Skondið atvik rifjað upp

 

  Vegna frétta um að söngkonan Kim Wilde hafi gist á Egilsstöðum fyrir helgi þegar hún var á leið til Færeyja þá rifjaðist upp skemmtilegt atvik.  Það átti sér stað á G!Festivali í Götu í Færeyjum fyrir 2 árum.  Meðal þeirra sem þar komu fram voru gömlu jálkarnir í sænsku þungarokkshljómsveitinni Europe.  Síðhærðir miðaldra liðsmenn hljómsveitarinnar skáru sig dálítið úr í samanburði við stuttklippta ungliða annarra hljómsveita. 

  Þarna var einnig stelpnahljómsveit frá Vestmannaeyjum,  VaGínas.  Í augum stelpnanna í VaGínas litu karlarnir í Europe allir eins út:  Gamlingjar með sítt hár sem þeir allir skiptu í miðju.  Stelpurnar fengu þó stjörnur í augun þegar þær gengu fram á einn Europe-liðann daginn eftir.  Þær drógu í hvelli upp penna og blöð til að herja út eiginhandaráritanir.  Jafnframt ljósmynduðu þær sig í bak og fyrir með heimsfrægu poppstjörnunni.  Þeim þótti spaugilegt að þessi heimsvana súperstjarna fór hjá sér við ákafa og hrifningu stelpnanna.  Hann var hreinlega feiminn við þær.

  Á heimleið til Íslands sýndu stelpurnar samferðarfólkinu afrakstur ferðarinnar:  Myndir af karlinum úr Europe og eiginhandaráritanir hans.  Þeir sem betur þekktu til Europe sáu strax að myndirnar voru ekki af neinum úr Europe.  Nafnið á eiginhandaráritunum,  Jógvan á Heygum,  passaði heldur ekki við neinn í Europe.  En hljómar mjög færeyskt. 

 

 

Færeysk tónlistarhátíð fauk út í veður og vind

Athugasemdir

[Magnús Geir Guðmundsson, 5.8.2007 kl. 16:17]

Góðan dag Jens!

Hvaða "Egils(staða)syni" giftist svo káta Kim? Missti alveg af þessari "stórfrétt"!

Annars er þetta ekki fagurt til frásagnar um Vestmanneyskar rokkpíur!

[Jens Guð, 5.8.2007 kl. 17:19]

  Mér skilst að hún hafi bara stoppað á Egilsstöðum yfir blánóttina.  Ég veit lítið um þessa konu.  Þykir músíkin hennar leiðinleg.  En þó tel ég mig muna að hún sé gift og þau hjón hafi heimsótt Þórólf Árnason,  fyrrum borgarstjóra,  fyrir nokkrum árum.   

[Magnús Geir Guðmundsson, 5.8.2007 kl. 17:52]

Það var og! Verð nú sjálfur bara að játa, að ég man ekki einu sinni eftir hennar tónlist!

[Helgi Már Barðason, 5.8.2007 kl. 18:10]

Þetta er dóttir gamla rokkarans Marty Wilde. Hann söng Endless Sleep og Bad Boy (sem hann samdi og margir hafa flutt, m.a. Nirvana) og hann samdi lika I'm A Tiger fyrir Lulu. Kim Wilde er svo sem engin stjarna, fremur en karl faðir hennar, en hún er heldur ekki söngkvenna verst, finnst mér. Karlinn er í fullu fjöri, að mér skilst, nýbúinn að gefa út plötu og þar syngja þau feðginin a.m.k. eitt lag saman. Og lýkur þá svo gott sem allri minni vitneskju um Reginald Smith, síðar Marty Wilde, og dóttur hans Kim...

[Jens Guð, 5.8.2007 kl. 18:32]

  Kim söng nokkur vinsæl lög um eða upp úr 1980.  Ætli Kids in America sé ekki þekktasta lagið með henni.  Mig minnir að bróðir hennar semji uppistöðuna af lögunum sem hún syngur.  En vertu feginn,  Maggi,  að muna ekki eftir neinu með henni. 

[Óskar Þorkelsson, 5.8.2007 kl. 18:56]

Kim Wilde var wilde á Klúbbnum sællar minningar.. svo var hún soldið sæt !

[Jón Þór Bjarnason, 6.8.2007 kl. 11:08]

Skemmtileg saga :) ... þetta hefur verið hápunktur dagsins hjá Jógvan á Heygum