hún að neinum persónulega. Og mér er skítsama hvort hún er sönn eða ekki, eða eitthvað er misfarið með, eða að í henni sé sannur kjarni og krítað liðugt með. Það fylgir mannkyninu að segja sögur og ef sagan ber í sér góðan tilgang eða kennslu af einhverju tagi , þá á hún fullan rétt á sér.

Af þessarri sögu má læra það að trúa engu á netinu. Þar af leiðandi myndi ég standa upp og taka ofan fyrir þér, ef ég bara væri með hatt.

[Jón Steinar Ragnarsson, 24.7.2007 kl. 15:57]

Ég er engu nær.  Enginn veit hver maðurinn er eða hvort sjálfsmorðsagan er sönn eða ósönn eða allavega hvort hann á son í alvöru eða ekki.  Hann virðist allavega ekki hafa tjáð sig opinberlega um slíkt en þvert á móti haldið þessu til streitu við fórnarlömbin til að fá sínu fram.  Hvar kom í ljós að hann ætti engin börn og hvenær?

[Óskar Þorkelsson, 24.7.2007 kl. 19:20]

jón Steinar :).. hér ...

Þegar stelpurnar báðu hann um að láta sig í friði sagðist viðkomandi vera faðir drengsins. Drengurinn hafi framið sjálfsmorð. Maðurinn ásakaði þær stelpur um að bera ábyrgar á sjálfsmorðinu og hann væri sjálfur að íhuga sjálfsmorð vegna harms yfir sjálfsmorði sonar síns. Síðar kom í ljós að hann hafði aldrei eignast börn.

[Jens Guð, 24.7.2007 kl. 21:30]

  Jón Steinar,  færslan er skrifuð eftir minni og er þess vegna ekki hárnákvæm í smáatriðum.  Ég rakst fyrir tilviljun á umræðu um þetta mál á norskri bloggsíðu.  Þar kom fram að VG væri með opnuumfjöllun um þetta.  Ég renndi yfir hana og endursagði stutta útgáfu í þessari færslu.  Ég man ekki eftir að beinlínis hafi verið tekið fram að maðurinn hafi aldrei átt börn heldur var að heyra á umræðunni að  upplýsingarnar sem maðurinn mataði stelpurnar á væru tilbúningur í þeim tilgangi að veiða þær í net sitt.  Ég var kannski að oftúlka með því að nefna að hann eigi ekki börn,  vegna þess að það hefur ekki verið sérstaklega tekið fram.  Þetta er ónákvæmi sem skiptir ekki máli út af fyrir sig.  Það skiptir heldur ekki máli hvort sagan er sönn,  þó að mér þyki ólíklegt að VG spinni svona upp.  Enda af nógu slíku að taka sem er staðfest.  Þar fyrir utan er vitnað í eitthvert nafngreint fólk sem þekkir til málsins.  Það eru ekki tveir mánuðir síðan norska lögreglan greip 32ja ára norskan mann sem hún telur að hafi misnotað allt að 100 stelpur á aldrinum 10 - 15 ára.  Hann þóttist vera jafnaldri þeirra og fékk þær til að afklæðast og gera klámfengna hluti fyrir framan webkameru.  Upptökurnar seldi hann síðan til annarra barnaníðinga.  Hann er jafnframt talinn hafa haft kynferðislegt samneyti við tvær stelpnanna.

  Með því að slá upp frásögnum af svona vonast ég til að vekja foreldra,  börn og unglinga til umhugsunar um hætturnar sem leynast á spjallrásum netsins.  Um það snýst málið.  Það er stóri punkturinn en ekki hvort farið er nákvæmlega rétt með öll smáátriði í frásögninni.        

[Jón Steinar Ragnarsson, 24.7.2007 kl. 22:19]

Nei allt í lagi Jens minn.  Ég hnaut bara um þetta og fannst einkennilegt.  Framtakið er gott út af fyrir sig en ég vil nú minna á að Verdens Gang hefur nú aldrei verið hátt skrifuð heimild.  Er í raun sorpblað á borð við DV nema 10 sinnum verra.  Annars eru fleiri blöð kominn á þennan level. Sá að þeir hjá blaðinu voru að biðja Glúm JónsBaldivinsson afsökunnar á lítt áberandi stað á innsíðu yfir uppslætti sem varðaði viðveru hans í vinnu hjá tryggingastofnun.  Þetta er eitt af fjölda dæma um slík vinnubrögð undanfarið.  Eitt var varðandi harðgifta fegurðardrottningu og móður hér, sem sögð var vera komin með nýjan kærasta.  Afsökunin var svipað áberandi á þeim rógburði. Ég er löngu farinn að taka fréttaflutning með fyrirvara, sérstaklega ef um hneykslismál er að ræða.  Þessi fíkn í ofbeldi og neikvæðni virðist óslökkvandi hjá þessum sneplum.

[Jón Steinar Ragnarsson, 24.7.2007 kl. 22:24]

Óskar: akkúrat þessi taglhnýtingur:" Síðar kom í ljós að hann hafði aldrei eignast börn." er það sem ég hnaut um.  Spurningin er hvar og hvernig þetta kom í ljós ef engin deili eru vituð á manninum.  Ég hlyt bara að vera svona hlandvitlaus eða þú blindur.

[Jens Guð, 24.7.2007 kl. 22:44]

  Jón Steinar,  minn kæri skólabróðir,  það er bara fínt að fá aðhald með að vera ekki of kærulaus í frásögnum af svona málum.  Eins og mér er tamt að bulla í kæruleysi um flesta hluti þá tek ég kynferðisbrotum gegn börnum alvarlega.  Og fer í allt annan gír þegar þau eru annarsvegar. 

  VG tilheyrir gulu pressunni.  Samt er það töluvert áreiðanlegra en bresku götublöðin.  Þar sér maður oft ansi frjálsleg vinnubrögð.  Og stundum hreinar lygar.  DV varð til muna áreiðanlegra eftir að Eiríkur Jónsson hætti þar. 

[Óskar Þorkelsson, 26.7.2007 kl. 22:47]

þetta segir allt :

http://www.69.is/openlink.php?id=72342