Hver voru bestu lög Johns Lennons?

 

 Í nýjasta hefti breska tónlistartímaritsins Uncut eru tugir helstu lagasmiða rokksins fengnir til að komast að niðurstöðu um það hver eru bestu lögin sem liggja eftir John Lennon.  Þetta er lið á borð við Ray Davies (The Kinks),  Brian Wilson (The Beach Boys),  Neil Young,  Mick Jagger,  Billy Bragg,  Frank Black (Pixies),  Roger McGuinn (The Byrds),  Johnny Rotten (Sex Pistols),  Liam Gallagher (Oasis),  Paul Weller o.  fl. 

  Listanum fylgir ítarleg grein ásamt ljósmyndum af Friðarsúlunni í Viðey.  Þar kemur fram að útsendarar Uncut komu til Íslands í tilefni af vígslu súlunnar. 

  Þannig lítur listinn út yfir bestu lög Johns Lennons:

1.  Strawberry Fields Forever.  Á smáskífa með Bítlunum,  útg. í febrúar ´67.  Náði efst í 2. sæti breska vinsældalistans en toppsæti þess bandaríska. 

2.  Yer Blues.  Á Hvíta albúmi Bítlanna frá ´68.  Nú er ég hissa.  Að vísu held ég mikið upp á þetta hrjúfa og Led Zeppelin-lega blúslag.  En ég hefði aldrei veðjað á það sem næst besta lag Johns Lennons.

3.  Instant Karma.  Á sóló smáskífu ´70.  Komst í 5. sæti breska vinsældalistans og 3. sæti þess bandaríska.

4.  All You Need Is Love.  Á smáskífu með Bítlunum ´67.  Toppaði vinsældalista út um allan heim og stimplaði orðið "love" inn sem lykilorð hippahreyfingarinnar. 

5.  You´ve Got to Hide Your Love Away.  Á Bítlaplötunni Help frá ágúst ´65.

6.  In My Life.  Á Bítlaplötunni Rubber Soul frá desember ´65.

7.  Give Peace a Chance.  Sólósmáskífa frá ´69.  Lenti hálf neðanjarðar í Bandaríkjunum vegna þess að boðskapurinn passaði ekki við stríðsrekstur Bandaríkjanna í Víetnam,  Kambódíu og víðar.  Fjöldi bandarískra útvarpsstöðva,  plötubúða og tímarita sniðgekk lagið.  Lennon var neitað um vegabréfsáritun til Bandaríkjanna þegar platan kom út.  Samt náði lagið 14. sæti bandaríska vinsældalistans og 2. sæti þess breska.

8.  Revolution.  B-hlið smáskífunnar Hey Jude með Bítlunum frá ´68.  Þetta lag olli fyrsta alvöru ágreiningi Johns og Pauls McCartneys.  Paul var dauðhræddur við afleiðingar þess að í textanum deilir John harkalega á vinstri róttæklinga hippahreyfingarinnar.   Þekkjandi sinn gamla vin vissi Paul að óvarlegt væri að benda John á það.  Hann hefði brugðist þversum við og jafnvel umskrifað textann með miklu harkalegri gagnrýni.  Þess í stað sagði Paul að lagið væri óheppilegt til útgáfu.  Það væri alltof langt og alltof hægt.  Paul til vonbrigða tók John þessu sem góðri ábendingu.  Hann hljóðritaði lagið upp á nýtt í mun hraðari og styttri útgáfu.  Hin útfærsla lagsins endaði á Hvíta albúminu síðar sama ár.  Þar mildar Lennon gagnrýnina á róttæku hippana með því að lesa lágt orðið "in" ofan í orðið "out" þar sem hann syngur um að Mao-isminn fæli sig frá (count me out).

9.  Cold Turkey.  Sólósmáskífa frá ´69.  Textinn fjallar um kvalarfull fráhvarfseinkenni heróínneyslu en Lennon hafði ánetjast heróíni næstum tveimur árum áður.  Hart,  þungt og erfitt lag sem skoraði ekki hátt á vinsældalistum (#14 í Bretlandi og #30 í Bandaríkjunum).  Enda víðast bannað í útvarpi vegna reglunnar um að ekki megi spila lög sem fjalla um dópneyslu.

10.  I´m the Walrus.  B-lag á smáskífunni Hello Goodbuy með Bítlunum ´67.  Einnig á Ep-plötunni Magical Mystery Tour sama ár.  Að óreyndu hefði ég haldið þetta lag vera ofar á listanum.  Samkvæmt mínum smekk er þetta eitt albesta Bítlalagið og þar með Lennon-lagið.  Hefur m.a. verið "coverað" af Oasis. 

11.  Across the Universe.  Á Let it Be plötu Bítlanna ´70.

12.  Imagine.  Af samnefndri sólóplötu og einnig smáskífu ´71.  Vinsælasta sólólag Lennons og það lag hans sem oftast hefur verið "coverað" af öðrum flytjendum.  Hefur toppað vinsældalista út og suður.  Alheimskirkjuráðið óskaði formlega eftir því að fá þetta lag sem einkennislag ásamt því að fá að breyta orðinu "engin" trúarbrögð í "ein" trúarbrögð.  Því hafnaði Lennon eðlilega þar sem textinn er upptalning á helstu ástæðum stríðs.  Ef bara væru ein trúarbrögð hefði heimurinn misst af mörgum stríðum.  Seinna gaf Yoko Ono lagið til Amnesty International.  Sennilega vegna óánægju með að hin ýmsu fyrirbæri notuðu lagið sem sitt einkennislag.  Meðal annars Margret Thatcher í einni af sinni kosningabaráttu og réttlætti það með því að í eina skiptið sem John nýtti kosningarétt sinn þá kaus hann breska Íhaldsflokkinn þó að Bítlarnir styddu opinberlega Verkamannaflokkinn.

13.  Power to the People.  Sólósmáskífa 1971.  Hún var bönnuð í Bandaríkjunum og Bretlandi vegna klámlags á B-hlið,  Open Your Box.  Náði þó 7. sæti breska vinsældalistans.

14.  A Hard Days Night.  Smáskífa með Bítlunum frá ´64 og toppaði vinsældalista víða um heim.  Einnig titillag samnefndrar breiðskífu sem jafnframt toppaði vinsældalista.

15.  Happy Xmas (The War is Over).  Sólósmáskífa 1972.  Sívinsælt jólalag sem meðal annars hefur verið gefið út með íslenskum texta.  Vinsælasta jólalag Bítils.              

16.   Working Class Hero.  Af sólóplötunni Plastic Ono Band frá 1970.  "Coverað" af Marianne Faithful,  Green Day,  Manic Street Preachers,  Marlyn Manson og ótal öðrum.

17.  The Ballad of John and Yoko.  Síðasta smáskífulagið sem Bítlarnir gerðu ´69. Reyndar sjá John og Paul tveir um allan flutninginn.  1. sætis lag út um allt.

18.  How Do You Sleep.  Kvikindislegur níðsöngur um Paul McCartney af sólóplötunni Imagine ´71.

19.  Dear Prudence.  Af Hvíta albúmi Bítlanna 1968.

20.  She Said,  She Said.  Á Bítla-plötunni Revolver frá ´66.

21.  Help!  Bæði á samnefndri smáskífu og breiðskífu með Bítlunum 1965.  1. sæti vítt og breitt um heiminn.

22.  Jealous Guy.  Af sólóplötu Johns Imagine ´70.  Síðar toppaði það vinsældarlista í flutningi Roxy Music.

23.  Gimme Some Truth.  Einnig af Imagine plötunni.  Varð vinsælt í flutningi bresku pönksveitarinnar Generation X (Billy Idol).

24.  #9 Dream.  Af sólóplötunni slöppu Walls and Bridges frá 1974.

25.  God.  Á sólóplötunni Plastic Ono Band 1970.

26.  I´m So Tired.  Af Hvíta albúmi Bítlanna 1968.

27.  Mother.  Á sólóplötunni Plastic Ono Band 1970.  Eitt af mínum uppáhalds Lennon-lögum. Öskursöngur hans í þessu lagi er einn sá flottasti í rokksögunni.  Nafn skosku hljómsveitarinnar Primal Scream er skýrt í höfuðið á þessum öskursöng. 

28.  This Boy.  B-lag á Bítla-smáskífunni I Want to Hold Your Hand frá 1963.

29.  Whatever Gets You Through the Night.  Af sólóplötunni leiðinlegu Walls and Bridges 1974.  Flaug í 1. sæti bandaríska vinsældalistans í flutningi Johns og Eltons Johns. Og varð til þess að leiða saman aftur John og Yoko Ono eftir 2ja ára aðskilnað og rosalegs fyllerís Lennons (kallað "týnda helgin"). 

30.  Beautiful Boy (Darling Boy).  Af dúettplötu Johns og Yoko-ar Double Fantasy 1980.  Textinn fjallar um son þeirra,  Sean Lennon.

  Á þennan lista vantar sárlega Happiness is a Warm Gun af Hvíta albúmi Bítlanna frá 1968.   

 

 

Athugasemdir

[Óskar Þorkelsson, 20.1.2008 kl. 23:52]

afhverju þarf að gera upp á milli þessara snilldarlaga.. öll hafa þau sinn sess og öll hreifa þau við mismunandi tilfinningum og minningum.

[Theódór Norðkvist, 21.1.2008 kl. 00:07]

Af hverju er Norwegian Wood ekki á listanum? Er það vegna þess að Paul á viðlagið?

[Bubbi J. (IP-tala skráð) 21.1.2008 kl. 00:29]

Sammála með að "Happiness is a Warm gun" vantar, ætti að vera á topp tíu. Þar ætti "Working class hero " líka að vera. Skondið að "This boy" hafi komist á listann, en ég er ánægður með að friðartuggan ofspilaða hafi ekki komist á topp tíu....

[Bubbi J. (IP-tala skráð) 21.1.2008 kl. 00:31]

Friðartuggan er auðvitað "Imagine"

[Jens Guð, 21.1.2008 kl. 00:38]

  Óskar,  ég játa veikleika minn eða áhuga fyrir svona listum.  Sem mikill Bítladellukall hef ég rosalega gaman af að velta mér upp úr svona listum.  Ef að þú rennir yfir listann yfir þá sem að lögðust yfir dæmið þá er virkilega gaman að skoða þeirra niðurstöðu.  Ekki síst vegna þess að sumt kemur mér á óvart í niðurstöðunni og eitt og annað skilur eftir spurningamerki.  En við erum að velta fyrir okkur viðhorfi snilldar lagahöfunda á borð við Ray Davies,  Brians Wilsons,  Billy Braggs og annarra sem eru atvinnulagahöfundar og hafa marg sannað sig sem slíkir.

  Theódór,  já,  vissulega sakna ég lagsins Norwegian Wood á þessum lista.   Aldeilis frábært lag og frábærlega flutt af Bítlunum.  Paul á hinsvegar ekki viðlag lagsins.  John var búinn að semja lagið frá A-Ö þegar hann bað Paul um að prófarkalesa textann (eins og þeir báðir gerðu oft á þessum tíma).  Paul lagði til að textinn yrði áhrifaríkari ef að húsið yrði eldi að bráð.  John varð afar ánægður með þessa athugasemd Pauls og breytti textanum til samrýmis við það.  Síðar skilgreindi hann framlag Pauls til textans sem 20% af endalegri útkomu sönglagsins.  Eftir sem áður kom Paul hvergi nálægt lagasmíðinni.    

[Jens Guð, 21.1.2008 kl. 00:44]

  Bubbi,  ég er þó verulega ánægður með að Working Class Hero sé á listanum þó að það sé ekki á Topp 10.  Ég hef stundum lent í því hlutverki að kenna fólki á gítar og það er sérlega þægilegt að byrja á svona 2ja hljóma lagi (að vísu kemur eitt D sem aukalega á einum stað). 

[Jens Guð, 21.1.2008 kl. 00:49]

  Bubbi, Imagine er dálítið tvíbent lag. Það er svo útjaskað í flutningi allt frá lyftumúsíkur (muzak),  "relaxing" pan flautu viðbjóðs til óperusöngvara að syngja ömurlegt popp. Samt frábært lag og frábær texti. 

[Theódór Norðkvist, 21.1.2008 kl. 01:20]

Mig minnti að ég hefði heyrt að Paul hefði samið annað hvort textann í viðlaginu, eða viðlagið sjálft, en hann á sem sagt mjög lítið í því. Þá hefði það átt að vera á listanum.

Norwegian Wood er ekki kraftmesta lag Lennons, þar kemur Revolution sterklega til greina, en laglínan er mjög sérstök í NW og sítarspilið gefur laginu nánast dulrænan blæ. 

[Lára Hanna Einarsdóttir, 21.1.2008 kl. 01:50]

Ekki hvarflar að mér að reyna að gera upp á milli laga Lennons. Og í mínum huga eru þessi lög í orginal útgáfum, ekki lyftutónlistarútgáfum eða öðrum slíkum. Einstaka tónlistarmanni hefur tekist að túlka lög hans svo vel fari, en orginalarnir eru samt alltaf það sem upp úr stendur.

[Ylfa Lind Gylfadóttir, 21.1.2008 kl. 01:51]

Sæll Jens, var að sjá kommentið frá þér áðan hér neðar á síðunni, endilega sendu mér heimilisfangið þitt í e-mail [e-mail] og ég skal senda þér plötuna,  mér þætti óendanlega gaman að heyra hvað þér þykir um hana

[Jens Guð, 21.1.2008 kl. 02:12]

  Theódór,  ég er með þetta alveg á hreinu.  Ég hef lesið samhljóða frásögn Johns og Pauls á þessu lagi. Reyndar er svo gaman að þeir voru báðir mjög hreinskiptir um það hvor samdi hvað.  Það er innan við 1% ágreiningur þeirra á milli hver samdi nákvæmlega hvað. Sem er næstum ótrúlegt miðað við að John var hálfur út úr heiminum á árunum ´67 - ´69 vegna gífurlegrar dópneyslu.  En undirstrikar samt hvað þeir tveir voru óendanlega hreinskiptir varðandi samstarfið.  Eina dæmið sem ég man eftir að sé - og þó ekki - ágreiningsmál er að Paul hefur haldið því fram eftir fráfall Lennons að hann eigi hlut í laginu Give Peace a Chance.  Paul hefur þó - mér vitanlega - aldrei útskýrt það.  Hann hefur flutt það lag á hljómleikum og kynnt það sem lag þeirra Lennons.  Ég man eftir einu viðtali við Paul þar sem hann var spurður um það hvert framlag hans til lagsins hafi verið og hann svaraði diplómatískt:  "Ég er skráður meðhöfundur.  Á þessum tímapunkti hefði John ekki skráð mig meðhöfund ef að ég væri það ekki."     

[Jens Guð, 21.1.2008 kl. 02:32]

  Ylfa Lind,  ég ætla að kaupa plötuna þar sem ég finn hana til sölu.  Ég er búinn að heyra að minnsta kosti 3 - 4 góð lög af henni.  Þetta er ekki spurning um kostnað við að eignast hana.  Einhver 1000 eða 2000 kall við að ná plötunni skiptir mig ekki máli.  Ég kann vel við það sem ég hef heyrt af henni og er búinn að ákveða að eignast þessa plötu.  Vertu ekkert að eltast við það dæmi.  Ég næ plötunni á þessu ári.  Mér liggur ekkert á.  Ég er kominn á sextugsaldur og tilveran er hæg hjá gamla manninum.  En ef þú endilega vilt þá er póstfang mitt Pósthólf 8848, 128 Reykjavík.   

[Jens Guð, 21.1.2008 kl. 03:14]

  Theódór,  listi Uncut miðaðist við lög sem Lennon samdi einn frá A-Ö.  Sem lög, vel að merkja burt séð frá texta.  Þess vegna komu ekki til greina mörg lög sem hann samdi með Paul McCartney.

 Sítarinn í NW gerir mikið fyrir lagið. Eins og John var andvígur sítarnum til að byrja með.  Hann hafði andúð á þessu "mónótóníska asíurugli".  En vegna djúprar vináttu þeirra George Harrisons lét hann eftir sér umburðarlyndi.  "Fyrst að Harrison er svona heillaður af þessu sítargutli þá bara okay gegn því að hann sætti sig við að ég noti "fuzz" petal á gítarinn."  George nefnilega hataðist út í "fuzz" gítarpetal Johns.  George mótmælti honum við öll tækifæri og var kannski eini gítarleikari Bítlarokksins sem aldrei notaði "fuzz" petal.

  Annað merkilegt:  George Harrison var hugsanlega eini gítarleikari Bítlarokksins sem aldrei hafði áhuga á blús.  John og Paul voru miklir blúsistar,  rétt eins og liðsmenn Rolling Stones,  Kinks,  Who,  Animals og svo framvegis.  En George þótti blús bara þunglamaleg og leiðinleg músík.  Samt sömdu Bítlarnir mörg frábær blúslög. 

[Yngvi Högnason, 21.1.2008 kl. 08:43]

Takk fyrir þennan lista. Hvort maður sé sammála eða ekki skiptir ekki máli. En, gaman að þú skulir loksins vera farinn að skrifa um tónlist.

[Guðni Már Henningsson, 21.1.2008 kl. 10:32]

Happiness is a warm gun á að sjálfsögðu að vera með, einnig Girl af Rubber soul og I am the Walrus beint í fyrsta sætið...og að sjálfsögðu er ég þér sammála með walls and bridges...

[Guðmundur G. Hreiðarsson (IP-tala skráð) 21.1.2008 kl. 11:38]

Mikið sakna ég "A Day In The Life" og "Being For The Benefit Of Mr. Kite" af Sgt. Peppers.

[Magnús Geir Guðmundsson, 21.1.2008 kl. 15:05]

Jájá, þarna eru lög og þarna eru ekki lög, þannig er það nú bara!

Strawberry Fields, In My Life m.a. fín lög já fyrir minn hatt, en önnur ekki. working Class Hero að sönnu flott, en þetta er nú suða upp úr eldgömlu bresku þjóðlagadjásni frá miðöldum hygg ég!En hvað um það, vildi nú hins vegar fyrst og síðast koma því að, að söngkonan unga hérna hún Ylfa Lind má eiga að platan hennar er sú athyglisverðasta af flestum ef ekki bara öllum þessum "Idolskífum" held ég bara! Keypti hana nýja á sínum tíma, lagavalið athyglivert og röddin flott! SEgi þetta nú alveg eins og er og er ekkert að skjalla stúlkuna um of held ég með því!

[Helga Þórey Jónsdóttir (IP-tala skráð) 21.1.2008 kl. 15:45]

eins og talað út úr mínu hjarta. happiness is a warm gun á topp 10. sammála guðna um girl en ekki má gleyma hinu gullfallega i'm only sleeping. hvar er það eiginlega? 

[Matthilda M. Eyvindsd Tórshamar, 21.1.2008 kl. 20:49]

Þetta er flottur listi, ég hefði samt viljað sjá How? á honum, og líka Crippled inside, en ætli þessir spekúlantar hafi ekki meira vit á þessu en ég.

[Ómar Ingi, 21.1.2008 kl. 20:53]

[Valgeir (IP-tala skráð) 21.1.2008 kl. 21:29]

 Fínn listi en lagið "In my life " samdi Lennon líklega ekki aleinn. Paul segist hafa samið allt lagið við texta Lennons.  Samkvæmt Lennon lagði Paul til einhverja parta (skv Wikipediu og umfjöllun Ingólfur Margeirsson í þáttunum bylting bítlana.)

[Jens Guð, 21.1.2008 kl. 23:09]

  Yngvi,  ég sem var farinn að halda að ég væri farinn að þreyta fólk með of miklum skrifum um músík.

  Guðni Már,  ég er algjörlega sammála.

  Guðmundur,  A Day in the Life hefur sennilega ekki verið gjaldgengt,  eins frábært og það er þó.  Millikaflinn er saminn og sunginn af Paul og setur töluverðan svip á lagið.  Being For The Benefit Of Mr. Kite er 100% Lennon-lag en hefur greinilega ekki náð inn á Topp 30 hjá dómnefndinni. 

  Maggi,  ekki vissi ég þetta með Working Class Hero.  Lennon einsetti sér að hafa lagið svo einfalt að menn þyrftu varla að kunna á gítar til að geta flutt það.  Ekta alþýðulag.

  Helga,  I´m Only Sleeping er eitt margra flottra laga sem hefur ekki náð inn á listann.

  Matthildur,  sama má segja um How.  Ég set hinsvegar spurningamerki við Cripple Inside sem er níðsöngur um Paul.  Lagið passar vel við heildarmynd plötunnar en er kannski meira léttur slagari en merkileg tónsmíð.

  Ómar,  mér sýnist á tákninu að þú sért ekki alsáttur.

  Valgeir,  In My Life er annað tveggja laga sem John og Paul greindu á um þátttöku hvors annars í lagasmíðinni (hitt lagið er Eleanor Rigby).  Þeir hjá Uncut virðast samþykkja fullyrðingu Johns um að Paul eigi lítið sem ekkert í In My Life.  Í bókinni Beatlesongs er aftur á móti niðurstaðan sú að Paul hafi átt hlut að máli.  Í sömu bók er fallist á að Lennon hafi átt hlut í Eleanor Rigby.  Ég hallast að niðurstöðu bókarinnar í báðum tilfellum.

[Jens Guð, 21.1.2008 kl. 23:33]

  Erlingur,  ég fékk nákvæmlega þessa sömu nostalgíu gæsahúð við að skoða listann í Uncut. 

[Rúnar Már Bragason, 22.1.2008 kl. 00:12]

Sammála með að Happiness Is A Warm Gun sárlega vantar. Stórskemmtilegt lag og tilurð lagsins er líka skemmtileg en sagan segir að John Lennon hafi samið það eftir að hafa gripið teiknimyndablað til að lesa. Því má bæta við að til er frábær "Cover" útgáfa af laginu með Breeders (hljómsveit Kim Deal úr Pixies).

[Jens Guð, 22.1.2008 kl. 00:18]

  Rúnar,  ég á eftir að heyra útfærslu Breeders á Happiness...  Takk fyrir að benda mér á hana.  Mér ekki gjarnt á að fá gæsahúð við að hlusta á lög en minnist þess þó að hafa fengið gæsahúð er ég í fyrsta skipti hlustaði á Happiness...  Það var þegar kom að seinni hluta lagsins,  samsöngsins og Lennon öskrar ofan í hann.

[Stefán (IP-tala skráð) 22.1.2008 kl. 13:14]

Það er viðurkennd staðreynd að Paul á hraða millikaflann sem hann syngur sjálfur í laginu í laginu In My Life.