Þegar afi breyttist í varðhund - VII

  Þegar við elstu systkinin komust á unglingsár brást afi illa við ef hann hélt að einhver af hinu kyninu væri að sýna okkur áhuga.  Hafði hann þá allt á hornum sér gagnvart viðkomandi.  Eitt atvikið var þannig að ungur námsmaður í Bændaskólanum á Hólum slæddist heim með okkur eftir dansleik á Sauðárkróki.

  Morguninn eftir var afa brugðið er hann varð ókunnuga drengsins var.  Afi kallaði mig á eintal og spurði hver þetta væri.  Ég upplýsti það.

  - Hverra erinda er hann hér?,  spurði afi.

  - Hann er eitthvað eltast við Júlíu systir,  svaraði ég.

  - Ég ætla rétt að vona að hún fari að leggja lag sitt við svona vesaling!

  - Ég held að þetta sé fínn náungi.  Honum gengur vel í skólanum og Halli skólastjóri er búinn að ráða hann sem sumarmann.

  - Það lá að.  Haraldur er aumingjagóður.  Hann vorkennir þessum aumingja og ætlar að taka hann að sér til að reyna að koma honum til manns.  Það verður þrautinni þyngra.  Reyndu að vara Júlíu við þessari liðleskju.   

  Það styttist í hádegismat og afi ákvað að virða sveininn betur fyrir sér.  Sagðist verða fljótur að sjá það út hvort lýsing sín á "mannleysunni" væri ekki rétt.  Hafa skal í huga að afi var kominn hátt á áttræðisaldur og orðinn veikburða.  Vegna brjóskeyðingar í mjöðmum var hann kominn í keng og staulaðist áfram við tvo stafi.

  Við vorum 10 í mat og afi náði með lagni sæti beint á móti drengnum.  Þar hleypti afi brúnum og starði á piltinn sem þótti þetta greinilega óþægilegt.  Hann varð afar vandræðalegur undir illilegu rannsakandi augnráði afa og vissi ekki hvernig átti að bregðast við.  Aðrir vissu það ekki heldur og horfðu í forundran á.  Allir steinþegjandi. Skyndilega hnussaði í afa og hann tautaði fyrir munni sér í hneykslunartóni: 

  "Þvílíkt og annað eins kartöflunef!"

  Við héldum með herkjum aftur af hlátrinum.  Drengurinn kafroðnaði enn vandræðalegri en áður.  Þá reigði afi sig,  þandi út brjóstkassann, sýndi krepptan hnefa og sagði:

  "Þú skalt hafa það í huga,  drengur,  að ég hef slegið niður stærri og sterkari menn en þig!"

   Okkur tókst ekki lengur að halda aftur af hlátrinum þó ókurteislegt væri gagnvart stráksa.  Afi varð hinn ánægðasti með sig,  hlóð mat á diskinn sinn og lék við hvern sinn fingur allan matartímann án þess að yrða frekar á piltinn eða horfa til hans.

  Næstu daga hældi afi sér ítrekað af því að "ónytjungurinn" myndi ekki þora annað en láta Júlíu í friði.  "Ætli maður kunni nú ekki tökin á svona dugleysingjum,"  bætti afi við,  drjúgur með sig. 

  Sveinninn áttaði sig fljótlega á því að best væri að hafa húmor fyrir afa og hélt áfram að kíkja í heimsókn af og til.  Afi sniðgekk hann með öllu.  Fljótlega fór stelpa sem vann á Hólum að kíkja í heimsókn með stráknum.  Fyrr en varði settu þau upp hringa.  Þá kúventi afi í framkomu og varð upp frá því hinn almennilegasti í þeirra garð.

  Fleiri sögur af afa:  http://jensgud.blog.is/blog/jensgud/entry/418268

Athugasemdir

[Ásthildur Cesil Þórðardóttir, 25.2.2008 kl. 09:35]

Þær eru óborganlegar sögurnar þínar af afa Jens minn

[Ía Jóhannsdóttir, 25.2.2008 kl. 09:53]

Æ ég elska að fá svona afasögur með morgunsopanum

[Pétur Magnússon (IP-tala skráð) 25.2.2008 kl. 11:34]

Komdu sæll Jens. Ég þakka þér mikið vel fyrir skemmtilegt blogg og þá sérstaklega þessar sögur af afa þínum. Ég á líka ættir að rekja til Skagafjarðar. Faðir minn er solginn í þjóðlegan fróðleik og sögur af kynlegum kvistum og þá sérstaklega skagfirðingum. Enn hann er lítt hrifin af tölvum. ég bið um leyfi til að prenta þessar sögur út og gefa honum.

kveðja

Pétur Magnússon

[Jóhanna Magnúsar- og Völudóttir , 25.2.2008 kl. 14:17]

Skemmtileg afasaga -    ertu eitthvað líkur þessum afa þínum ?

[Linda Linnet Hilmarsdóttir, 25.2.2008 kl. 16:21]

Takk takk og bestu kveðjur.

[Gunnar Helgi Eysteinsson, 25.2.2008 kl. 16:29]

Skemmtileg Afa saga... takk

[Númi (IP-tala skráð) 25.2.2008 kl. 16:42]

Enn og aftur snilldarsaga hjá þér Jens,takk fyrir.

[Lára Hanna Einarsdóttir, 25.2.2008 kl. 16:51]

Þvílíkur karakter, karlinn... 

[Ása Ninna Katrínardóttir (IP-tala skráð) 25.2.2008 kl. 17:05]

Elska sögurnar af afa þínum!!

[Jens Guð, 25.2.2008 kl. 19:07]

  Takk fyrir jákvæð viðbrögð,  þið öll.  Það hvetur mann til að rifja upp fleiri sögur af kallinum.  Ég fæ líka mjög jákvæð viðbrögð við þessum upprifjunum frá ættingjunum og öðrum sem þekktu afa.  Ekki síst þeim sem komu við sögu eða urðu vitni að atburðunum.

  Pétur,  endilega sýndu pabba þínum útprentun af sögum um afa.  Afi hét Stefán Guðmundsson og bjó á Hrafnhóli í Hjaltadal.  Kannski veit pabbi þinn hver hann var?

  Jóhanna,  eflaust er eitthvað líkt með skyldum.  En afi var samt það sérkennilegur um margt að enginn afkomenda hans er beinlínis líkur honum í hugsun eða háttum.

[Pálmi Gunnarsson (IP-tala skráð) 26.2.2008 kl. 16:54]

takk fyrir mig