Ekki missa af þessu!

 

  Einn af áhugaverðustu þáttum í útvarpi er Geymt en ekki gleymt  með Frey Eyjólfssyni á rás 2.  Freyr er afskaplega skemmtilegur útvarpsmaður og víðfróður um músík.  Sömuleiðis er hann naskur á að tína til gamlar áhugaverðar plötur og fá flytjendur í heimsókn til að upplýsa eitt og annað varðandi upptökur þeirra.

  Síðasta laugardag tók Freyr hliðarspor frá hefðinni og bauð upp á sinn besta og skemmtilegasta þátt til þessa.  Þá fékk hann Gunna "Byrds" til að fara með sér yfir meistarastykkið The Notorious Byrd Brothers með bandarísku hljómsveitinni The Byrds.   

  Margir kannast við Gunnar sem plötusölumann hjá Hljóðfæraverslun Reykjavíkur,  Faco,  Japis,  Geisla og fleiri plötuverslana.  Gunnar hefur frábæra frásagnargáfu,  talar skýrt og skilmerkilega af yfirgripsmikilli þekkingu um músík og gæðir frásögnina lífi með skemmtilegum sögum og staðsetur hlutina í sögulegt samhengi.

  Gunnar var líka blaðamaður í gamla daga.  Skrifaði um músík fyrir dagblað sem hét Tíminn og Dagskrá vikunnar.  Góður blaðamaður sem hafði mikil áhrif á minn músíkþroska á unglingsárum.

  Þeir félagar,  Freyr og Gunni,  fóru á svo gott flug í þættinum að ég hef nokkrum sinnum endurspilað á netinu mér til mikillar skemmtunar þáttinn frá laugardeginum.  Þátturinn er endurfluttur í kvöld eftir 10 fréttir í kvöld.

  Þar fyrir utan er músíkin í þættinum eðal.  Platan The Nororious Byrd Brothers með The Byrds er eitt af meistaraverkum rokksögunnar.  Plata sem áhugafólk um rokk og rokksöguna verður að eiga og þekkja til að vera viðræðuhæft um það sem hæst bar á þessu tímabili í sögunni. 

  Missið ekki af Geymt en ekki gleymt í kvöld.  Að öðrum kosti;  finnið þáttinn á www.ruv.is og spilið hann aftur og aftur.

  Ég hvet þá Frey og Gunnar eindregið til að láta ekki staðar numið við þennan eina þátt heldur taka fyrir fleiri plötur með The Byrds á sama hátt.  Ég er byrjaður að hlakka til.  

Athugasemdir

[Ari (IP-tala skráð) 23.4.2008 kl. 03:05]

Takk f. ábendinguna. Á bara safndisk með köppunum og því er þetta kærkomið tækifæri til að kynna sér þá betur

[viðar (IP-tala skráð) 23.4.2008 kl. 08:55]

Maður klikkar nú ekki á því, skemtilegir þættir hjá Frey og ekki skemmir Gunni fyrir, það eru nokkrar skífurnar sem maður hefur eignast eftir ábendingar frá honum.

[Linda Linnet Hilmarsdóttir, 23.4.2008 kl. 10:13]

Innlitskvitt

[Stefán (IP-tala skráð) 23.4.2008 kl. 10:17]

Freyr Eyjólfsson er mjög sennilega besti og skemmtilegasti útvarpsmaður á Íslandi í dag og þótt víðar væri leitað. Hann hefur yfirgripsmikla þekkingu á nánast öllum málefnum líðandi stundar og ekki hvað síst tónlist. The Byrds er ein áhrifamesta hljómsveit rokksins og hafði m.a. áhrif á sjálfa Bítlana og Bob Dylan, sem reyndar líka voru mestu áhrifavaldanir á tónlist The Byrds. Þeir voru líka frumkvöðlar í country-rokki og lögðu línuna fyrir tónlistarmenn og hljómsveitir eins og Hollies, Grateful Dead, Buffalo Springfield, Love, The Band, Fairport Convention, Flying Burrito Brothers, America, Doobie Brothers, Poco, Little Feat, Eagles, Jacson Browne, Tom Petty og R.E.M. svo einhverjir séu nefndir. Gunni Byrds hefur yfirburðaþekkingu á sögu og tónlist The Byrds og allra þeirra tónlistarmanna sem voru í kring um þá. Ég stór efa að nokkur annar í heiminum fari betur með þá merkilegasögu en einmitt Gunni Byrds.

[Björn Jónsson (IP-tala skráð) 23.4.2008 kl. 17:46]

Var einmitt að fá mér þessa frábæru plötu fyrir hálfum mánuði, verð að hlusta á þá félaga í kvöld