Rýnt í niðurstöður könnunar um besta rokksöngvarann

  Hvað er skemmtilegra en góð skoðanakönnun?  Ekkert.  Nema kannski ennþá betri skoðanakönnun.  Þannig var einmitt síðasta skoðanakönnun.  Þar var reynt að finna besta íslenska rokksöngvarann.  Ég dró línuna við að þá sem ráða við öskursöngstílinn sem einkennir gott rokk.  Ég útilokaði þá sem eru minna þekktir og þá sem hafa ekki verið í hringiðunni til margra ára.  Niðurstaðan var eftirfarandi:

 

1.  Bubbi 27,9%

  Sigur Bubba kemur ekki á óvart.  Ekki aðeins vegna vinsælda kóngsins heldur einnig vegna þess að hann hefur þol í góða rokkdagskrá.  Sama hvort hefur verið með Utangarðsmönnum,  Egói,  Das Kapital,  MX-21 eða Stríði & friði. 

2. Eiríkur Hauksson 19,5%

  Ég bjóst við að bilið yrði styttra á milli á Eika og Bubba.  Eins og Eiki er frábær rokksöngvari þá er að öllum líkindum léttpoppið að þvælast fyrir honum í svona könnun.  Margir þekkja hann einungis sem Eurovisjon-söngvara. 

3. Jenni í Brain Police 9,4%

  Framan af í könnunni vakti undrun mína að nafni minn var lengst af ekki öruggur í 3ja sætinu.  Ég var svo viss um að hann næði þessu sæti.  Í spjalli við kunningja mína verð ég var við að sumir telja hann dálítið einhæfan söngvara.  Engu að síður eru allir séu sammála um að hann sé frábær söngvari.

4. Atli Fannar í Haltri hóru 8,8%

  Ég sá ekki fyrir að Atli Fannar yrði í 4ða sæti.  Að vísu er Hölt hóra frábær hljómsveit og Atli Fannar vel að þessu sæti kominn.  Ég skemmti mér alltaf rosalega vel á hljómleikum Höltu hórunnar.  En ég var ekki búinn að átta mig á að staða Atla Fannars og Höltu hórunnar væri ekki svona sterk.      

5. Bóas í Reykjavík! 8,6%

  Bóas er bara frábær söngvari.  Líka frábær "performer".  Mér þótti reyndar gamla hljómsveitin hans,  Vígspá,  ennþá skemmtilegri hljómsveit en Reykjavík!   Það er af því að ég er sérvitur.

6. Biggi í Gildrunni 8,2%

  Ef einhver er John Fogerty Íslands þá er það Biggi í Gildrunni.  Getur öskrað út í eitt án þess að blása úr nös og getur þanið sig í hæstu hæðir. 

7. Birkir Fjalar í I Adapt 6,6%

  Birkir Fjalar var ekki aðeins frábær trommari í Bisund og Stjörnukisa heldur einhver líflegasti söngvari harðkjarnans. Hann gefur allt í dæmið.     

8. Siggi Pönk í Forgarði helvítis 6,0%

  Siggi Pönk er bara snillingur.  Hjúkka og anarkisti.  Er til flottari blanda?  Forgarðurinn er einhver kraftmesta hljómsveit rokksögunnar.  Og ekki er hann síðri með pönksveitinni DYS.

9. Krummi í Mínus 5,1% 

  Eðal töffari og eðal söngvari í eðal hljómsveitinni Mínusi.  Ég hefði viljað sjá Krumma ofar á listanum.  En það er svo sem ekki slæmt að vera einn af 9 bestu rokksöngvurum landsins.   

Athugasemdir

[Markús frá Djúpalæk, 23.8.2007 kl. 14:27]

Já eða Bjögga ?

[Jens Guð, 23.8.2007 kl. 14:44]

  Bjöggi átti það til að syngja rokk fyrir margt löngu.  Og gat það alveg.  Sjálfur hefur hann þó sagt að honum þyki "lang skemmtilegast að syngja ballads."

[Morðingjaútvarpið, 23.8.2007 kl. 14:47]

Vígspá var uppáhaldshljómsveitin mín í öllum heiminum. Ég hélt svo mikið upp á þá að þegar þeir urðu bassaleikaralausir þá fékk ég að láni bassagítar og kenndi sjálfum mér á bassa á mettíma. Þvílík staðfesta. Svo sótti ég um og varð seinasti bassaleikari þessarar ágætu hljómsveitar.

En þá var komin þreyta í samstarfið hjá strákunum. Engu að síður þá bjó ég að þessari reynslu eftir að hljómsveitin lagði upp laupana, og hef verið hljómsveitarskítalabbi síðan.

-Haukur

[Jens Guð, 23.8.2007 kl. 14:52]

Ekki vissi ég að þú hafir verið bassaleikari í þessari glæsilegu hljómsveit.  En svona lærir maður alltaf eitthvað nýtt í bloggheimum. 

[Morðingjaútvarpið, 23.8.2007 kl. 14:54]

Ég náði seinasta eina og hálfa árinu sem þeir störfuðu.

Gáfum út misheppnaða lokaplötu og allir fóru grenjandi sína leið

[Óskar Þorkelsson, 23.8.2007 kl. 16:09]

þó ég sé aðdáandi Bubba númer 3 , þá finnst mér Eiríkur Haukson vera okkar langbesti rokkari.  Hann hefur þetta allt.  Bjöggi halldórs hefur aldrei verið 
rokkari.  En hvað með Stebba Hilmars ?

[Fríða Eyland, 23.8.2007 kl. 16:16]

Eigi get ég kallað þetta góða skoðanakönnun þó ég gjarnan vildi það vantaði alltof marga mugison-megas-langasela-stebba h ogfl...... 

REYNDU AFTUR 

[Björg F (IP-tala skráð) 23.8.2007 kl. 17:04]

Sammála með Sigga Pönk.. en hvað með Röggu Gísla? mér finnst hún vera besti rokkari sögunnar...

[Res (IP-tala skráð) 23.8.2007 kl. 17:41]

Pálmi Gunn+Labbi koma líka sterkir inn

[Heiða B. Heiðars, 23.8.2007 kl. 20:03]

Viltu kíkja á mitt blogg og hjálpa til (aftur) ?? Please!!

[Jens Guð, 23.8.2007 kl. 22:49]

  Fríða,  eins skemmtilegur og góður tónlistarmaður Mugison er þá er hann ekki beinlínis hörku rokkari.  Hann beitir ekki rokksöngstílnum (öskurstílnum) sem ég dreg línuna við.  Mugison á heima á lista yfir bestu söngvarana eða bestu poppsöngvarana.  En ekki rokksöngvarana. 

  Til að skýra þetta betur þá erum við ekki í vafa um að Metallica og Korn eru rokkhljómsveitir.  En Ólöf Arnalds er ekki beinlínis rokkari.

  Langi Seli er fínn söngvari.  Og getur sem rokkabillý-söngvari talist verið rokksöngvari.  En lenti í mínu vali utan línunnar.  Líka vegna vissu um að hann hafi ekki raunhæfa möguleika á að vera valinn besti íslenski rokksöngvarinn.  Ég persónulega hef gaman af honum og Skuggunum. 

  Megas er í miklu uppáhaldi hjá mér.  Í bók um Megas sem kom út fyrir nokkrum árum er langt viðtal við mig vegna þess að ég hef fylgst náið með ferli meistarans.  Og var - að ég held - upphafsmaður þess að kalla hann meistara Megas.  Söngstíll Megasar er hluti af því hvað músík hans er skemmtileg.  Ég get mátað Megas við að vera besti í hinu og þessu sem snýr að músík.  Í nýlegri skoðanakönnun hjá mér sigraði Megas sem besti íslenski lagahöfundurinn.  En Megas kemur seint til greina sem besti íslenski rokksöngvarinn.

  Björg,  er Ragga Gísla ekki betur staðsett í væntanlegri könnun um bestu íslensku rokksöngkonurnar?

  Res,  ég er sammála því að Pálmi Gunn og Labbi koma sterkir inn.  Ég er aðdáandi þeirra beggja.  Ég var á báðum áttum með það hvort ég ætti að hafa Pálma þarna inni.  Hann er tilfinningaríkur söngvari og sannfærandi túlkandi með fína rödd.  En ef Pálmi væri með þá yrðu líka að vera með:  Bjöggi,  Rúni Júl,  Stebbi Hilmars,  Hebbi Guðmunds,  Sigurður Dagbjartsson,  Sævar Sverris og einhverjir 20 - 30 aðrir frambærilegir poppsöngvarar. 

  Ef þannig væri staðið að málum myndi ég þurfa nokkur þúsund greidd atkvæði til að raunhæf niðustaða fengist.  Jafnfram væri kosningin farin að snúast um besta íslenska poppsöngvarann fremur að könnun um það sem mig langaði til að fá niðurstöðu í:  Besta íslenska rokksöngvarann þar sem viðmiðið er hart dúndur rokk.