Stórfurðulegar nágrannaerjur

 

  Þetta gerðist fyrir nokkrum árum á sólríkum sumardegi.  Ég var að skutla dóti til kunningja míns í smáíbúðarhverfi.  Þar sem við stóðum í útidyrunum hjá honum renndi nágranni hans í hlað.  Kunningi minn kastaði glaðlega kveðju á hann en var svarað með fúkyrðum.  Ég varð eitt spurningarmerki af undrun.

  Kunningi minn útskýrði málið.  Það er rétt að taka fram að þetta er rösklega sextugur maður en mjög ör.  Klárlega það sem kallast ofvirkur.  Hann talar og framkvæmir hluti áður en hann hugsar.  Og er alltaf á fullu.  Situr aldrei kyrr,  hvorki þegar hann horfir á sjónvarp eða fer til kirkju.  Hann sprettur ítrekað á fætur undir öllum kringumstæðum til að senda sms eða sækja penna út í bíl til að punkta eitthvað hjá sér og svo framvegis.

  Hann útskýrði fyrir mér framkomu nágrannans eitthvað á þessa leið:  "Um síðustu helgi tók ég garðinn minn í gegn.  Sló hann,  snyrti blómabeð og bjó til þetta fallega kúlulaga mynstur með jöfnu millibili á limgerðið.  Þetta var rosalega skemmtilegt enda fátt skemmtilegra en dútla í gróðri og mold.  Ég gleymdi mér algjörlega og rankaði allt í einu við mér þegar ég var einnig farinn að taka til hendi í þessum samliggjandi garði nágrannans.  

  Nágranninn var á sólarströnd erlendis og ekki væntanlegur fyrr en síðar í vikunni.  Ég sá fram á að bið yrði á að hann gæti sinnt sínum garði.  Það er lítið varið í að hafa minn garð fínan og snyrtilegan en þurfa að horfa upp á óhirtan garð nágrannans.  Þannig að ég bretti betur upp ermar og tók garðinn hans rækilega í gegn.  Þar var ekki vanþörf á grænum fingrum.  Ég stakk upp blómabeð og endurraðaði blómunum til að ná fram skemmtilegri litasamsetningu.  Sérðu þrepin þarna?  Þetta var óreglulegur grjótbingur.  Sitthvað fleira lagaði ég og samræmdi kúlulaga mynstur á limgerði hans og mínu.

  Þegar nágranninn kom frá útlöndum þá trylltist hann.  Hann ásakaði mig um ósvífni,  frekju,  yfirgang,  afskiptasemi og ég veit ekki hvað og hvað.  Ég hafði frekar reiknað með fagnaðarlátum,  miklu þakklæti og jafnvel McCinTosh dollu.  Sennilega var hann ósofinn eftir flugið og pirraður þannig að ég var ekkert að rífast við hann.  Ég ráðlagði honum bara að leggja sig.  Hann er búinn að vera með ólund síðan.  Þú heyrðir hvernig hann hreytti í mig ónotum.  Það er allt annað en gaman að búa við svona skapstirðan nágranna."   

Athugasemdir

[Númi (IP-tala skráð) 28.6.2008 kl. 23:47]

Svona moldvörpu vildi ég hafa í næsta húsi við mig,og ekki verra að hann dytti inn í garðinn minn með klippur og skóflu.Svona nágranna þyrftu allir að hafa.

[Linda Linnet Hilmarsdóttir, 29.6.2008 kl. 00:26]

Innlitskvitt og bestu kveðjur

[Jóna Kolbrún Garðarsdóttir, 29.6.2008 kl. 00:31]

Ég hefði borið gjafir á minn nágranna hefði hann gert svipað fyrir mig  

[Þorsteinn Briem, 29.6.2008 kl. 01:12]

Sá fúli er greinilega ekki ofvirkur í eigin garði, fyrst allt var þar í órækt.

Ég hefði reynt að gera eitthvað fyrir konuna hans meðan hann var fjarri góðu gamni.

Ætli kallinn hefði orðið jafn brjálaður út af því? Þetta þarf að kanna.

[Lára Hanna Einarsdóttir, 29.6.2008 kl. 01:25]

Hvar býr þessi maður núna? Er næsta hús nokkuð til sölu? 

[Ása Ninna Katrínardóttir (IP-tala skráð) 29.6.2008 kl. 08:04]

Ég væri til í að eiga svona góðan granna! Óþarfa fýla í þessum nágranna...

[Gulli litli, 29.6.2008 kl. 08:59]

Ég væri til í að búa við hliðina á þessum vini þínum!

[Guðrún Eiríksdóttir (IP-tala skráð) 29.6.2008 kl. 11:40]

ó my good hvað sumt fólk getur verið stíft og geðvont.

[Jenný Anna Baldursdóttir, 29.6.2008 kl. 14:43]

Þvílíkt vanþakklæti.  Þekkti mann sem fór og málaði fyrir vini sína meðan þau brugðu sér til útlanda og hann gerði það óbeðinn.  Valdi lit og allt.  Hann varð smá hissa þegar það brutust ekki út fagnaðarlæti.  I wonder why?

[Ómar Ingi, 29.6.2008 kl. 16:01]

Tja hérna hér , ætli hann sé í óhamingjusömu sambandi eða er þetta einn hlutahafa í FL group ?

Eitthvað mikið hlýtur að vera að , þegar menn kunna ekki að meta góðverk nágranna sinna.

Ce La Vie

[Þorsteinn Briem, 29.6.2008 kl. 17:55]

Jens. Fólk hefur aldrei séð einhvern slá eða snyrta garðinn við Hvíta húsið:

"What do chemtrails, water pollution, and toothpaste all have in common. You guessed it. In fact, the exposure to the metal is reaching epidemic proportions. So what's the big deal you might ask. Well, new studies have suggested that aluminum may be the most toxic substance known to man, even more deadly than mercury or plutonium.

In addition, aluminum and heavy metals in your brain may also be acting as an antennae to receive mind control suggestions from the government. For more see the Mind Control Section of the NSA, CIA & Spies page."

http://www.nogw.com/aluminum.html

[Sigurbjörg Sigurðardóttir, 29.6.2008 kl. 18:22]

 Góður þessi.

[Rúna Guðfinnsdóttir, 29.6.2008 kl. 19:06]

Æææ...og húsið við hliðina á mínu var til sölu sl. áramót....og það er ekki einu sinni grindverk á milli húsanna. Garðurinn minn er svo mikið fíflalegur, eins og einn af nágrönnum mínum komst að orði...og þar hafði hann sannlega rétt fyrir sér..hefði verið fínt að fá svona nágranna...hefði ávallt verið velkominn..hvort sem væri á björtum degi eða dimmri nóttu...

[...désú (IP-tala skráð) 29.6.2008 kl. 21:02]

Æææjjj er ekki óþarfi að vera að vesenast í eigum annarra án leyfis?  Máski var nágranninn geðstirði með einhvers konar gjörning í garðinum sem félaginn skemmilagði.

[Ía Jóhannsdóttir, 29.6.2008 kl. 22:00]

Ég á einn svona ofvirkan en hann færi nú aldrei yfir til nágrannans enda ekkert sérlega hlýtt á milli bæja, en hann slær meðfram þjóðveginum hér óumbeðinn og fær hrós frá bæjarstjóranum og klapp á öxlina.  Enginn fúll á móti þar.

Skemmtileg færsla a tarna. 

[Helga Guðrún Eiríksdóttir, 29.6.2008 kl. 22:33]

Sjaldan launar álfur ofvirkni.

[Jóna Á. Gísladóttir, 30.6.2008 kl. 10:59]

hahahahahahahaha andskotinn

[Markús frá Djúpalæk, 30.6.2008 kl. 18:48]

Ég er nú svo kurteis að ég hefði nú ekki látið nágrannann finna lengi fyrir fýlunni, en ég hygg að mér hefði ekkert þótt gaman að vita af nágrannanum að gramsast í eigum mínum. Hverju gæti svona ofvirkningur tekið upp á breyta næst?

[sæunn (IP-tala skráð) 1.7.2008 kl. 20:46]

þrymur ég get lofað þér því að jens fyndist það bæði fyndið og frábært ef eitthver  nágranni tæki til hendinni hjá honum því mikið skapbetri mann er erfitt að hitta