Allt í rugli á Prestbakka

 

  Frá því að byggð reis í Breiðholti hefur sú hefð skapast í raðhúsunum á bökkunum að hver hugsar um viðhald síns húss.  Einungis gaflar hafa verið sameiginlegt viðhaldsverkefni.  Um þetta hefur ríkt samhugur og engin ágreiningsmál kviknað.  Fyrr en núna á Prestbakka.

  Fjórir af 6 íbúðareigendum í raðhúslengju þar hafa ekki sinnt viðhaldi á húsþökum.  Þökin hafa hriplekið til margra ára og eru við það að grotna niður.  Eigendurnir horfa fram á háan kostnað.  Rætt var við Húseigendafélagið.  Þar var hvatt til þess að farið yrði eftir fjölbýlishúsalögum um sameiginlegan kostnað allra íbúða við þakviðgerðir.  Þar með yrðu þeir íbúðaeigendur sem þegar hafa skipt um þak á eigin reikning neyddir til að taka einnig þátt í kostnaði við ónýt þök skussanna.  Þetta þótti sumum skussanna heillaráð

  Einn íbúðareigandinn vinnur hjá Almennu verkfræðistofunni.  Sú stofa var fengin til að halda utan um verkið.    

  Svala Jóhannesdóttir og Hebbi Guðmunds búa á Prestbakka 15.  Þau endurnýjuðu þakið hjá sér fyrir nokkrum árum.  Og þykir eðlilega ósanngjarnt að þurfa að borga fyrir endurnýjun á þökum hjá öðrum.  Þegar þau reyna að höfða til sanngirnissjónarmiða er vísað í Húseigendafélagið og lögin.

  Meirihlutinn í raðhúslengjunni kyrir málið áfram af mikilli hörku.  Fyrst var mánaðargjald húsfélagsins ákveðið 50.000 kr.  Sem þykir í hærri kantinum.  Síðan var það hækkað í 500.000 kr.  Það er yfir þeim mörkum sem venjuleg fjölskylda ræður við ofan á önnur útgjöld við rekstur heimilis. 

  Ég hef imprað á þessu áður:    http://jensgud.blog.is/blog/jensgud/entry/271662/

  Framkvæmdir við Prestbakkann eru hafnar.  Svölu og Hebba undrar hvernig staðið er að málum.  Smiður var fenginn til að rölta í kringum raðhúsalengjuna og punkta niður hvar steypuskemmdir sjást og fleira sem þarf að laga.  Fyrir röltið kom reikningur upp á 165.000 kr.  Hebbi þekkir smið sem var til í að rölta þennan hring án þess að taka krónu fyrir.  Og punkta niður hvað þarf að lagfæra.

  Það er allt eftir þessu.  Almenna verkfræðistofan var búin að rukka 2 milljónir kr. fyrir sína aðkomu ÁÐUR en verkframkvæmdir hófust.   

  Verktaki sem tók að sér múrvinnu hefur tvívegis sést á svæðinu.  Laxveiðiárnar mega ekki bíða.  17 og 22ja ára guttar,  sem eru í vinnu hjá honum,  sjá um verkið.  Þeir brutu niður vegg á milli Prestbakka 17 og 19.  Slógu síðan upp mótum fyrir nýjum vegg.  Steypubílar mættu á svæðið og steypunni var hellt í mótin.  Þegar slegið var utan af þessu blasti ónýtur veggur við.  Guttarnir höfðu ekki áttað sig að það þarf að járnbinda steypu. 

  Þá var byrjað upp á nýtt á fullum taxta (hátt á fimmta þúsund kall með vsk á tímann).  Að þessu sinni var járnbundið.  Samt sem áður er veggurinn lítið skárri en í fyrri atrennu.  Húseigandinn á nr. 17 hringdi í verktakann.  Sá reif bara stólpakjaft.  Var sennilega pirraður yfir að vera truflaður með veiðistöng úti í miðri á.  Hebbi er að hugsa um að fá sett lögbann á framkvæmdir.   

  Ef smellt er á myndirnar þá stækka þær og verða skýrari.

 

Athugasemdir

[Ragnheiður , 11.8.2007 kl. 17:05]

þetta virðist vera hið skelfilegasta mál. Endar áreiðanlega fyrir dómstólum og þá ætla ég að fylgjast með

[Jens Guð, 11.8.2007 kl. 17:23]

  Það er einsýnt að málið fer fyrir dóm.  Hebbi og Svala neita að greiða hálfa milljón á mánuði í hússjóðinn.  Það er búið að stefna þeim.  Þarna verður tekist á um lagabókstaf annarsvegar og hinsvegar um hefð og sanngirnissjónarmið.  Hebbi er að safna undirskriftum í bökkunum þar sem húseigendur staðfesta hefðina. 

  Lögin eru ekki 100% nákvæm.  Þeir sem sömdu lögin um fjölbýlishús hafa viðurkennt að miðað var við blokkir en ekki raðhús.  Það hafi einfaldlega gleymst að taka sérstaklega til raðhúsa.  En þeir hafa jafnframt afsakað sig með þeim orðum að ef raðhúslengja væri reist upp á rönd þá væri hún hálfgerð blokk með einu þaki. 

[Halla Rut , 11.8.2007 kl. 18:23]

Hebbi vinur þinn á að senda öllum íbúum lengjunnar skeyti þar sem hann neitar að taka þátt í kostnaði vegna þessara framkvæmda. Ef í málaferli fer seinna er það eina sem virka að hafa vaðið fyrir neðan sig. Þetta getur ráðið úrslitum ef til málaferla kemur.  

[Laglegi lagasmiðurinn (IP-tala skráð) 11.8.2007 kl. 19:57]

Ég myndi bara senda öllum hinum reikninginn fyrir minni viðgerð, uppfærðum til núvirðis, og greiða þeim svo fyrir þeirra viðgerð með þeirra eigin peningum. Málið leyst og allt í gúddí.

[Þóra Sigurðardóttir, 11.8.2007 kl. 20:04]

Ég hef aldrei skilið hvað fjölbýlahúseigendur eru tilbúnir til að halda uppi verkfræðistofum þessa lands 

[Ásdís (IP-tala skráð) 12.8.2007 kl. 01:57]

Húsfélagið hjá mér borgaði verkfræðiskrifstofu 200 þúsund fyrir að skila skýrslu um ástand hússins, það voru heftuð saman 2 blöð með myndum af sprungum í steypunni.  Fyrir neðan myndirnar stóð " hér þarf að laga"  hélt ég yrði ekki eldri.

Fáránlegt hvað er hægt að rukka fyrir.

Var búin að heyra af þessu máli með þakið.  Þau eiga að fara með þetta eins langt og þau geta, þetta eiga þau ekki að borga.

[Jens Guð, 12.8.2007 kl. 16:15]

  Þegar verið er að undirbúa jarðgangnagerð eða hanna stóra brú er nauðsynlegt að láta verkfræðistofu halda utan um dæmið.  En að láta verkfræðistofu koma að viðhaldi á raðhúsi eða blokk er bara peningur út um gluggann.  Mikill peningur út um gluggann. 

[Haukur Nikulásson, 13.8.2007 kl. 09:40]

Ég er hræddur um að Hebbi eigi litlar varnir í þessu máli. Ef þetta lið hefur ákveðið að vera óbilgjarnt og gera það sem lög leyfa hef ég bara eitt ráð fyrir Hebba: Bjóða mér og nokkrum öðrum að æfa hljómsveit þarna með öflugustu mögnurum sem fást öll kvöld til kl. 23.30 sem er tímalengd skv. lögreglusamþykkt. Byrja svo kl. 8 á morgnana að spila háværust rokkmúsík af plötum sem finnst með kraftmiklum lánsmögnurum. Allt er þetta innan ramma laganna með sambærilegum hætti og hin ósvífinin!

Úr því að maður er byrjaður á því sem löglegt en siðlaust er ég viss um að aðrir lesendur hafi fullt af ámóta ráðum sem ættu að duga. 

[Jens Guð, 13.8.2007 kl. 20:19]

  Haukur,  ætli sé ekki heppilegra að bíða niðurstöðu dómsstóla ÁÐUR en gripið er til svona aðgerða.  Hugmyndin er samt góð. 

  Bubbles,  ég tek undir með þér að það er erfitt að átta sig á hvað sumt fólk er reiðubúið að ganga langt í ósanngirni og yfirgangi þegar mál snúast um peninga.  Þetta er angi af græðgivæðingunni sem farin er að hreiðra um sig í íslensku samfélagi.

  Á mínum uppvaxtarárum í sveitinni í Skagafirði lögðu menn metnað í að sýna sanngirni gagnvart nágrönnum og öðrum.  Ekki síst þegar mál snérust um peninga.  Menn aðstoðuðu hvern annan,  lánuðu peninga eða annað og ekkert var fært á blað.  Menn þurftu ekki einu sinni að handsala þannig hluti með handabandi.  Orð stóðu. 

  Og ef einhver átti í erfiðleikum með eitthvað þá var hlaupið undir bagga.  Fyrir kom á einhverjum bæjum að heyskapur lenti í hrakningum.  Kannski vegna veikinda heimilisfólks,  bilunar í heyvinnuvélum eða annars. 

  Þeim sem betur gekk með heyskap renndu þá með sín tæki til viðkomandi og gengu í verkið.  Stundum voru jafnvel samankomnar dráttarvélar með öllum græjum frá 5 - 10 bæjum.

  Þegar æskuheimili mitt brann þá birtust tugir manna með hamar og sög og komu húsinu í íbúðarhæft ástand. 

  Þessi nýja hugsun sem gengur út á yfirgang og græðgi er andstæða gömlu gildanna.  Þetta er ógeðfelld þróun.  Ég held þo að þjóðin almennt hafi skömm á svona frekju.  Þessir sem lifa í firringu eigingirni og sjálfshverfu eru fáir.  En jafn skelfilegir þeim sem fyrir þeim verða.