Heppileg heppni

  Í Fréttablaðinu í dag er ítarleg frásögn af hrakningum manns á sextugsaldri sem skreið illa slasaður í klukkutíma eftir hjálp í kjölfar þess að hafa velt vélsleða við Landmannahelli í fyrrakvöld.   Maðurinn lenti undir sleðanum og fótbrotnaði illa á að minnsta kosti tveimur stöðum og eitt beinbrotið opið.  Þegar Flugbjörgunarsveitin á Hellu kom manninum til aðstoðar var hann örmagna.  Hann kom ekki upp orði heldur klóraði í ferðafélaga sína til að vekja þá.

  Slysið varð um miðnætti.  Lögreglu barst tilkynning um klukkan hálf tvö.  Þyrla Landhelgisgæslunnar fór í loftið tæpum klukkutíma síðar.  Hún gat hinsvegar ekki lent við Landmannahelli vegna óveðurs og vonds skyggnis.  Snjóbíll björgunarsveitarinnar var því keyrður að Búrfelli,  þar sem þyrlan gat lent og flaug með manninn á Borgarspítalann í Reykjavík. 

  Maðurinn gekkst undir aðgerð í gær en var það þrekaður að hann treysti sér ekki til að ræða við blaðamann Fréttablaðsins. 

  Í undirfyrirsögn Fréttablaðsins segir að heppnin hafi verið með manninum.  Vonandi fer ég ekki langt yfir strikið í ruddalegri kaldhæðni þegar ég þakka fyrir að vera ekki eins heppinn og þessi maður.  Ég óska honum alls hins besta og megi hann ná heilsu sem fyrst.

Athugasemdir

[jensen (IP-tala skráð) 4.2.2008 kl. 23:55]

Verndarmáttur hefir fylgt honum,gangi honum sem allrabest að ná heilsu.

[Jens Guð, 5.2.2008 kl. 00:01]

  Jensen,  það er spurning hvort að verndarmátturinn hafi ekki þurft að koma aðeins fyrr til sögunnar.  Æ,  ég er með hálfgerðan móral yfir að stilla þessu svona upp.

[Aðalsteinn (IP-tala skráð) 5.2.2008 kl. 00:21]

Hvers vegna voru þeir að keyra um á snjóbíl með annan snjóbíl þar uppá???
"Snjóbíll björgunarsveitarinnar var því keyrður á snjóbíl björgunarsveitarinnar að Búrfelli".

Ég bara spyr.

[Jens Guð, 5.2.2008 kl. 00:43]

  Aðalsteinn,  mitt klúður í framsetningu sem ég laga núna í hvelli í færslunni.  Takk fyrir að benda mér á þetta.

[Brjánn Guðjónsson, 5.2.2008 kl. 00:44]

Babúskusnjóbílar?

[Brjánn Guðjónsson, 5.2.2008 kl. 00:46]

vissulega var maðurinn heppinn að sleppa lifandi frá þessari raun. heppilegra hefði þó verið að standa ekki svona sleðafikti heldur halda sig bara heima í sófa, eins og ég

[Jens Guð, 5.2.2008 kl. 00:54]

  Brjánn,  heppni er dálítið afstæð.  Fólk sem sleppur lifandi úr umferðarslysum hrósar sér stundum af því að yfir þeim hafi verið haldin verndarhendi guðlegra vera.  Það er gróft af mér að telja verndarhöndina hafa stundum verið seina til verks. 

[Nói Blomsterberg (IP-tala skráð) 5.2.2008 kl. 01:35]

Hehehe... þetta eru sniðug ruddalegheit hjá þér....

En hvernig er það ..... var karakterinn sem Magnús Ólafsson lék í Áramótaskaupinu (bloggarinn mikli) ÞÚ ? 

[Jens Guð, 5.2.2008 kl. 01:49]

  Arnór,  eftir því sem ég hef sannfrétt frá fyrstu hendi þá var Magnús að skopstæla mig í aðra röndina. Bara gaman að því. 

[Ía Jóhannsdóttir, 5.2.2008 kl. 08:27]

Hlý kveðja inn í daginn.  Er að fara heim til Hamingjulandsins núna á eftir.

[Árni Gunnarsson, 5.2.2008 kl. 11:39]

Hvernig er hún nú aftur limran sem mig minnir að sé eftir Þorstein Valdimarsson?

Ég gekk fótbrotinn fimm rasta leið,

nema fyrst þennan spöl sem ég skreið,

og stund sem ég beið

og spotta er ég reið,-

en ég stytti mér auðvitað leið!