Plötudómur

 

  Ég var snöggur að fá mér í gær plötuna Ökutíma með Lay Low.  Hér örfáum færslum fyrir neðan sjáið þið ástæðurnar.  Nú hef ég rennt plötunni í gegn hátt í 20 sinnum.  Hér kemur umsögn.  Smá hlutdræg vegna þess hvað ég er hlynntur málefninu. En samt marktæk,  svona að mestu.

Titill:  Ökutímar

Undirtitill:  Tónlist úr leikritinu í flutningi Lay Low

Flytjandi:  Lay Low

Einkunn:  4 stjörnur af 5

  Fyrstu fimm lög plötunnar eru frumsamin af söngkonunni Lay Low.  Þau lög eru jafnframt bitastæðasti hlutinn.  Lay Low er frábær söngvahöfundur og túlkandi.  Lögin eru einföld,  falleg,  grípandi og flutningurinn jafn einfaldur.  Áreynslulaust og einfalt gítarpikk.  Söngurinn er raul (croon) í þess jákvæðustu merkingu.  Einlægni og innlifun geisla frá hverjum tóni.  Þessi einlægni skilar sér í heillandi upplifun hlustandans.  Þetta er næsti bær við að vera staddur inni í lítilli stofu með flytjandanum innan um um fámennan kunningjahóp.  Bergmál frá föður bandarískrar þjóðlagatónlistar,  Woody Guthrie,  var sterkara á fyrri sólóplötu Lay Low.  En töfrar hans koma einnig upp í huga við hlustun á þessa plötu.

  Stór hluti "sjarmans" er söngrödd Lay Low.  Þó að söngrödd hennar sé á þessari plötu hvergi hás þá er eins og stutt sé í smá hæsi.  Samt er söngröddin allstaðar hrein og tær.  En það er þessi tilfinning fyrir því að hún verði hás í næstu tónum sem er svo hrífandi.

  Upphaflagið heitir Ótal minningar.  Falleg og snotur laglína,  kassagítarleikur sem varla er eiginlegt "pikk" er þó ekki "strömm" heldur. 

  Næsta lag er Lítið lag. Kallar fram "I Ain´t Got No Home" eftir Woody Guthrie. En samt ekki sama lag.  Það er annað lag af fyrstu plötu hennar sem stendur því nær.

  Þriðja lagið,  Saman,  hefur hljómað í útvarpinu.  Virkilega fallegt og grípandi lag.  Þarna nýtur einfalt gítarpikkið sín eins og best verður á kosið.

  Fjórða lagið,  Gleðileg jól,  er samsöngslag.  Á áreiðanlega eftir að verða sívinsælt jólalag.  Þarna koma fleiri hljóðfæri til sögu en eru samt smekklega sparlega notuð.

  Fimmta lagið er Forboðin ást.  Enn er gert út á einfaldleika og fegurð.  Þessi fimm fyrstu lög plötunnar eru 5 stjörnu dæmi af fimm mögulegum.

  Við taka lög eftir bandarísku kántrýsöngkonuna Dolly Parton.  Þá fer lítillega að halla undan fæti.  Fleiri hljóðfæri bætast við.  Platan poppast.  Samt ekki til skaða ef við bara miðum við þetta fyrsta Dolly Parton lag á plötunni,  "Here I Am". 

  Sjöunda lagið er 9 to 5.  Þarna kemur píanóið við sögu og er til óþurftar.  Flutningurinn er of nálægur frumútgáfu Dolly Parton.  Lay Low er flottari söngkona en Dolly og þarna hefði mátt sleppa þykkri hljómsveitarútsetningu.  Þetta sama á við um öll hin 6 lög plötunnar sem ótalin eru.  Lay Low er flottust þegar hljóðfæri eru sem fæst.  Lay Low er svo hrífandi "spes" að það er ekki eins gaman þegar hún setur sig í það hlutverk að vera "venjuleg" poppsöngkona.   

  Það yrði endurtekningarstagl að tíunda Dolly Parton lögin frekar.  Lay Low er að sumu leyti betri lagahöfundur og betri túlkandi en Dolly Parton.  Lay Low er að taka pínulkítið niður fyrir sig með því að flytja lög Dollyar svona nálægt útsetningum kántrý-drottningarinnar.  Þessi hluti plötunnar er þó  ekki vondur.  Alls ekki.  En stendur töluvert að baki fyrstu lögum plötunnar.  Dolly er góður lagahöfundur og fín söngkona.  Samt ekki mín bjórdós.  Þannig lagað.  Lay Low sem flytjandi sinnar eigin músíkur er miklu glæsilegri og áhugaverðari en Dolly Parton.

  Seinni hluti plötunnar fer nálægt 3 stjörnum af 5.  Þegar allt er lagt í einn pott þá standa eftir 4 stjörnur af 5.

  Ef textar Dolly Partons hlutar plötunnar hefðu verið á íslensku og hljóðfæraleikur skorinn niður til samræmis við fyrri hluta plötunnar værum við áreiðanlega að tala um 5 stjörnu dæmi.  Samt.  Kaupið plötuna,  hafið góða skemmtun af henni og styðjið Aflið,  systursamtök Stígamóta á Norðurlandi með því að kaupa góða plötu.  Fyrstu 5 lögin eru gullmolar og hin eru alveg allt í lagi.

  www.aflid.muna.is

Athugasemdir

[Steini Briem (IP-tala skráð) 26.1.2008 kl. 05:04]

Það er greinilega búið að klóna Dolly, þar sem þú skrifar ýmist "Dolly Parton" eða "Dolly Pardon". En ég hefði ómögulega nennt að kúra hjá hvorugri þeirra, hefði týnst á milli brjóstanna og ekki einu sinni komið fram í seinni göngum í október.

[Steini Briem (IP-tala skráð) 26.1.2008 kl. 05:14]

Rollan Dolly klónuð en hún hét í höfuðið á Dolly Parton:

http://en.wikipedia.org/wiki/Dolly_the_sheep

[Vilhelmina af Ugglas, 26.1.2008 kl. 11:44]

Ég hitti Dolly í Stokkhólmi í fyrra þegar hún var hér í tónleikaferð.

Það var gaman að tala við hana.

Greind kona og fjölhæfur tónlistamaður.

[Jóna Á. Gísladóttir, 26.1.2008 kl. 13:27]

eina lagið sem ég hef heyrt af plötunni er Saman... held ég. Úr myndinni hans Baltasar?

Ég get/gat ekki ákveðið hvað mér finnst. Þetta er raul eins og þú segir. Ég get ekki ákveðið hvort mér finnst þetta listrænt, flott og áhrifaríkt raul eða eitthvað sem mér finnst lítið til koma. Svona er ég óákveðin.

[Ingigerður Friðgeirsdóttir, 26.1.2008 kl. 15:39]

Lay Low er bara flott.

[Ómar Ingi, 26.1.2008 kl. 16:40]

Verð að fá þessa í safnið , ekki vill marr fá hnefahögg eða bjórgusu frá Gervigrasfræðingnum

[Bubbi J. (IP-tala skráð) 26.1.2008 kl. 17:58]

Ég er nokkuð sammála þér með diskinn Jens, lögin hennar bera af, ég hefði þó viljað sleppa jólalaginu allavegana látið það mæta afgangi, passar bara ekki að hafa jóla lög innanum aðra tónlist, en hvað um það. Skil heldur ekki í stúlkunni að taka ekki lögin hennar Dollyar í sínum stíl því það hefði gert heildarmyndina mikið sterkari,  en þetta er ágætt og málefnið þarft...af öllu AFLI

[Steingrímur Helgason, 26.1.2008 kl. 18:17]

Þú ert manna yndislegastur þegar þú ert skemmtilega hlutlaus í hlutdrægni þinni & Dollí Patróna væri mér ein fín bjórdós, ef ég drykki bjór.

En ég skal leggja eyru mín & aur eftir diskinum, enda málefnið óumdeilt & gott.

[Þórleifur Ásgeirsson (IP-tala skráð) 27.1.2008 kl. 22:06]

 Ertu ekki að meina; Woody Guthrie lagið; I aint got no home in this world anymore af Dustbowl ballads? Það lag er raunar sama lagið og Komdu og skoðaðu í kistuna mína með Megasi

Kveðja

Leifur

[Jens Guð, 27.1.2008 kl. 22:18]

  Þórleifur,  þetta er rétt hjá þér.  Mig misminnti nafnið á laginu.  Ekki var ég búinn að fatta þetta með Komdu og skoðaðu í kistuna mína.  En heyri strax fyrir mér að þetta er sama lagið þegar þú bendir á það. 

[Þórleifur Ásgeirsson (IP-tala skráð) 30.1.2008 kl. 20:58]

Og í framhaldi af þessu er ekki Dylan lagið Love minus Zero , No limits æði líkt laginu þú bíður allavega eftir mér af Megasarplötunni Í góðri trú

Hann hefur örugglega samið það í góðri trú 

Annars er ég sennilega Megasar fan allra tíma  ég á allt sem hann hefur gert í vinyl frumútgáfum, CD frumútgáfum og endurútgáfum safnplötum útvarpsefni og bókum, og svo við rustarnir stillum okkur nú saman,  þá upphófst minn glæpaferill þegar ég tók tuttugu blöð af Vísi undir fölsku nafni og seldi á mettíma, og stormaði upp á Gamla Garð að kaupa fyrstu Megasarplötuna.

Síðan þá er Megas órjúfanlegur hluti minnar tilveru Íslensk hliðstæða Ray Davies í mínu hjarta

Leifur

[Jens Guð, 30.1.2008 kl. 22:00]

  Þórleifur,  af því að þú hefur fylgst svona vel með Megasi þá veistu sennilega að hann er mesti Ray Davies aðdáandi á Íslandi (kannski #2 á eftir þér).