Hólmganga Árna Johnsen og Bubba

 

 Á leið minni til Fjáreyja í síðustu viku las ég Fréttablaðið.  Þar var frétt um að Árni Johnsen væri ósáttur við að Bubbi kalli hann ítrekað versta gítarleikara ársins.  Steininn tók út þegar Bubbi bætti því við í Kastljósi á dögunum að Biggi í Maus væri svo laglaus að hann toppaði Árna Johnsen.

  Árni brást illa við og hafði umsvifalaust samband við Kastljós og skoraði Bubba á hólm í gítarleik,  söng og boxi.  Árni segir þá Bubba kunna jafn mörg gítargrip,  15.  Bubbi sé samt örlítið flinkari á gítar en á móti komi að Bubbi ráði ekki við fjöldasöng.  Þar er Árni hinsvegar á heimavelli.

  Með það í huga metur Árni líkurnar á úrslitum í einvíginu sér í hag.  Sömuleiðis býðst Árni til að greiða rokkkóngnum 3 milljónir króna ef hann finnur einn falskan tón á nýjustu plötu eyjapeyjans. 

  Vegna fjarveru frá fjölmiðlum landsins veit ég ekki hvert framhald varð á umræðunni.  Aftur á móti þykir mér broslegt að Árni tiltaki fjölda gítargripa sem vitnisburð um hæfni þeirra Bubba í gítarleik. 

  Ég hef heyrt krakka metast á um það við jafnaldra sína hvað þeir kunna mörg gítargrip.  En þegar þeir ná tökum á gítarleik skiptir flest annað við gítarleik meira máli en fjöldi hljómanna sem menn kunna.  Enda mörg þekkt dægurlög best afgreidd með 2 - 4 hljómum. 

  Ef rétt er hjá Árna að þeir Bubbi kunni aðeins 15 grip þá er komin skýring á því hvers vegna þeir spila ekki lög úr smiðju Ozzy Osbourne.  Hljómagangur þeirra samanstendur iðulega af 16 - 21 gripi.  Árni og Bubbi gætu þó afgreitt War Pigs.  Það er aðeins 14 gripa lag.

  Varðandi áskorun Árna um leit að fölskum tóni á nýjustu plötunni:  Það eru meira en þrír áratugir síðan flest alvöru hljóðver eignuðust búnað sem lagfærir falskan söng.  Síðan hefur enginn söngvari þurft að óttast falskan tón á sínum plötum.  Meira að segja þokkalegar karíókí-græjur eru búnar sama leiðréttingabúnaði fyrir falska söngvara.  Áskorun Árna er þess vegna í raun ekki alvöru áskorun.  Það er að segja varðandi falskan söng á plötum hans.  En gaman yrði ef Bubbi tæki áskorun Árna um boxeinvígi. 

  Árni er í þokkalegri æfingu:  Hefur kýlt Hreim í Hlandi og sonum,  Pál Óskar,  Össur Skarphéðinsson,  aldraðan sjómann sem fann upp sjálfsleppibúnað björgunarbáta,  sett öxl í kvikmyndatökumann hjá sjónvarpinu,  veist að Rottweilerhundum og ótal öðrum. 

Athugasemdir

[Ásthildur Cesil Þórðardóttir, 22.3.2008 kl. 14:57]

Ætli hér eigi ekki við líkur sækir líkan heim.  Báðir jafn mikið egó og eiginhagsmunaseggir þar má ekki á milli sjá.

[Ómar Ragnarsson, 22.3.2008 kl. 15:16]

Ég blanda mér ekki í tónlistarsvið þessarar umræðu. Báða fyrrnefnda menn tel ég til minna bestu vina. Eitt er þó morgunljóst í mínum huga: Bubbi æfði hnefaleika og ég hef séð nógu mikið til hans til að giska á að menn ættu ekki að skora á hann í box.

[Jenný Anna Baldursdóttir, 22.3.2008 kl. 15:34]

Bíddu lamdi hann Össur?  Hví?

Velkominn frá Færeyjum.

[Steini Briem (IP-tala skráð) 22.3.2008 kl. 15:46]

Eitt sinn fór í aldraðan sjómann,
og Árni hálftíma síðar lagði hann,
en Bubbinn lítið í boxi hann kann,
Björk hann vann við annan mann.

[Magnús Geir Guðmundsson, 22.3.2008 kl. 16:36]

Neinei, hann kýldi ekkert Össur. Þetta hefur nú fyrr verið rætt hérna hjá Jens, árni gaf honum eitt "fremm" í afturendan eftir að Össur hafði gert stólpagrín af "hávaða" sem yrði þegar Árni hristi höfuðið, sem hann hafði gert ítrekað meðan Össur var í ræðustól. Rauk Össur á Árna (sem mig minnir að hafi líka snúið upp á annað eyrað á Össuri) og runnu þeir í kjölfarið held ég niður einhvern stiga sem endaði með því að Össur varð ofan á og hefði vísast slátrað Árna ef þeir hefðu þá ekki verið aðskildir! Þannig kann ég söguna, sem kann þó að vera öðruvísi.

Ozzy hehe, heyri þá í anda góla til dæmis Bark At The Moon!

En mín góða Cesil er svolítið ósanngjörn við bubba að jafna honum við Árna, dálítið ólíkum saman að jafna!

[Linda Linnet Hilmarsdóttir, 22.3.2008 kl. 16:59]

Halló,Það er ekki hægt að líkja þessum tveim mönnum saman Bubba og Árna.

[Mummi Guð, 22.3.2008 kl. 17:57]

Það er ekki hægt að líkja þeim saman tónlistarlega séð. En þeir eru báðir óttalegir gasprarar sem hafa gaman af því að tala og það eru fáir sem taka mark á þeim. Þannig er hægt að líkja þeim saman.

[Jens Guð, 22.3.2008 kl. 18:04]

  Ásthildur,  mér þótti skondið að sjá haft eftir Árna að hann sé orðinn þreyttur á því hvernig Bubbi drullar ítrekað yfir fólk í hroka sínum.  Við erum að vitna í mann sem ítrekað kýlir fólk uppi á sviði á Þjóðhátíð í Eyjum og víðar,  lýgur síðan út og suður þó að fjöldi manns hafi verið vitni að ofbeldinu,  svo ekki sé minnst á stórtækan þjófnað á kantsteinum,  fánum,  tjörupappa og fleiru og hrokafullar tilraunir til að ljúga sig út úr því öllu. 

  Ómar,  ég sá á árum áður Bubba í götuslagsmálum oftar en einu sinni.  Ég get ekki mælt með við neinn að lenda í þannig grjótmulningsvél.

  Jenný,  Maggi útskýrir það í #5.  Ég man þetta dæmi alltaf eitthvað brenglað.

  Steini,  vísurnar þínar eru alltaf vel þegnar.

  Linda,  Árni telur þá tvo vera jafningja á flestum sviðum.  Eða alla vega þegar upp er staðið.  Þeir eiga það líka sameiginlegt að ég á plötur þeirra beggja.  Báðir hafa að auki verið í fangelsi.  Reyndar Bubbi bara sem gestur.

[Jens Guð, 22.3.2008 kl. 18:05]

  Mummi,  þeir hafa báðir sungið lög eftir bandaríska blúsistan Leadbelly inn á plötur. 

[Ingvar Valgeirsson, 22.3.2008 kl. 20:03]

Þessi tónleiðréttingarbúnaður sem þú talar um er líklega Auto-tune og þessháttar forrit. Þau hafa verið notuð í mörg ár í hljóðverum hérlendis, ekki bara til að gera falskan söng minna falskan, heldur einnig til að lagfæra litla hnökra án þess að artistinn þurfi að koma í hljóðver aftur með tilheyrandi kostnaði og veseni.

Síðan forritin komust í almenna notkun hefur Árni, af einhverjum óskiljanlegum ástæðum, tekið upp allnokkuð af söng og gefið út. Af þeim upptökum er ljóst að þróun téðra forrita er hvergi nærri lokið.

Bendi á snilldarverkið "Ókomin ár", hvar falskir tónar eru það margir að Donald Trump hefur ekki efni á að borga þrjár millur fyrir hvern þeirra.

[Magnús Jónsson, 22.3.2008 kl. 20:04]

Jens: Árni sigrar hann kann spark-box og sannaði það á afturendanum á Össa.

[Brjánn Guðjónsson, 22.3.2008 kl. 22:09]

ekki veit ég hvor er meiri mulningsvél. hitt veit ég, að eftir sem menn hafa stærri munn og hnefa hafa þeir minna hjarta.

[Steingrímur Helgason, 22.3.2008 kl. 22:11]

Það er ekki til sá tónréttara tölvaður búnaður sem að fær gólið úr eyjum til að hljóma vel í mínu fullkomna tóneyra, frekar enn að ég gúteri að .mp3 sándi vel.

Gaman var að sjá í kvöld á RÚV gamalt grín þar sem að Áddni almannakrimma var uppgert það að spila Boheimian Rapshody í tveimur gripum. 

Minna fyndið en sárara var að sjá hann misþyrma eyjalögum Oddgeirs á sama hátt, læf, ár eftir ár.