Diskó og pönk

  Ég kíkti á skemmtilega sýningu í Árbæjarsafni.  Hún heitir Diskó og pönk.  Þar hitti ég tónlistarmann frá Akureyri sem stundar íshokkí.  Ég nefndi við hann að mér þætti gaman að sjá á sýningunni sitthvað sem ég kom að á sínum tíma.  Meðal annars auglýsingu pönkplötubúðinni minni Stuð.

  Maðurinn sagðist þá hafa keypt plötur í póstkröfu frá búðinni.  Það sem honum þótti sérkennilegt var að ásamt plötunum innihélt pakkinn límbandsrúllu,  reglustriku,  tússpenna og samanbrotin auglýsingaplaköt fyrir pönkplötur. 

  Hann mundi eftir því að hafa beðið um hraðafgreiðslu á plötunum vegna þess að þær átti að nota á diskóteki um helgina.

  Þarna hafði greinilega einhver verið að flýta sér um of við að ganga frá póstkröfunni. 

  Eftir smá spjall rifjaði ég upp að eitt sinn hafði Sævar frændi minn Sverrisson,  meðeigandi búðarinnar,  söngvari og frábær náungi,  verið að flýta sér svakalega við að senda póstkröfu til Akureyrar.  Hann hafði þann hátt á að nota reglustriku við að skrifa utan á póstkröfur.  Í umræddu tilfelli týndi hann reglustrikunni í miðju kafi og gleymdi að bæta krók undir y í Akureyri. 

  Tveimur dögum síðar var hringt frá Akureyri.  Viðmælandinn hellti sér yfir Sævar fyrir að skrifa einfalt i í Akureyri.  Hótaði að hætta frekari viðskiptum við Stuð-búðina ef menn gætu ekki lært að skrifa y í Akureyri.  Sævar reyndi að slá þessu upp í létt grín.  Þá spurði viðkomandi þessarar áleitnu spurningar:

  "Hvernig myndi þér líða ef þú fengir póstkröfu þar sem ekkert y væri í Reykjavík?"

  Maðurinn sem ég hitti í Árbæjarsafni taldi sig ráma í að vera sá sem gerði þessa athugasemd.  Sem er merkilegt þar sem við afgreiddum daglega 3 - 5 póstkröfur.  

Athugasemdir

[Einar Bragi Bragason., 16.8.2007 kl. 00:07]

Og svo má bæta við að Sævar er einn af bestu blús söngvurum landsins.

[Jens Guð, 16.8.2007 kl. 00:20]

Sævar er mjög góður söngvari.  Jafnvígur á marga músíkstíla.  Einstaklega lagvís,  með gott vald á raddbeitingu og með sterka söngrödd.  Líka góður í röddun.  Músíkalskari maður er vandfundinn.   Þar fyrir utan frábærlega skemmtilegur náungi.  Stuðbolti og góður frændi.  Það er alltaf líf og fjör þar sem Sævar er.   

[Ásthildur Cesil Þórðardóttir, 16.8.2007 kl. 08:26]

Gaman að svona sönnum sögum úr fortíðinni.  Og merkilegt að þið skilduð einmitt báðir ráma í og hittast.

[Steini Briem (IP-tala skráð) 16.8.2007 kl. 09:57]

Það ætti náttúrlega að vera vaxmynd af Jens Guði á öllum söfnum þegar búið er að safna honum saman.

[Markús frá Djúpalæk, 16.8.2007 kl. 13:56]

En finnst ykkur ekkert merkilegt að æska okkar sé komin á safn, það eru nú ekki nema 20-30 ár síðan þetta var....

[Jens Guð, 17.8.2007 kl. 01:45]

  Jú,  Markús,  það er skrítið að sjá æskubrek sín í Árbæjarsafni.  En líka skemmtilegt.  Sum af þessu var ég búinn að gleyma og það er gaman að rifja það upp.

  Steini,  vonandi lifi ég það aldrei að gerð verði vaxmynd eða stytta af mér.  Ég hef andúð á öllu slíku.