Skúbb! - Spennandi útvarpsþáttur á leið í loftið

  Nú styttist í að sumardagskrá útvarpsstöðvanna taki við af vetrardagskránni.  Oft reynast þar dúkka upp áhugaverðir þættir.  Ég veit ekkert um sumardagskrá neinnar útvarpsstöðvar ef frá er talið að mér er kunnugt um að full ástæða sé til að hlakka til sumardagskrár rásar 2.  Þar á bæ hafa framsýnir menn tryggt sér útvarpsmennina góðkunnu Andra Frey og Dodda litla.

  Þáttur þeirra fóstbræðra verður á dagskrá á föstudagskvöldum á milli klukkan 8 til 10.  Hann hefur hlotið nafnið Litla hafmeyjan.  Þar með er annarsvegar tenging við nafn Dodda litla og hinsvegar tenging við staðsetningu Andra Freys.  Hann er búsettur í Kaupmannahöfn og sendir sinn hluta þáttarins út þaðan.

  Andri Freyr og Doddi litli hafa sannað sig sem frábærir útvarpsmenn.  Báðir hafa til margra ára unnið á X-inu og Reykjavík FM101,5.  Doddi hefur að auki unnið á FM957 (sem reyndar eru ekki meðmæli.  Dagskrárgerð hans á hinum útvarpsstöðvunum vegur það rækilega upp).  Mig minnir að Andri Freyr hafi unnið á enn einni útvarpsstöðinni en mér tekst ekki að rifja upp nafn hennar.  Enda er það aukaatriði.  Aðalatriðið er að hann er sprækasti,  hugmyndaríkasti og djarfasti dagskrárgerðarmaður í sögu íslensks útvarps. 

   

Athugasemdir

[Brjánn Guðjónsson, 30.4.2008 kl. 18:52]

einhvernvegin hefur mér alltaf fundist sumardagskrár ljósvakamiðla einkennast af leiðindum og tómleika. vonandi að það sé að breytast.

[Markús frá Djúpalæk, 30.4.2008 kl. 20:18]

Þessir gaurar eru allavega skemmtilegir og gaman að fá þá í útvarp á ný!

[Óskar Þorkelsson, 30.4.2008 kl. 22:15]

já gaman að því að Andri er kominn í loftið aftur.. þekki ekki hinn.

[ari (IP-tala skráð) 1.5.2008 kl. 00:26]

Flott er, þeir eru sprækir kapparnir. Hvenær byrjar þetta.

Annars held ég að RVKFM hafi risið úr ösku XFM (sem andri vann líka á) , mig minnir það.

[Jens Guð, 1.5.2008 kl. 01:12]

  Brjánn,  þetta er ekki algilt.  Ég starfaði á útvarpsstöðvum í gamla daga til margra ára.  Dagskrá einhverra útvarpsstöðva tekur mið af því að skólar starfa ekki á sumrin.  Unglingar hlusta meira á útvarp að degi til á sumrin vegna þess að þá eru þeir ekki inni í skólastofum heldur í unglingavinnunni.  Unglingar hlusta minna á útvarp á kvöldin á sumrum en á vetrum.  Á sumrin eru þeir úti í fótbolta eða á rölti í góða veðrinu.  Jafnframt fjölmennir fólk í sumarbústaði um helgar og í sumarfríum.  Hlustar á útvarp yfir útigrillinu.  Þátturinn Litla hafmeyjan er á fínum tíma fyrir þá sem eru komnir í sumarbústaðinn á föstudagskvöldum.

  Markús,  ég man ekki eftir skemmtilegri innkomu dagskrárgerðarmanns en þegar Andri Freyr kom fram á sviðið í þættinum Freysi á X-inu.  Hann fór dásamlega yfir strikið svo ítrekað að í minnsta skiptið tvisvar var hann kærður og lögreglan mætti í heimsókn.  Allt var þetta þó á frekar saklausum nótum sem höfðu ekki mikinn eftirmála.  Ég hef þekkt Andra Frey frá fæðingu hans og hef haft mikla skemmtun af að fylgjast með honum.  Frábær náungi sem á ekki langt að sækja uppátækjasemi er fara langt inn á gráa svæðið. 

  Hann er líka skemmtilegur tónlistarmaður.  Var í Bisund (sem náði á sínum tíma 2.  sæti í Músíktilraunum) og Botnleðju (sem sigraði í Músíktilraunum) á sínum tíma og Fídel.

  Óskar,  ég þekki heldur ekki Dodda litla nema af nokkrum útvarpsþáttum hans og einu "herrakvöldi" á Kaffi Reykjavík.  Hann er skemmtilega hress þó að ég hafi ekki haft húmor fyrir hlutverki hans sem tónlistarmannsins Love Gúrú.

  Ari,  ég gleymdi að nefna það að þátturinn Litla hafmeyjan fer í loftið - að ég held - 16.  maí.

[ari (IP-tala skráð) 1.5.2008 kl. 19:29]

Takk f. það lillepúng. (eins og Andri segir)