Kristjana með Gyllinæð

 

  Gunnar Hrafn Jónsson,  blaðamaður,  bað mig í athugasemd í gær um fleiri lög með Gyllinæð í tónspilarann minn.  Það er mér ljúft og skylt.  Þannig að núna var ég að setja í tónspilarann lagið um hana Kristjönu.  Sú merka kona hafði meiri áhrif á hljómsveitina en hana óraði fyrir.

  Danni gítarleikari og Maggi trommari voru 14 ára og Gústi söngvari 15 ára þegar þeir stofnuðu Gyllinæð vorið 1999.  Þeir voru allir í Réttó,  misgóðir vinir og óvinir,  þegar þeir komust að því að þeir hlustuðu allir á sömu hljómsveitirnar.  Þá ákváðu þeir að stofna hljómsveit með engum bassaleik.

  Þegar þeir löbbuðu á fyrstu hljómsveitaræfinguna pissuðu þeir utan í húsið hennar Kristjönu.  Sennilega voru þeir að djússa.  Kristjana varð þeirra vör,  hljóp út og reyndi að berja þá með kústskafti.  Einhverjar sögusagnir voru um að Kristjana þjáðist af gyllinæð.

  Strákarnir voru því komnir með efnivið í fyrsta lagið.  Þeir sömdu lag um Kristjönu.  Þetta sem nú er komið í tónspilarann minn.  Jafnframt skýrðu þeir hljómsveitina í höfuðið á henni.  Eða rassinn réttara sagt.

  Eins og önnur lög með Gyllinæð í tónspilaranum er þetta lag tekið upp á kassettutæki á æfingu hjá hljómsveitinni.  Hljómgæði eru því ekki upp á marga fiska.  En það er allt í lagi.  Þetta er dauðapönk eins og það kemur hrátt af skepnunni.  

  Heyra má aðrar upptökur við sömu skilyrði af sömu lögum og einu til á www.myspace.com/gyllinaed.

  Það er broslegt eftir á að hyggja að þegar Gyllinæð var stofnuð var haldinn foreldrafundur í Réttó með fulltrúa frá lögreglu og barnaverndarnefnd.  Áhyggjuefnið var það að fyrst að þessir drengir væru búnir að ná saman í hljómsveit gæti það leitt til þess að til yrði Gyllinæðarklíka sem öðrum nemendum í Réttó gæti stafað ógn af.  Niðurstaðan varð þó sú að á meðan strákarnir fengju útrás í tónlistinni væru þeir ekki að lemja aðra krakka á sama tíma.

  Eftir að Gyllinæð hætti hefur Maggi gert það gott með harðkjarnasveitinni Andláti og Shadow Parade. 

Athugasemdir

[Haukur Nikulásson, 10.1.2008 kl. 00:46]

BON - Ég hlustaði á lagið til enda!

[Jens Guð, 10.1.2008 kl. 01:23]

  Ég hélt að þú myndir segjast hafa sett lagið á "repeat" í alla nótt. 

[Gunnar Hrafn Jónsson (IP-tala skráð) 10.1.2008 kl. 02:55]

Takk kærlega fyrir þetta! Mjög svo flott band sem ég hafði ekki hugmynd um að hefði verið til fyrr en ég sá þá hérna á blogginu hjá þér :)

[Sigurður Þórðarson, 10.1.2008 kl. 10:16]

Takk fyrir þessa færslu.  Gyllinæð er frumleg og skemmtileg hljómsveit. Hvar er auðveldast að nálgast þennan disk?

[Jens Guð, 10.1.2008 kl. 14:37]

  Það kom aldrei út diskur með Gyllinæð.  Að vísu voru þessi lög með hljómsveitinni fjölfölduð fyrir grænlenska fjölmiðla þegar Gyllinæð fór í fyrsta skiptið í hljómleikaferð þangað sumarið 1999.  Eitt af þessum lögum slæddist að auki inn á safnplötuna Tyrkland sem var gefin út til styrktar fórnarlömbum jarðskjálfta. 

[Siggi Lee Lewis (IP-tala skráð) 10.1.2008 kl. 18:16]

Afar fallegur texti, og skemmtileg tónsmíð. Ég hugsa að geimskutla frá NASA myndi ganga á þessu lagi.....