Kvikmyndaumsögn

 

Titill:  Stóra planið

Handrit:  Ólafur Jóhannesson,  Stefán Schaefer,  Þorvaldur Þorsteinsson

Leikstjóri:  Ólafur Jóhannesson

Einkunn: **1/2

  Ástæða er til að taka strax fram að kvikmyndin Stóra planið er frekar skemmtileg.  Flestar senur hennar eru broslegar og hún heldur dampi sem þokkalegasta afþreying.  Hinsvegar er söguþráðurinn lítilfjörlegur og bragðdaufur.  Einnig er framsetningin tætingsleg.

  Ég hef ekki lesið bók Þorvaldar Þorsteinssonar sem handritið byggir á.  Þess vegna hef ég ekki samanburð á því hvort að þar er brotalöm eða hvort að úrvinnslu er um að kenna.

  Pétur Jóhann fer vel með aðalhlutverkið.  Sá drengur er fæddur leikari og sannfærandi í sínu hlutverki sem misheppnaður handrukkari er þráir að vinna sig upp sem slíkur.  Aðrir leikarar standa sig sömuleiðis vel í þeirri skopmynd sem dregin er upp af heimi handrukkara.

  Erpur Eyvindarson á stjörnuleik í litlu aukahlutverki.  Töluvert mæðir á Eggerti Þorleifssyni.  Hann  sannar enn einu sinni að hann er í hópi albestu kvikmyndaleikara landsins. 

  Þó að Stóra planið sé ekki merkileg mynd þá er hún ágæt kvöldskemmtun.  Áhorfendur mega ekki búast við miklu heldur setja sig í þær stellingar að það sé alltaf gaman að töktum Péturs Jóhanns,  Eggert Þorleifssonar,  Benedikts Erlingssonar og annarra sem skila því hlutverki sem af þeim er ætlast:  Að vera skemmtilegir.

 

Athugasemdir

[Þórður Helgi Þórðarson, 28.4.2008 kl. 10:12]

Pétur Jóhann kannski?

[tommi (IP-tala skráð) 28.4.2008 kl. 13:10]

Stóra planið stóðst enganveginn væntingar mínar, hún er að vísu skondin á köflum, enga síður hefði verið hægt að gera miklu mun betur með alla þessa úrvalsleikara innanborðs... Fær falleinkun í mínum bókum.

[Magnús Geir Guðmundsson, 28.4.2008 kl. 13:28]

Nú, fólk hefur þó sótt myndina vel ekki satt?

SVo finnst mér nú án þess að vita neitt um myndina annars, að ákveðin meðmæli séu að Þorvaldur Þorsteinsson kemur við sögu í gerð hennar!

[Jens Guð, 28.4.2008 kl. 14:33]

  Þórður,  takk fyrir ábendinguna.  Ég er búinn að laga þetta í færslunni.

  Tommi,  ég lenti í því sama;  að myndin stóð ekki undir væntingum mínum.

  Maggi,  ég held að myndin hafi verið vel sótt.  Það er að minnsta kosti búið að sýna hana vel á annan mánuð.  Ég geng út frá því sem vísu að bókin sé betri en myndin.