Versta íslenska hljómsveitarnafnið

 

  Í síðustu viku óskaði ég eftir tillögum um versta íslenska hljómsveitarnafnið.  Margar góðar tillögur bárust.  Nú þarf ég að biðja ykkur um að styðja tillögur um þau nöfn sem voru nefnd af tveimur eða færri,  það er að segja ef þið teljið vera ástæðu til að viðkomandi nöfnum verði stillt upp í endanlegri og formlegri skoðanakönnun.  Í þessu tilfelli má bara styðja tillögur um nöfn sem einhver annar gerði tillögum um. 

  Valið stendur einungis um íslensk nöfn.  Útlend nöfn koma ekki til greina þó íslensk hljómsveit beri það.  Sömuleiðis koma einungis til greina nöfn þekktra hljómsveita.  Þá á ég við hljómsveitir sem hafa sent frá sér lag eða plötu eða kynnt sig þokkalega að öðru leyti.

  Það skal tekið fram að ætlunin með þessari skoðanakönnun er ekki að svekkja neinn né særa.  Vonandi geta allir tekið þessu sem léttum samkvæmisleik.  Þetta hefur sömuleiðis lítið með minn smekk að gera - ef undan er skilið að ég nefndi til sögunnar nöfnin Lummurnar og Skítamóral.  Ég ætla ekki að berjast fyrir því að þessi nöfn verði í endanlegu skoðanakönnuninni.  Þess vegna svara ég ekki að sinni spurningu Saxa um það hvers vegna Skítamórall sé verra nafn en Sykurmolarnir.  Ég útskýri það seinna.

  3 nöfn fengu 3 eða fleiri tilnefningar.  Þau verða inni í keppninni og þið þurfið ekki að styðja tillögur um þau.  Þetta eru:

Morðingjarnir

Síðan skein sól / SSSól

Eurobandið

 

Eftirfarandi voru tilnefnd af tveimur en það er lágmark að nafn sé stutt af þremur til að vera inni:

Lummurnar

Stuðmenn

Sú Ellen

Hölt hóra

Bruni BB

Aggi Slæ & Tamlasveitin

 

Síðan eru það nöfnin sem hafa fengið eina tilnefningu:

Skítamórall

200.000 naglbítar 

Hunang

Soðin fiðla

Paradís

Model

Breiðbandið

Klakabandið

Klamedía X

Sólstrandagæjarnir

Benni Hemm Hemm

Þrumuvagninn

HLH flokkurinn

Stuðkompaníið

Áhöfnin á Halastjörnunni

Stuðlatríóið

Hafrót

Pláhnetan

Bara-flokkurinn

Egó

GCD

Spilafífl

Póker

Start

Dúndur

Tívolí

Kaktus

Karma

Grýlurnar

Sniglabandið

Ríó tríó

Bless

Unun

Ham

Loðin rotta

Hljómsveit Geirmundar Valtýssonar

Hljómsveit Ingimars Eydal

Forhúð

Völundur

Austurland að Glettingi

Frostaveturinn mikli 1918  

Hnakkarnir

Kolrassa krókríðandi

Þokkabót

Deildarbungubræður

Haukar

Logar

Mánar

Stormar

Galdrakarlar

Snillingarnir

Sjálfsfróun

Svart-hvítur draumur

Sauðfé á mjög undir högg að sækja í landi Reykjavíkur

8-villt

Tríó Þorvaldar

Á móti sól

Icy-flokkurinn

5ta herdeildin

Rokklingarnir

Ómar

Ultra-mega-teknó-bandið Stefán

Tappi tíkarrass

Grýlurnar

Andrá

Aukaatriði

Axlabandið

Andhéri

Hunagstunglið

Athugasemdir

[Markús frá Djúpalæk, 2.5.2008 kl. 23:47]

Heitir hljómsveit þeirra norðanbræðra ekki 200.000 naglbítar? En ég styð að Stuðlatríóið hljóti útnefningu þetta árið sem versta hljómsveitarnafnið, mig langar varla að vita hvernig tónlist sú grúppa flytur, nafnið er svo skelfilega ómstrítt.

[Magnús Geir (IP-tala skráð) 2.5.2008 kl. 23:50]

Sæll félagi!

Bara smá ábending, Icy og Ultra eru nú á mörkunum ekki satt? En þú hefur kannski viljað hafa þau inni vegna blöndunnar á nöfnunum?

[Lára Hanna Einarsdóttir, 2.5.2008 kl. 23:53]

Mig langar í svona glas eins og er á myndinni...! 

[Steingrímur Helgason, 2.5.2008 kl. 23:55]

Ég hefði náttúrlega bara tekið listann um bestu hljómsveitarnöfnin & látið hann duga til kosnínga um þau verstu, enda er ég þér mun latari & líka líklega vísari í því að best/verst hringharmóníar alltaf.

Steinn Skaftason fær náttúrlega lítið hrós fyrir að tilnefna Hauka, en við pabbi erum hættir við að fara samstilltir heim til hans til einhverra rökræðulausra barsmíða, fyrir hans snilldarbloggerí um Eikina.

[Hilmar Garðars (IP-tala skráð) 3.5.2008 kl. 00:09]

sæll Jens það vantar Geira Sæm og Hunangstunglið eitt versta nafn sem ég hef heyrt.

[Víðir Benediktsson, 3.5.2008 kl. 00:09]

Er ekki Eurobandið á gráu svæði?

Ég hefði valið Lónlí blú bojs  Ekkert er íslenskara en það.

[Bragi Valdimar (IP-tala skráð) 3.5.2008 kl. 00:11]

Klamedía X skal ævinlega skrifuð með e-i.

[Jens Guð, 3.5.2008 kl. 00:20]

  Markús,  takk fyrir ábendinguna.  Ég hef það oft skrifað um þessa ágætu hljómsveit að ég ætti að vera búinn að læra að stafsetja nafnið rétt.  Til gamans má geta að umrædd hljómsveit Villa og félaga er ekki eina íslenska hljómsveitin sem hefur borið þetta nafn.  Ég kann ekki þá sögu en mig minnir að eldri hljómsveitin hafi breyst í hljómsveitina Randver.

  Maggi,  jú, þessir hópar eru á gráu svæði.  Vegna niðurlagsins í Icy-flokknumog Teknó-bandinu Stefán þá lét ég þau nöfn vera inni sem íslensk nöfn.  Ég hugsaði með mér að þessi nöfn myndu kannski hvort sem er ekki vera studd sem verstu íslensku hljómsveitarnöfnin.  Ef á það reynir þarf ég að hugsa mig betur um.

  Í fyrsta forvalinu samþykkti ég nafnið Ðe Lonlí Blú Bojs vegna stafsetningarinnar en var bent á að þegar nafnið er nefnt í útvarpi þá heyrist bara útlenskt nafn.  Ég get ekki annað en fallist á þau rök.

  Lára Hanna,  mig langar líka í svona glas.

  Steingrímur,  mér þykir nafnið Haukar ekki vont ef litið er til þess tíðaranda er íslenskar bítlahljómsveitir báru hver um aðra þvera nöfn sem enduðu á ar.  Hitt er annað mál:  Svakalega sem Haukar voru leiðinleg hljómsveit.   Þegar þeir voru upp á sitt besta skilgreindu menn músík hennar og svipaðra hljómsveita sem brennivínspopp.  Rökin voru þau að það væri hægt að hlusta á þannig músík eftir 3ja glas (það var áður en bjórinn var leyfður).  Einhverra hluta vegna eru menn hættir að tala um brennivínspopp.

[Jens Guð, 3.5.2008 kl. 00:30]

  Hilmar,  ég set Hunangstunglið inn í pakkann.  Ég frétti af því að blúsband pabba þíns hafi farið á kostum þarna fyrir austan á dögunum.  Gott ef það var ekki á Norðfirði og Bjöggi Gísla verið með í dæminu.

  Víðir,  Eurobandið er á gráu svæði.  Það er rétt.  En niðurlagið,  bandið,  ræður þarna nokkru ásamt því sem við tölum um Eurovisjón.  Já,  en samt.  Þetta nafn er á gráu svæði.  Fleiri mættu tjá sig um það hvort að þetta nafn sé gjaldgengt.

  Bragi,  takk fyrir leiðréttinguna. 

[viðar (IP-tala skráð) 3.5.2008 kl. 00:31]

 Ertu kominn með Altsæmer Jenni minn? Ég man ekki betur en við skemtum okkur dável í Festi hér um árið er Haukarnir spiluðu þar, svona á milli bardaga atriða í anderinu.

[Haukur Viðar, 3.5.2008 kl. 00:31]

Eftirtaldar sveitir fá minn stuðning: 

Hölt hóra

Skítamórall

Pláhnetan

Ríó tríó

Galdrakarlar

Snillingarnir

Sjálfsfróun

 

8-villt

 

Á móti sól

 

Icy-flokkurinn

 

Andhéri

 

 

8-villt er samt langverst! 

[Steingrímur Helgason, 3.5.2008 kl. 00:33]

Jens, þarna skýtur þú nú þig sjálfur alveg ómiðað, að ég ætla, í innanverðari kartnöglina á annari hvorri stórutánni, því að Haukanna verður alltaf minnst sem einhverrar albestu gleði & grínsveitar landsins, en aldrei leiðinlegar ballgrúppu, enda lærðu Skriðjöklarnir sitt hvort af þeim & þeirra 'performans'.

Múzzíg, þarf enda stundum ekkert að snúast um innannvert þúnglyndi hlustandarinnar til að vera góð á stund eða stað.

[Jens Guð, 3.5.2008 kl. 00:40]

  Viðar,  ég ar að reyna að ávinna mér alsæmer.  Jú,  jú,  við skemmtum okkur á dansleikjum með Haukum í gamla daga í Festi.  Og jafnvel með verri hljómsveitum.  En kannski ekki vegna músíkunnar heldur í tuski í andirinu.  Ekki síst þegar Siggi Einars var með í för.

  Haukur Viðar,  takk fyrir þátttökuna.

[Jens Guð, 3.5.2008 kl. 00:44]

  Steingrímur,  eins og Viðar bendir á þá er ég búinn að skjóta mig í báðar stórutær með ummælum mínum um Hauka.  Kannski voru Haukar skemmtilegir á dansleikjum án þess að ég muni eftir því.  En á plötum var þetta ömurleg hljómsveit.

[Magnús Geir (IP-tala skráð) 3.5.2008 kl. 01:09]

Hehehe, eftir hið slæma fótamein um daginn máttir þú nú eiginlega ekki við þessu veslings karlinn Jens!

En svo til að bæta gráu ofan á svart, eða bara strá salt í tásárin hehe, þá hef ég lómurinn alltaf haft lúmskt gaman af Haukunum! (Nú grætur Hauganeshertogin svei mér bara af gleði!) En ég veit Jens minn, að eitt erum við sammála varðandi Haukana, eða ég held það, að hljómborðsleikarin knái með meiru, Kiddi Guðmunds, sé sannkallað eðalmenni!

[Guðmundur K (IP-tala skráð) 3.5.2008 kl. 01:19]

Lummurnar er lúðalegasta hljómsveitarnafn allra tíma. Og tónlistin þeirra kallaði alltaf æluna upp í hálsinn á mér.

[Steinn Skaptason (IP-tala skráð) 3.5.2008 kl. 01:26]

Jens, Steingrímur og aðrir !

Þakka þér fyrir það Steingrímur, og takk fyrir þetta með Eik. Þess má geta þrátt fyrir að nafn Hauka hafi lent þarna að þá var ég, er og verð alltaf mikill aðdáandi Hauka og á meir að segja sitthvor tvö eintök af báðum Lp hljómplötum, alls 4 stykki. Á einnig litlu hljómplötuna með Haukum með sín Þrjú tonn af sandi, á einnig báðar plötuhliðarnar á safnplötu frá 1975, einnig í tveimur eintökum.  Er semsagt mikill Hauka aðdáandi, ó já  

Haukar voru skemmtilegir á böllum og allt aðrir Haukar en á plötunum, samt er einhver sjarmi við nokkur lög á plötunum sem eru mjög ólíkar. Haukar voru bara eins og þeir voru og ekki hægt að ætlast til annars frá þeim = léttmeti til að hlusta við húsverkin.

Maður hafði þó Megas, Eik og Spilverkið til þess að nýta heilabúið að ráði við hlustun í góðum hægindastól.

Brennivínsbönd á þessum árum ca 1971 - 1977, sem og margt frá þessum tíma fær sinn sjarma í minningunni eftir á, sérstaklega harmónikkutríóin á borð við Ása, Hróka og Steina spil. Haukar koma svo í kjölfarið.

En gleðitónlistar brennivínsbransinn sem kom eftir þetta var heldur dapur á borð við Sniglabandið og fleiri, nema kannski Skriðjöklar - "Jiðskröklar" sem voru ágætis mál. Diskóið var verra mál á þessum árum 70´s, heldur en brennivínsböndin að ég tel. Blessuð sé minning Hauka

[Jens Guð, 3.5.2008 kl. 01:36]

  Maggi,  það komu ýmis eðalmenni við sögu Hauka.  Kristján "Bravó-bítill" Guðmundsson þar á meðal.  En þeim er fæstum til framdráttar að vera kenndir við Hauka.  Framlag Kristjáns og fleiri til poppmúsíkur er betur minnst með þátttöku þeirra í öðrum hljómsveitum.

  Guðmundur K,  ég gæti ekki orðað þetta betur.

  Steinn,  ég kalla þig brattan að játa aðdáun á Haukum.  Á móti vegur að þú skulir kunna að meta Megas,  Eik og Spilverkið.  Ég tek ekki undir blessun þína varðandi minningu um Hauka. 

[Steinn Skaptason (IP-tala skráð) 3.5.2008 kl. 01:43]

Já Jens minn, eitt og annað leynist innan um í mínu mikla eðalsafni sem er stórt að vöxtum, en ætli Haukar séu ekki það léttasta dæmi sem þar er. Ekkert er fullkomið í þessu lífi.

[Óskar Arnórsson, 3.5.2008 kl. 06:15]

Popp & Skopp? Annars er ég með nýtt sameiginlegt nafn á fullt af hljómsveitum. "Eyrnapyntingar" "Höfuðverkur" o.s.f. Hef gaman af almennilegri músik.

[Guðmundur Rafnkell Gíslason, 3.5.2008 kl. 13:31]

He, he! skemmtilegur leikur. Rétta skal vera rétt. Súellen. Ekki Sú Ellen.

[Fríða Eyland, 3.5.2008 kl. 14:40]

Brunaliðið, póker, kaktus og Bless

[Sigurbjörg Sigurðardóttir, 3.5.2008 kl. 15:13]

Alltaf gaman að lesa þig og athugasemndirnar.Er alveg úti að aka ,því ég fór frá  klakanum  árið 68 svo ég misti af allri Islenskri músikmenningu,svo fyrir utan skemtilegan lestur er ég bara eins og í skóla.Er að læra ,og það er gaman og fróðlegt.Svo ég þakka ykkur öllum.

[Helgi Már Barðason, 3.5.2008 kl. 17:31]

Friðryk þótti mér aldrei neitt sérlega vel heppnað hljómsveitarheiti.

[Guðríður Hrefna Haraldsdóttir, 3.5.2008 kl. 18:01]

Deildarbungubræður (samt húmor), Klamedía X og Lummurnar.

[Linda Linnet Hilmarsdóttir, 3.5.2008 kl. 19:00]

Innlitskvitt

[Ía Jóhannsdóttir, 3.5.2008 kl. 19:24]

Lára Hanna og þið hin svona glas eða næstum því fæst hér í Prag.  Á ég að senda ykkur dúsín? 

[Lára Hanna Einarsdóttir, 3.5.2008 kl. 20:23]

Já, takk, Ía!  Þigg það! 

[Óskar P. Einarsson (IP-tala skráð) 4.5.2008 kl. 07:40]

'Í svörtum fötum' er arfaslappt, einkum fyrir þær sakir að söngvarinn heitir "Jónsi Í Í Svörtum fötum".

Hvaða vitfirringur var það sem tilnefndi Ham?!? Er til flottara tvítyngt hljómsveitarnafn, ég bara spyr? 

[Almar (IP-tala skráð) 5.5.2008 kl. 00:00]

Pláhnetan og 8-villt eru skelfileg nöfn. Einnig finnast mér nöfnin Í svörtum fötum og Á móti sól skelfileg, mér finnst það eiginlega alltaf óþolandi þegar hljómsveitanöfn byrja á forsetningu.

[Jakob Smári Magnússon, 6.5.2008 kl. 16:02]

Síðan skein sól eitt af verstu hljómsveitarnöfnunum ? Ég fer nú bara að gráta  Einu sinni vorum við kosnir verst klædda hljómsveitin og nú þetta .... Þetta jaðrar við einelti.

[Steinn Skaptason (IP-tala skráð) 7.5.2008 kl. 01:18]

Síðan skein sól er alveg prýðilegt nafn, ef miðað er við tíðaranda þeirra ára og tímabils þegar hljómsveitin var stofnuð og skýrð. Allt í góðu með það. Mig langaði alltaf að stofna hljómsveit og nota andstætt nafn við nafnið Síðan skein sól, en ekki hefur orðið úr ennþá, en nafnið mitt er Svo ringdi. Flott andstæða, álíka gott nafn og svo elska ég rigningu, í alvöru talað.

Jakobi Smára Magnússyni er hér með veittur stuðningur öðru sinni.

[Jens Guð, 7.5.2008 kl. 02:16]

  Ég átta mig ekki á neikvæðri afstöðu fólks gagnvart nafninu Síðan skein sól.  Þetta er bjart og jákvætt nafn.  Eins og hljómsveitin sjálf.  En eins og ég hef ítrekað nefnt þá leyfi ég þessari skoðanakönnun að ráðast af öðru en minni persónulegu skoðun.  Sömuleiðis undirstrika ég að þessi skoðanakönnun er til gamans gerð og engin ástæða til að taka henni öðru vísi en sem léttum samkvæmisleik.